អ៊ីស្រាអែលបើកការវាយប្រហារលើក្រុង Rafah
បរទេស៖យន្តហោះចម្បាំងរបស់អ៊ីស្រាអែល បានវាយលុកគោលដៅនៅក្នុងទីក្រុង Rafah របស់ប៉ាឡេស្ទីន កាលពីយប់ថ្ងៃចន្ទ ប៉ុន្មានម៉ោងបន្ទាប់ពីកងកម្លាំងការពារអ៊ីស្រាអែល (IDF) បានព្រមានជនស៊ីវិលនៅក្នុងតំបន់ថា ខ្លួនកំពុងរៀបចំវាយប្រហារទីក្រុងនេះដោយ “កម្លាំងខ្លាំង”។
នាយករដ្ឋមន្ត្រីអ៊ីស្រាអែល លោក Benjamin Netanyahu បានគំរាមជាច្រើនខែដើម្បីបញ្ជូនកងទ័ពចូលទៅក្នុងទីក្រុងនេះ ដោយលើកហេតុផលថាប្រតិបត្តិការបែបនេះគឺចាំបាច់ដើម្បីធានាអ៊ីស្រាអែលនូវ “ជ័យជំនះទាំងស្រុង” លើក្រុមហាម៉ាស។
បច្ចុប្បន្ន Rafah គឺជាជម្រករបស់ជនជាតិប៉ាឡេស្ទីនប្រហែល ១.៤ លាននាក់ដែលបានផ្លាស់ទីលំនៅពីភាគខាងជើង និងកណ្តាលតំបន់ហ្គាហ្សា ហើយអង្គការសហប្រជាជាតិបានព្រមានថា ការឈ្លានពានរបស់អ៊ីស្រាអែលនឹងក្លាយជា “មហន្តរាយ” សម្រាប់ជនស៊ីវិលទាំងនេះ។
ចំពេលមានការថ្កោលទោសយ៉ាងខ្លាំងក្លាពីសហរដ្ឋអាមេរិក សហភាពអឺរ៉ុប និងប្រទេសមួយចំនួនទៀត និងអង្គការអន្តរជាតិនានា លោក Netanyahu បានប្តេជ្ញាកាលពីសប្តាហ៍មុនថានឹងបន្តប្រតិបត្តិការនេះ។ នាយករដ្ឋមន្ត្រីអ៊ីស្រាអែលក៏បានបញ្ជាក់ដែរថា លោកនឹងបន្តការវាយប្រហារលើក្រុង Rafah មិនថាកិច្ចព្រមព្រៀងឈប់បាញ់ត្រូវបានសម្រេចជាមួយក្រុម Hamas ឡើយ។