សម្តេចធិបតី៖ កុំអាលគិតរឿង ធ្វើរថភ្លើងល្បឿនលឿន ត្រូវធ្វើម៉េចឲ្យផ្លូវដែកដែលមានស្រាប់ប្រសើរឡើង ដើម្បីធានាការដឹកជញ្ជូនទាំងមនុស្ស ទាំងទំនិញ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា កុំទាន់គិតរឿង ធ្វើផ្លូវដែកល្បឿនលឿន អ្វីដែលត្រូវគិត គឺត្រូវធ្វើយ៉ាងណាឲ្យផ្លូវដែក២ខ្សែ ដែលប្រទេសកម្ពុជា មានបច្ចុប្បន្នរត់បានលឿន។

ក្នុងឱកាសអញ្ជើញសំណេះសំណាល ជាមួយមន្ត្រីរាជការ បុគ្គលិក កម្មករ និយោជិតបម្រើការងារ នៅកំពង់ផែស្វយ័តក្រុងព្រះសីហនុ ខេត្ដព្រះសីហនុ នាថ្ងៃទី១ ខែមេសា ឆ្នាំ២០២៤សម្តេចធិបតី ហ៊ុន ម៉ាណែត បញ្ជាក់ថា «កុំអាលគិតរឿង រទេះភ្លើងល្បឿនលឿន ថ្លៃណាស់ទុកថ្ងៃក្រោយ ធ្វើម៉េចឲ្យប្រសើរឡើងនូវផ្លូវដែក ដែលយើងមានស្រាប់ ដើម្បីធានានូវការ ដឹកជញ្ជូនទាំងមនុស្ស-ទាំងទំនិញ»។

សម្តេចធិបតី ហ៊ុន ម៉ាណែត បានឲ្យដឹងថា បច្ចុប្បន្នកម្ពុជា មានផ្លូវដែកចំនួន២ខ្សែ ដោយខ្សែទី១ នៅភាគខាងជើង ចេញពីភ្នំពេញ ទៅក្រុងប៉ោយប៉ែត និងខ្សែទី២ នៅភាគខាងត្បូង ចេញពីភ្នំពេញ ទៅក្រុងព្រះសីហនុ។

សម្ដេចធិបតី ជឿជាក់ថា ទូររថភ្លើងល្បឿនលឿន ដែលក្រុមហ៊ុន Royal Railway របស់អ្នកឧកញ៉ា គិត ម៉េង នាំចូលមកថ្មីនេះ ជិះទៅស្រួល ហើយផ្តល់នូវបទពិសោធន៍ថ្មី សម្រាប់អ្នកដំណើរ តាមរថភ្លើង។ សម្ដេចធិបតី បញ្ជាក់ឲ្យដឹងថា ការដឹកជញ្ជូនតាមផ្លូវដែក គឺមានតិច ដែលមកតាមកុងតឺន័រ បើគិតជាចំនួន បានតែ៦-៧ភាគរយ តែប៉ុណ្ណោះ នៃទំនិញដែលដឹកនៅកំពង់ផែ ដូច្នេះត្រូវពង្រឹង លើការដឹកទំនិញ នៅតាមផ្លូវដែកនេះ ៕