សមាជិកសភាអាស៊ី និងប៉ាស៊ីហ្វិក ប្តេជ្ញាចិត្តជាថ្មីម្តងទៀត ក្នុងកិច្ចសហការជាមួយដៃគូដើម្បីអនុវត្ត ICPD30
ភ្នំពេញ៖ កិច្ចប្រជុំនៃគណៈកម្មាធិការអចិន្ត្រៃយ៍ AFPPD ស្តីពីមនុស្សវ័យចំណាស់សកម្ម និងកិច្ចសន្ទនារវាងសភាអាស៊ី និងអារ៉ាប់ ស្តីពីយុវជន បានបញ្ចប់ដោយដាក់ចេញនូវអនុសាសន៍រួម ដើម្បីជំរុញការអនុវត្តសកម្មភាពកម្មវិធី ICPD30 និងរបៀបវារៈឆ្នាំ២០៣០។
វេទិកាសមាជិកសភា AFPPD ទទួលស្គាល់នូវ (១) សារៈសំខាន់នៃការប្រមូល និងវិភាគព័ត៌មានសម្រាប់តម្រូវការប្រជាសាស្រ្តដែលតែងតែផ្លាស់ប្តូរឥតឈប់ឈរ (២) ការគិតគូរពីតម្រូវការ និងបញ្ហាប្រឈមខុសគ្នារវាងក្រុមវ័យចំណាស់នៅទីប្រជុំជន និងជនបទ ស្រ្តី និងបុរស ការប្រែប្រួលអាកាសធាតុ និងជម្លោះ (៣) ការចូលរួមចំណែកដ៏ថ្លៃថ្លាមិនអាចកាត់ថ្លៃបានរបស់មនុស្សចាស់នៅក្នុងសង្គម និងសេដ្ឋកិច្ច (៤) សិទ្ធិនៅក្នុងការសម្រេចចិត្ត និងផ្តល់ព័ត៌មានគ្រប់គ្រាន់អំពីសុខភាពតាំងពីនៅដំណាក់កាលដំបូង និង (៥)បង្កើតគោលនយោបាយដែលគិតគូរ និងបង្កលក្ខណៈអំណោយផលដល់អន្តរទំនាក់ទំនង និងសាមគ្គីភាព រវាងក្រុមយុវវ័យ ក្រុមអាយុនៃអ្នកធ្វើការ និងមនុស្សចាស់ ដោយឈរលើមូលដ្ឋានសិទ្ធិមនុស្សជាសកល។
ក្នុងន័យនេះ សមាជិកសភានៃវេទិកាសភាអាស៊ីដើម្បីប្រជាជន និងការអភិវឌ្ឍ AFPPD បានប្តេជ្ញាចិត្តសារជាថ្មីក្នុងកិច្ចសហការជិតស្និទ្ធជាមួយដៃគូអភិវឌ្ឍន៍ អង្គការសង្គមស៊ីវិល រដ្ឋាភិបាល វេទិកាសភាអន្តរជាតិដើម្បីជំរុញការអនុវត្ត ICPD30 និងរបៀបវារៈឆ្នាំ២០៣០ ឱ្យសម្រេចតាមគោលដៅកំណត់។
ក្រោយពីបញ្ចប់កិច្ចពិភាក្សាដោយជោគជ័យ គណៈប្រតិភូសភាបានចូលរួមនៅក្នុងកម្មវិធីលៀងសាយភោជន៍នៅគេហដ្ឋាន ឯកឧត្តម ប្រធានសភាជប៉ុន។ ឆ្លៀតក្នុងឱកាសនោះ លោកជំទាវ ឡោក ខេង បានជួជួបសំណេះសំណាលការងារជាមួយរដ្ឋមន្រ្តីការបរទេសជប៉ុន រដ្ឋមន្រ្តីសង្គមកិច្ច ការងារ និងសុខាភិបាល នៃសភាជប៉ុន ឥស្សរជនឆ្នើមនៃសមាគមសភាជប៉ុនដើម្បីប្រជាជន និងគណៈប្រតិភូនៃសភាអារ៉ាប់ អាស៊ី និងប៉ាស៊ីហ្វិក ប្រមាណជាង២០ប្រទេស ព្រមទាំងតំណាងអង្គការនានាដូចជា UNFPA, IPPF, APDA, Plan international និងអង្គការអន្តរជាតិផ្សេងៗទៀត ៕
