ព្រះចៅអធិការវត្តគិរីជុំចំការខ្នុរ រៀបចំពិធីខមាទោស ស្រង់សម្អាតព្រះពុទ្ធរូប និងស្រង់ទឹកប្រគេនព្រះសង្ឃ នៅវត្តគិរីជុំចំការខ្នុរ សង្កាត់អូរអំបិល ក្រុងសិរីសោភ័ណ

ភ្នំពេញ៖ ព្រះអង្គសមណៈញាន ណាប់ ម៉ឺន ព្រះបាឡាត់គុណខេត្ត និងជាព្រះចៅអធិការវត្តគិរីជុំចំការខ្នុរ បានរៀបចំពិធីត្រស្តិសង្ក្រាន និងការធ្វើពិធីខមាទោស ស្រង់សម្អាតព្រះពុទ្ធរូប និងស្រង់ទឹកប្រគេនព្រះសង្ឃ នារសៀលថ្ងៃទី១៨ ខែមេសា ឆ្នាំ២០២៤ ធ្វើនៅវត្តគិរីជុំចំការខ្នុរ សង្កាត់អូរអំបិល ក្រុងសិរីសោភ័ណ។

ក្នុងឱកាសនោះដែរព្រះអង្គសមណៈញាន ណាប់ ម៉ឺន ព្រះចៅអធិការវត្តគិរីជុំចំការខ្នុរ បានមានសង្ឃដីកាឲ្យដឹងថា៖ សម្រាប់បុណ្យចូលឆ្នាំថ្មីប្រពៃពីជាតិខ្មែរ ឆ្នាំរោង ឆស័ក ព.ស ២៥៦៨ គ.ស២០២៤ ដែលមានរយៈពេល៤ថ្ងៃ ១៣.១៤.១៥.និង១៦ មេសា ឆ្នាំ២០២៤ វត្តគិរីជុំចំការខ្នុរបានរៀបចំពិធីត្រស្តិសង្ក្រាន និងការធ្វើពិធីខមាទោស ស្រង់សម្អាតព្រះពុទ្ធរូប និងស្រង់ទឹកប្រគេនព្រះសង្ឃគឺបញ្ចប់នៅពិធីបុណ្យចូលឆ្នាំ ឬអាចហៅបានថាលាដំណម គឺយើងអាចប្រកបមុខរបរទទួលទានរកស៊ីជាធម្មតាសម្រាប់ញាតិញោមពុទ្ធបរិស័ទ និងព្រះសង្ឃអាចនិមន្តរក្សាតាមប្រពៃណីទទួលចង្ហាន់បិណ្ឌបាតតាមគេហដ្ឋានញាតិញោមដូចធម្មតា ជាពិសេសដើម្បីជាសិរីសួស្ដី និងសុំឲ្យមានភ្លៀងធ្លាក់គ្រប់រដូវនៅក្នុងឆ្នាំនីមួយៗដើម្បីប្រកបមុខរបរកសិកម្មគ្រប់ៗគ្នា។ និងបួងសួងដល់ទេវតាឆ្នាំថ្មី ដែលនឹងយាងមកគ្រប់គ្រងអភិបាលមនុស្សលោកយើង សូមប្រោសព្រំប្រទានពរជ័យបវរមហាប្រសើរជូនដល់ប្រជាពលរដ្ឋទូទាំងព្រះរាជណាចក្រកម្ពុជាសូមជួបប្រទះតែពុទ្ធពរ និងពរប្រាំប្រការ គឺអាយុ វណ្ណ: សុខ: ពល: និងបដិភាណ: កុំបីឃ្លៀងឃ្លាតឡើយ។

ព្រះអង្គសមណៈញាន ណាប់ ម៉ឺន បានមានសង្ឃដីកា ៖ ក្រោយថ្ងៃជ័យជំនះ៧មករា១៩៧៩ និងបានបន្តខិតខំតស៊ូគ្រប់ដំណាក់កាលយកជិវិតធ្វើដើមទុនរហូតទទួលបានសន្តិភាពពេញលេញក្រោមនយោបាយឈ្នះ ឈ្នះ ដឹកនាំដោយប្រមុខរាជរដ្ឋាភិបាលកម្ពុជា ទទួលបានសន្តិភាពប្រជាពលរដ្ឋយើងមានឱកាសជួបជុំសប្បាយធ្វើបុណ្យទាន។ដូច្នេះហើយសូមបងប្អូនប្រជាពលរដ្ឋ យុវជន យុវតីយើងទាំងអស់គ្នា ត្រូវចងចាំនៅគុណបំណាច់ដ៏ធំធេងមួយនេះហើយបើគ្មានសន្តិភាពក៏គ្មានការលេង កម្សាន្ត សប្បាយ អើងកងនាពេលនេះផងដែរ។

ព្រះអង្គសមណៈញាន ណាប់ ម៉ឺន តំណាងឲ្យមន្ត្រីសង្ឃក្នុងវត្តគិរីជុំចំការខ្នុរបានធ្វើការថ្លែងអំណរអរគុណ និងប្រគេនពរដល់ព្រះមន្រ្តីសង្ឃគ្រប់ឋានានុក្រម ព្រះថេរានុថេរៈព្រះអង្គ ក៏ដូចជាឯកឧត្តម លោកជំទាវញាតិញោមពុទ្ធបរិស័ទ សប្បុរសជនទាំងអស់ ដែលតែងតែចូលរួមឧបត្ថម្ភយកចង្ហាន់បិណ្ឌបាតមកប្រគេនព្រះសង្ឃដើម្បីបាំងស្កូលឧទ្ទិសកុសលដល់ញាតិដែលបានចែកឋានទៅផងដែរ៕