សម្ដេចធិបតី ឲ្យក្រសួងធនធានទឹក សហការជាមួយស្ថាប័នពាក់ព័ន្ធ បន្តទប់ស្កាត់ ការកាប់បំផ្លាញព្រៃលិចទឹកក្នុងតំបន់៣ និងជុំវិញបឹងទន្លេសាប

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្នើឱ្យក្រសួងធនធានទឹក និងឧតុនិយមត្រូវបន្តអនុវត្តតួនាទីនិងភារកិច្ចរបស់ខ្លួន ដោយសហការជាមួយក្រសួងស្ថាប័នពាក់ព័ន្ធនិងអាជ្ញាធរមូលដ្ឋានរាជធានីខេត្ត ដើម្បីបន្តទប់ស្កាត់ ការកាប់បំផ្លាញព្រៃលិចទឹកក្នុងតំបន់៣ និងជុំវិញបឹងទន្លេសាប។

ក្នុងឱកាសអញ្ជើញបិទសន្និបាតបូកសរុបការងារ ក្រសួងធនធានទឹក និងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប ក្នុងក្របខ័ណ្ឌទូទាំងប្រទេសប្រចាំឆ្នាំ២០២៣និងលើកទិសដៅអនុវត្តឆ្នាំ២០២៤” នាថ្ងៃទី១០ ខែមេសា ឆ្នាំ២០២៤ សម្តេចធិបតីនាយករដ្ឋមន្ត្រី បានជំរុញឱ្យបញ្ចប់ការធ្វើបច្ចុប្បន្នភាពផែនទី តំបន់១តំបន់២ និងតំបន់៣នៃតំបន់ទន្លេសាប និងបោះបង្គោលព្រំ ព្រមទាំងទប់ស្កាត់រាល់ការទន្រ្ទាន កាន់កាប់ដី អាងស្តុកទឹក ដីព្រៃលិចទឹក ការចាក់ដីនិងថ្មចូលក្នុងទន្លេ ស្ទឹង អូរ បឹងបួ នៅទូទាំងប្រទេស។

សូមរម្លឹកថា កាលពីថ្ងៃទី៣០ ខែមករា ឆ្នាំ២០២៤កន្លងទៅ នៅក្នុងឱកាសបិទសន្និបាតក្រសួងកសិកម្ម រុក្ខាប្រមាញ់ និងនេសាទ សម្ដេចធិបតីនាយករដ្ឋមន្ត្រី បានដាក់ចេញគោលការណ៍ឱ្យរៀបចំដើម្បីធ្វើការងារក្នុងការគ្រប់គ្រងតំបន់បឹងទន្លេសាបដែលធ្លាប់មានបញ្ហាមុនបោះឆ្នោត និងក្រោយបោះឆ្នោត។ នៅពេលនេះ សម្ដេចធិបតី បានក្រើនរម្លឹកឱ្យ ក្រសួងធនធានទឹក និងឧតុនិយម និងស្ថាប័នពាក់ព័ន្ធត្រូវចាប់ផ្ដើមបន្តសកម្មភាពឡើងវិញដើម្បីទប់ស្កាត់បញ្ហានានាឱ្យមានប្រសិទ្ធភាព ៕