ឧត្តមសេនីយ៍ត្រី អ៊ាត តុលា អញ្ជើញដឹកនាំកិច្ចប្រជុំវឌ្ឍនភាពការងាររបស់ ស្ថានីយវិទ្យុ និងទូរទស្សន៍មហាផ្ទៃ

ភ្នំពេញ៖ នៅព្រឹកថ្ងៃទី៥ ខែមេសា ឆ្នាំ២០២៤នេះ លោកឧត្តមសេនីយ៍ត្រី អ៊ាត តុលា ប្រធានស្ថានីយវិទ្យុ និងទូរទស្សន៍មហាផ្ទៃ បានអញ្ជើញជាអធិបតីដឹកនាំកិច្ចប្រជុំវឌ្ឍនភាពការងាររបស់ ស្ថានីយវិទ្យុ និងទូរទស្សន៍មហាផ្ទៃ ដោយមានការអញ្ជើញចូលរួមពី ថ្នាក់ដឹកនាំ និងមន្ដ្រីជាច្រើនរូបទៀត ចំណុះឱ្យស្ថានីយវិទ្យុ និងទូរទស្សន៍មហាផ្ទៃ។

នាឱកាសនោះ លោកឧត្តមសេនីយ៍ត្រី អ៊ាត តុលា បានឱ្យដឹងថា កិច្ចប្រជុំក្នុងថ្ងៃនាពេលនេះ គឺដើម្បីពិនិត្យវឌ្ឍនភាពការងាររបស់ស្ថានីយវិទ្យុ និងទូរទស្សន៍មហាផ្ទៃ ហើយរួមគ្នាពិភាក្សាលើបញ្ហាប្រឈម និងលើកទិសដៅដែលត្រូវបន្តអនុវត្តទៀត។

លោកឧត្តមសេនីយ៍ត្រី ក៏បានកោតសរសើរ និងវាយតម្លៃចំពោះមន្ដ្រីទាំងអស់ បានខិតខំប្រឹងប្រែងបំពេញការងារជូនស្ថានីយវិទ្យុ និងទូរទស្សន៍មហាផ្ទៃ ប្រកបដោយប្រសិទ្ធភាពខ្ពស់។

ពាក់ព័ន្ធទៅនឹងការផ្សាយ លោកឧត្តមសេនីយ៍ត្រី បានណែនាំដល់មន្ដ្រីពាក់ព័ន្ធទាំងអស់ ត្រូវពង្រីកការផ្សាយចេញរបស់ខ្លួន ឱ្យបានយ៉ាងទូលំទូលាយ ទាំងប្រព័ន្ធបច្ចេកវិទ្យាឌីជីថល និងរលកធាតុអាកាស ដែលជាតម្រូវការឆ្លើយតបទៅនឹងសង្គមបច្ចេកវិទ្យាឌីជីថល។

ទន្ទឹមនឹងនេះ លោកឧត្តមសេនីយ៍ត្រី អ៊ាត តុលា ក៏បានផ្ដាំផ្ញើដល់ដល់ថ្នាក់ដឹកនាំ និងមន្ត្រីចំណុះស្ថានីយ៍វិទ្យុ និងទូរទស្សន៍មហាផ្ទៃទាំងអស់ ត្រូវចូលរួមអនុវត្តនូវតួនាទីភារកិច្ចឱ្យបានខ្ជាប់ខ្ជួន ជាពិសេស ត្រូវចូលរួមសាមគ្គីសហការផ្ទៃក្នុង ព្រមទាំងខិតខំយកចិត្តទុកដាក់បំពេញភារកិច្ច ដែលថ្នាក់ដឹកនាំបានប្រគល់ជូន។

សូមបញ្ជាក់ថា នាឱកាសនោះដែរ លោកឧត្តមសេនីយ៍ត្រី អ៊ាត តុលា ប្រធានស្ថានីយវិទ្យុ និងទូរទស្សន៍មហាផ្ទៃ ក៏បានប្រកាសស្ដីពី បទវិន័យនគរបាលជាតិកម្ពុជា ជូនមន្ដ្រីស្ថានីយវិទ្យុ និងទូរទស្សន៍មហាផ្ទៃ ដើម្បីលើកកម្ពស់សីលធម៌ តម្លៃ សេចក្ដីថ្លៃថ្នូរ ឧត្តមភាព កិត្យានុភាព ជំនឿទុកចិត្ត ព្រមទាំងណែនាំតម្រង់ទិសដល់មន្ដ្រីនគរបាលជាតិ ឱ្យប្រព្រឹត្តអំពើល្អ៕