ឯកឧត្តម ឃួង ស្រេង និងលោកជំទាវ ចុះសួរសុខទុក្ខ នាយ-ពលទាហាន កងពលធំអន្តរាគមន៍លេខ៣ កងពលតូចអន្តរាគមន៍លេខ១២៨ លេខ៩ និងនាយ-ពលនគរបាល វរសេនាតូចនគរបាលការពារព្រំដែនគោកលេខ៧៩៣
ភ្នំពេញ៖ នៅព្រឹកថ្ងៃទី ១ ខែមេសា ឆ្នាំ២០២៤ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកជំទាវ ព្រមទាំងគណៈប្រតិភូ អញ្ជើញចុះមកសំណេះសំណាលសួរសុខទុក្ខ ដល់នាយ-ពលទាហាន កងពលធំអន្តរាគមន៍លេខ៣ កងពលតូចអន្តរាគមន៍លេខ១២៨ កងពលតូចអន្តរាគមន៍លេខ៩ និងនាយ-ពលនគរបាល វរសេនាតូចនគរបាលការពារព្រំដែនគោកលេខ៧៩៣ ក្នុងឱកាសអបអរសាទរ ពិធីបុណ្យចូលឆ្នាំ ប្រពៃណីជាតិខ្មែរ នាថ្ងៃខាងមុខ ឆ្នាំរោង ឆស័ក ព.ស.២៥៦៨ នៅវរសេនាតូចអន្តរាគមន៍២៨៣ កងពលតូចអន្តរាគមន៍លេខ១២៨ យោធភូមិភាគទី១ និងបាននាំយកអំណោយជា ថវិកា សម្ភារ គ្រឿងឧបភោគបរិភោគ មួយចំនួនធំផងដែរ។
ឧត្តមសេនីយ៍ទោ មៀច សាមុត មេបញ្ជាការកងពល បានសម្ដែងនូវមនោសញ្ចេតនា រំភើបរីករាយក្រៃលែង និងសូមគោរពស្វាគមន៍យ៉ាងកក់ក្តៅជាទីបំផុតចំពោះ ឯកឧត្តម អភិបាល នៃគណអភិបាលរាជធានីភ្នំពេញ និងគណៈប្រតិភូ ដែលតែងតែយកចិត្តទុកដាក់ រួមសុខរួមទុក្ខ គិតគូរពីទុក្ខលំបាករបស់កងកម្លាំងប្រដាប់អាវុធ ព្រមទាំងបានចូលរួមចំណែកជួយឧបត្ថម្ភគាំទ្រ ដល់អង្គភាពយើងខ្ញុំទាំងស្មារតី សម្ភារ ថវិកា ដែលសបញ្ជាក់ឲ្យឃើញយ៉ាងច្បាស់ ពីការអាណិតស្រលាញ់ ការយកចិត្តទុកដាក់ ការរួមសុខរួមទុក្ខ ការផ្សារភ្ជាប់គ្នាយ៉ាងជិតស្និទ្ធ រវាងសមរភូមិមុខ និងសមរភូមិក្រោយ រវាងមន្ត្រីរាជការស៊ីវិល ជាមួយកងកម្លាំងប្រដាប់អាវុធគ្រប់ប្រភេទ ស្របតាមគោលនយោបាយដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រមុខដឹកនាំដ៏ខ្ពង់ខ្ពស់បំផុតនៃយើងទាំងអស់គ្នា។
លោកមេបញ្ជាការកងពល បានគោរពថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកជំទាវ ព្រមទាំងគណៈប្រតិភូ អមដំណើរ ដែលបានយកចិត្តទុកដាក់ និងបានជួយឧបត្ថម្ភគាំទ្រ ដល់អង្គភាពយើងខ្ញុំនាឱកាសនេះ និងសូមគោរពជូនពរ ឯកឧត្តម អធិបតី គណៈអធិបតី ភ្ញៀវកិត្តិយស ព្រមទាំងនាយទាហាន នាយទាហានរង និងពលទាហានទាំងអស់ សូមមានសុខភាពល្អបរិបូរណ៍ ។
ក្នុងឱកាសចុះសួរសុខទុក្ខនេះដែរ ឯកឧត្តម អភិបាល នៃគណៈអភិបាលរាជធានីភ្នំពេញ និងលោកជំទាវ បាននាំយកអំណោយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ផ្តល់ជូនអង្គភាពជាសម្ព័ន្ធមេត្រីភាព រួមមាន៖
១. កងពលធំអន្តរាគមន៍លេខ៣ មាន (ថវិកា ប្រេងម៉ាស៊ូត ស៊ីម៉ង់តិ៍ ដែក មី ត្រីខ ប្រេងឆា ទឹកត្រី.ស៊ីអ៊ីវ ទឹកសុទ្ធ និងជេលសាងដៃ)។
២. កងពលតូចអន្តរាគមន៍លេខ១២៨ យោធភូមិភាគទី១ មាន (ថវិកា ប្រេងម៉ាស៊ូត ត្រាក់ទ័រ ម៉ាស៊ីនថតរូប មី ត្រីខ ប្រេងឆា ទឹកត្រី.ស៊ីអ៊ីវ ទឹកសុទ្ធ និងជេលសាងដៃ)។
៣. កងពលតូចអន្តរាគមន៍លេខ៩ មាន (ថវិកា ប្រេងម៉ាស៊ូត ស៊ីម៉ង់តិ៍ ដែក មី ត្រីខ ប្រេងឆា ទឹកត្រី.ស៊ីអ៊ីវ ទឹកសុទ្ធ និងជេលសាងដៃ)។
៤. វរសេនាតូចនគរបាលការពារព្រំដែនគោកលេខ៧៩៣ មាន (ថវិកា ប្រេងម៉ាស៊ូត ស៊ីម៉ង់តិ៍ សង្ក័សី មី ត្រីខ ប្រេងឆា ទឹកត្រី.ស៊ីអ៊ីវ ទឹកសុទ្ធ និងជេលសាងដៃ)។ និងបានឧបត្ថម្ភថវិកាមួយចំនួនដល់អង្គភាព អាជ្ញាធរដែនដី និងវត្តក្នុងភូមិសាស្ត្រជិតកងពល និង ក្នុងស្រុកសៀមប៉ាង ខេត្តស្ទឹងត្រែង៕
