កម្ពុជាដាក់ឲ្យដំណើរការស្ថានីយ៍វាស់វិទ្យុសកម្ម ដើម្បីសុវត្ថិភាព ការពារបរិស្ថាន និងប្រជាពលរដ្ឋ

ភ្នំពេញ៖ កម្ពុជាដាក់ឲ្យដំណើរការស្ថានីយ៍វាស់វិទ្យុសកម្មក្នុងបរិយាកាសប្រភេទ នៃការជំរុញការប្តេជ្ញាចិត្តចំពោះសុវត្ថិភាពនុយក្លេអ៊ែរ ការការពារបរិស្ថាន និងការពារប្រជាពលរដ្ឋ ពីផលប៉ះពាល់ដ៏គ្រោះថ្នាក់នៃវិទ្យុសកម្ម ក្នុងករណីគ្រោះថ្នាក់នុយក្លេអ៊ែរ ឬគ្រោះអាសន្ន វិទ្យុសកម្មដែលកើតឡើងនៅក្នុងតំបន់។

ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានលើកឡើងនៅក្នុងពិធីប្រគល់ និងការដាក់ឲ្យដំណើរការស្ថានីយ៍វាស់វិទ្យុ សកម្មក្នុងបរិយាកាសប្រភេទ នៅថ្ងៃទី១៤ ខែមីនា ឆ្នាំ២០២៤ នេះថា ការប្រគល់ និងការដាក់ឲ្យដំណើរការស្ថានីយ៍វាស់វិទ្យុសកម្ម នេះ គឺជាព្រឹត្តិការណ៍ដ៏សំខាន់ និងជាចំណុចកំពូលសម្រាប់កម្ពុជានៃដំណើរការវិវឌ្ឍន៍ទៅមុខ។

បញ្ហានេះ ឯកឧត្តមរដ្ឋមន្ត្រីទទួលស្គាល់ថា សម្ភារៈ និងបច្ចេកវិទ្យានុយក្លេអ៊ែរ រួមទាំងវិទ្យុសកម្មប្រភេទ បានផ្តល់អត្ថប្រយោជន៍យ៉ាងសំខាន់ ប៉ុន្តែក៏បង្ករហានិភ័យយ៉ាងច្រើន ផងដែរ បច្ចេកវិទ្យាទាំងនេះ មានសក្តានុពលក្នុងការផ្តល់អត្ថប្រយោជន៍ដល់មនុស្សជាតិ តាមវិធីជាច្រើន រហូតដល់ការផលិតថាមពល ហើយវាក៏នាំមកនូវបញ្ហាប្រឈម នៃការទប់ស្កាត់គ្រោះថ្នាក់ និងគ្រោះអាសន្នផងដែរ។

ឯកឧត្តមរដ្ឋមន្ត្រី បានបន្តថា បញ្ហានេះ ទោះបីជាកម្ពុជាមិនមានរោងចក្រថាមពលនុយក្លេអ៊ែរក៏ដោយ តែការបង្កើតស្ថានីយ៍ទាំងនេះ នៅកម្ពុជា គឺជាការជំរុញប្តេជ្ញាចិត្តចំពោះសុវត្ថិភាពនុយក្លេអ៊ែរ ការការពារបរិស្ថាន និងការពារប្រជាពលរដ្ឋរបស់យើង ពីផលប៉ះពាល់ដ៏ គ្រោះថ្នាក់នៃវិទ្យុសកម្ម ក្នុងករណីគ្រោះថ្នាក់នុយក្លេអ៊ែរ ឬគ្រោះអាសន្នវិទ្យុសកម្មកើតឡើងនៅក្នុងតំបន់។ ជាមួយនឹងការកើនឡើងនៃ ការប្រើប្រាស់បច្ចេកវិទ្យានុយក្លេអ៊ែរ និងសក្តានុពលសម្រាប់ការប៉ះពាល់នឹងវិទ្យុសកម្មនេះ យើងត្រូវតែមានហេដ្ឋារចនាសម្ព័ន្ធចាំបាច់ ដើម្បីតាមដាន និងវាយតម្លៃកម្រិតវិទ្យុសកម្មនៅក្នុងតំបន់ជុំវិញប្រទេសយើង។

ជុំវិញគម្រោងខាងលើនេះ ឯកឧត្តមរដ្ឋមន្ត្រី បានថ្លែងនូវការអរគុណចំពោះសហភាពអឺរ៉ុប សម្រាប់ការចែករំលែកបទពិសោធ ន៍ដ៏សន្ធឹកសន្ធាប់ ក្នុងការអភិវឌ្ឍន៍ និងការប្រើប្រាស់បណ្តាញត្រួតពិនិត្យវិទ្យុសកម្មព្រមានជាមុន វេទិកាផ្លាស់ប្តូរទិន្នន័យ និងសម្រាប់ ការគាំទ្រផ្នែកហិរញ្ញវត្ថុ និងបច្ចេកទេសលើគម្រោងនេះក្នុងប្រទេសកម្ពុជា ព្រមទាំងបានថ្លែងអំណរគុណចំពោះ ASEANTOM ដែលសម្របសម្រួលការផ្លាស់ប្តូរចំណេះដឹង ទាក់ទងនឹងនុយក្លេអ៊ែរ និងការអនុវត្តដ៏ល្អបំផុតផងដែរ និង Scienta ENVINET សម្រាប់ការផ្តល់ឧបករណ៍ ដែលផ្តល់ថាមពលដល់បណ្តាញត្រួតពិនិត្យជាតិ វិទ្យុសកម្មព្រមានជាមុន និងដល់សហការី ដែលខិតខំ ប្រឹងប្រែងនៅក្រសួងរ៉ែ និងថាមពល និងស្ថាប័នផ្សេងទៀត សម្រាប់ការងាររបស់ពួកគេក្នុងការជំរុញកម្មវិធីនេះ ៕