មន្ត្រីក្រសួងបរិស្ថាន និងអគ្គរាជទូតន័រវែសប្រចាំអាស៊ាន ទស្សនកិច្ចទៅបឹងទន្លេសាប ដើម្បីស្វែងយល់ពីបញ្ហាការបំពុលប្លាស្ទិក

ភ្នំពេញ៖ នៅថ្ងៃទី៥ ខែមីនា ឆ្នាំ២០២៤ ឯកឧត្តម ប៉ាក សុខារ៉ាវុត អនុរដ្ឋលេខាធិការ ក្រសួងបរិស្ថាន និងឯកឧត្តម Kjell Tormod Pettersen អគ្គរាជទូតនៃព្រះរាជាណាចក្រន័រវែសប្រចាំអាស៊ាន បានធ្វើការទស្សនកិច្ចទៅសហគមន៍កំពង់ឃ្លាំង តំបន់ប្រើប្រាស់ច្រើនយ៉ាងបឹងទន្លេសាប។

ការទស្សនកិច្ចមានការចូលរួមពី ឯកឧត្តម គឹម ណុង អគ្គនាយកនៃអគ្គនាយកដ្ឋានតំបន់ការពារធម្មជាតិ នាយកដ្ឋានចំណុះឱ្យអគ្គនាយកដ្ឋានតំបន់ការពារធម្មជាតិ នាយកដ្ឋានសេដ្ឋកិច្ចបៃតង នាយកដ្ឋានគ្រប់គ្រងសំណល់រឹង នាយកដ្ឋានគ្រប់គ្រងគុណភាពទឹក នាយកដ្ឋានព័ត៌មាននិងផ្សព្វផ្សាយបរិស្ថាន មន្ទីរបរិស្ថានខេត្តសៀមរាប អាជ្ញាធរមូលដ្ឋាន អង្គការដៃគូដូចជា CSEAS, NIVA, Wild Earth Allies, GIZ វិទ្យាស្ថានបច្ចេកវិទ្យាកម្ពុជា សាកលវិទ្យាល័យភូមិន្ទកសិកម្ម និងមូលនិធិទំពាំងស្នងឬស្សី សរុបចំនួន ៦០នាក់។

ដំណើរទស្សនកិច្ចនេះរៀបចំឡើងក្នុងគោលបំណងស្វែងយល់ពីបញ្ហាការបំពុលដោយប្លាស្ទិកនៅទន្លេសាប និងការងារអាទិភាពចំពោះយុទ្ធនាការផ្ទៃទឹកស្អាត កាត់បន្ថយការបំពុលក្នុងផ្ទៃទឹក ដើម្បីសុខភាពប្រជាជន ដែលទើបនឹងប្រកាសចាប់ផ្តើមដោយក្រសួងបរិស្ថាន នាថ្ងៃទី០១ ខែមីនា ឆ្នាំ២០២៤។

ក្នុងអំឡុងពេលទស្សនកិច្ចនេះ ឯកឧត្តម ប៉ាក សុខារ៉ាវុត អនុរដ្ឋលេខាធិការក្រសួងបរិស្ថាន និងឯកឧត្តម Kjell Tormod Pettersen អគ្គរាជទូតនៃព្រះរាជាណាចក្រន័រវែសប្រចាំអាស៊ាន និងអ្នកចូលរួមទាំងអស់បានចូលរួមយុទ្ធនាការ «ថ្ងៃនេះយើងមិនប្រើប្លាស្ទិក» ដែលមានលោកគ្រូ អ្នកគ្រូ និងសិស្សានុសិស្សចូលរួមចំនួន ៥៥០នាក់។

ឯកឧត្តម Kjell Tormod Pettersen អគ្គរាជទូតនៃព្រះរាជាណាចក្រន័រវែសប្រចាំអាស៊ាន កោតសរសើរពីភាពជោគជ័យ នៃយុទ្ធនាការ «ថ្ងៃនេះយើងមិនប្រើប្លាស្ទិក» និងថ្លែងអំណរគុណចំពោះការចូលរួមរបស់សិស្សានុសិស្សក្នុងការសំអាតបរិស្ថាន ជាពិសេសសំណល់ប្លាស្ទិក។

ដំណើរទស្សនកិច្ចនេះរៀបចំឡើងបន្ទាប់ពីកិច្ចប្រជុំចាប់ផ្តើមអនុវត្តកិច្ចសហប្រតិបត្តិការអាស៊ាន-ន័រវែសក្នុងការពង្រឹងសមត្ថភាពមូលដ្ឋានសម្រាប់កាត់បន្ថយការបំពុលដោយប្លាស្ទិកនៅតំបន់អាស៊ាន (ASEANO 2)៕