បងប្អូនប្រជាពលរដ្ឋខ្មែរនៅអូស្ត្រាលីច្រើនកុះករ ស្វាគមន៍សម្តេចធិបតី និងលោកជំទាវបណ្ឌិត ប្រកបដោយភាពស្និទ្ធស្នាល
ម៉ែលប៊ន៖ បន្ទាប់ពីហោះរយៈពេលជា១០ម៉ោង នៅវេលាម៉ោងប្រមាណ៥ទៀបភ្លឺថ្ងៃសៅរ៍ ទី២ ខែមីនា ឆ្នាំ២០២៤ ម៉ោងនៅកម្ពុជា ត្រូវនឹងម៉ោងប្រមាណ៩ព្រឹក ម៉ោងនៅទីក្រុងម៉ែលប៊ន ប្រទេសអូស្ត្រាលី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានដឹកនាំគណៈប្រតិភូជាន់ខ្ពស់របស់កម្ពុជា អញ្ជើញដល់ប្រទេសអូស្ត្រាលី ប្រកបដោយសុខសុវត្ថិភាព។
ដំណើរអញ្ជើញដល់អាកាសយានដ្ឋានអន្តរជាតិម៉ែលប៊ន សម្តេចធិបតី និងលោកជំទាវបណ្ឌិត ទទួលបានការស្វាគមន៍ប្រកបដោយភាពកក់ក្តៅពីសំណាក់លោក Tim Watts ឧបការីរដ្ឋមន្ត្រីការបរទេសអូស្ត្រាលី និងឯកអគ្គរាជទូតខ្មែរប្រចាំនៅអូស្ត្រាលី។
ដោយឡែកនៅឯកសណ្ឋាគារកន្លែងសម្តេចធិបតី និងលោកជំទាវបណ្ឌិតស្នាក់នៅឯណោះវិញ ប្រជាពលរដ្ឋ និងនិស្សិតខ្មែរ ដែលកំពុងរស់នៅ ធ្វើការ និងសិក្សារៀនសូត្រក្នុងប្រទេសអូស្ត្រាលី និងណូវែលហ្សេឡង់ជាច្រើននាក់ បានចេញមកទទួល និងស្វាគមន៍សម្តេចធិបតី និងលោកជំទាវបណ្ឌិតដោយផ្ទាល់។
ប្រជាពលរដ្ឋ និងនិសិត្សខ្មែរ បានសម្តែងក្តីសោមនស្សរីករាយ ប្រកបដោយក្តីនឹករលឹក និងគោរពស្រឡាញ់យ៉ាងជ្រាលជ្រៅចំពោះសម្តេចធិបតី និងលោកជំទាវ។ ក្នុងឱកាសនោះ ក្រៅពីការបង្ហាញក្តីនឹករលឹក សម្តេចធិបតី និងលោកជំទាវបណ្ឌិត បានអនុញ្ញាតឱ្យប្រជាពលរដ្ឋបានថតរូបជាអនុស្សាវរីយ៍ ប្រកបដោយក្តីស្និទ្ធស្នាលជាទីបំផុត៕
