សម្តេចធិបតី ស្នើឱ្យក្រសួងមុខងារសាធារណៈ រៀបចំមន្រ្ដីកិច្ចសន្យាដែលមានជំនាញ និងសញ្ញាបត្រ ត្រូវធ្វើឱ្យស្មើភាពជាមួយមន្រ្ដីរាជការមានក្របខ័ណ្ឌ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្នើឱ្យឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ រៀបចំមន្រ្ដីកិច្ចសន្យាដែលមានជំនាញ និងសញ្ញាបត្រ ត្រូវធ្វើឱ្យស្មើភាពជាមួយមន្រ្ដីរាជការមានក្របខ័ណ្ឌ ដើម្បីទទួលបានធនធានមនុស្ស ដែលមានសមត្ថភាពពិតប្រាកដ មកបំពេញការងារឱ្យមានប្រសិទ្ធភាព និងប្រសិទ្ធផល។

ក្នុងឱកាសអញ្ជើញ ប្រកាសជ័យលាភីអង្គភាពផ្ដល់សេវាសាធារណៈគំរូ ក្នុងវិស័យអប់រំ និងសុខាភិបាល ឆ្នាំ២០២៣ នាថ្ងៃទី២២ កុម្ភៈ ២០២៤នេះ សម្ដេចធិបតី នាយករដ្ឋមន្ត្រី បានស្នើឱ្យកែនិយមន័យមន្ត្រីជាប់កិច្ចសន្យា (មន្ត្រី ជួលដោយរដ្ឋ, ជួលតាមកិច្ចសន្យា, មន្ត្រីមិនពេញសិទ្ធិដូចមន្ត្រីរាជការ) ពីត្រឹមតែជាមន្ត្រីជំនួយការទៅជាមន្ត្រីបច្ចេកទេស ដែលមានសញ្ញាបត្រខ្ពស់ មានជំនាញបច្ចេកទេសច្រើន ដើម្បីចូលរួមជួយរដ្ឋាភិបាល ដោយទទួលបានប្រាក់ខែ និងអត្ថប្រយោជន៍នានា ដូចមន្ត្រីរាជការពេញសិទ្ធិដែរ។

សម្តេចធិបតី ក៏បានណែនាំឱ្យរៀបចំក្របខ័ណ្ឌនយោបាយ លើមន្រ្ដីកិច្ចសន្យាជំនាញ ដែលមានជំនាញ និងសញ្ញាបត្រជាន់ខ្ពស់ ដើម្បីផ្ដល់ និងបើកឱកាសឱ្យពួកគាត់អាចមក បំពេញការងាររបស់រដ្ឋក្នុងកន្លែងណាមួយ សម្រាប់ជួយលើកកម្ពស់ស្ថាប័នជាតិឱ្យកាន់តែរីកចម្រើន ៕