កងកម្ទេចគ្រឿងផ្ទុះលេខ៩៨ បានធ្វើមាតុភូមិនិវត្តន៍មកដល់មាតុភូមិដោយសុវត្ថិភាព

ភ្នំពេញ៖ នាល្ងាចថ្ងៃទី២០ ខែកុម្ភៈ ឆ្នាំ២០២៤ កងកម្ទេចគ្រឿងផ្ទុះលេខ៩៨ បានបំពេញបេសកកម្មដោយជោគជ័យនៅសាធារណរដ្ឋអាហ្វ្រិកកណ្តាល និងបានធ្វើមាតុភូមិនិវត្តន៍ដល់ព្រះរាជាណាចក្រកម្ពុជាវិញដោយសុខសុវត្ថិភាព ក្រោមអធិបតីភាពទទួលដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានទី១គណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព។

កងកម្ទេចគ្រឿងផ្ទុះលេខ៩៨ ជាកងថ្មីមួយ ដែលបានបញ្ជូនទៅបំពេញបេសកកម្មរក្សាសន្តិភាព ក្រោមឆ័ត្រអង្គការសហប្រជាតិ នៅសាធារណរដ្ឋអាហ្រ្វិកកណ្តាលកាលពីថ្ងៃទី២១ ខែកុម្ភៈ ឆ្នាំ២០២៣។ កងនេះ មានកម្លាំងសរុប ៩៨នាក់ ក្នុងនោះនារី ១០នាក់ ក្រោមការដឹកនាំរបស់ វរសេនីយ៍ឯក កឹម បូរ៉ានី មេបញ្ជាការនារីដំបូងរបស់កម្ពុជាក្នុងបេសកកម្ម។ មិនខុសពីកងឯទៀត កងកម្ទេចគ្រឿងផ្ទុះលេខ៩៨ បានបំពេញតួនាទីភារកិច្ចយ៉ាងសស្រាក់សស្រាំ ប្រកបដោយប្រសិទ្ធភាពដូចកងមុនៗដែរ ជាពិសេសបានចូលរួមក្នុងការកសាងហេដ្ឋារចនាសម្ព័ន និងរួមចំណែកលើកកម្ពស់វិស័យអប់រំនៅសាធារណរដ្ឋអាហ្រ្វិកកណ្តាល តាមរយៈការជួយសាងសង់សាលារៀន ផ្តល់សម្ភារៈសិក្សា និងរៀបចំបណ្ណាល័យផងដែរ។

នាឱកាសនេះដែរ ឯកឧត្តម នាយឧត្តមសេនីយ៍ សែម សុវណ្ណនី បានពាំនាំពាក្យពេចន៍ផ្តាំផ្ញើសួរសុខទុក្ខពីសំណាក់ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ឯកឧត្តម នាយកឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា និងឯកឧត្តម សុខ ចិន្តាសោភា រដ្ឋមន្រ្តីក្រសួងការបរទេស និង សហប្រតិបត្តិការអន្តរជាតិ និងជាប្រធានគណៈកម្មាធិការជាតិ។

គួរបញ្ជាក់ផងដែរថា រយៈពេល១៨ឆ្នាំមកនេះ កម្ពុជា បានបញ្ជូនកងកម្លាំងសរុប ៩៤៦៥ នាក់ ក្នុងនោះ នារី ៨០១នាក់ ទៅកាន់១២បេសកកម្ម ក្នុង ១០ប្រទេស រួមមាន សាធារណរដ្ឋស៊ូដង់ ស៊ូដង់ខាងត្បូង ឆាដ លីបង់ សាយប្រើស ស៊ីរី អាហ្វ្រិកកណ្តាល ម៉ាលី យ៉េមែន និងសាធារណរដ្ឋប្រជាធិបតេយ្យកុងហ្គោ។ បច្ចុប្បន្ន កម្លាំងកម្ពុជាកំពុងបំពេញបេសកកម្មមានចំនួន ៦៤០នាក់ ក្នុងនោះនារី ១១៩នាក់ ក្នុងប្រទេសចំនួន៥ រួមមាន៖ ស៊ូដង់ខាងត្បូង លីបង់ ម៉ាលី អាហ្វិ្រកកណ្តាល និងសាធារណរដ្ឋប្រជាធិបតេយ្យកុងហ្គោ ៕