ឯកឧត្ដម ស្វាយ សំអ៊ាង៖ ក្រោមការដឹកនាំរបស់សម្ដេចធិបតី ហ៊ុន ម៉ាណែត កម្ពុជាក្លាយទៅជាប្រទេសដែលមានចំណូលខ្ពស់ នៅឆ្នាំ២០៥០

ភ្នំពេញ៖ ឯកឧត្ដម ស្វាយ សំអ៊ាង អភិបាលខេត្ត និងជាសមាជិកគណៈកម្មាធិការកណ្តាល និងប្រធានគណៈកម្មាធិការគណបក្សខេត្តស្ទឹងត្រែង បានបញ្ជាក់ថា ក្រោមការដឹកនាំដ៏ឈ្លាសវៃ និងប៉ិនប្រសព្វរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា កម្ពុជាក្លាយទៅជាប្រទេសដែលមានចំណូលខ្ពស់ ឬប្រទេសអ្នកមាន នៅឆ្នាំ២០៥០។

ឯកឧត្ដមបានបញ្ជាក់បែបនេះ ក្នុងឳកាសអញ្ជើញក្នុងកិច្ចប្រជុំឃោសនាបោះឆ្នោតជាមួយសមាជិក សមាជិកានៃអង្គបោះឆ្នោត សម្រាប់ការបោះឆ្នោតជ្រើសតាំងសមាជិកព្រឹទ្ធសភា អាណត្តិទី៥ ឆ្នាំ២០២៤ នៅគណៈបក្សស្រុកបុរីអូរស្វាយសែនជ័យ កាលពីថ្ងៃទី១៧ ខែកុម្ភៈ ឆ្នាំ២០២៤។

ឯកឧត្ដមស្វាយ សំអ៊ាង បានអះអាងថា ការប្រែក្លាយកម្ពុជាទៅជាប្រទេសដែលមានចំណូលខ្ពស់ ឬប្រទេស អ្នកមាននៅឆ្នាំ២០៥០ គឺជាចក្ខុវិស័យរយៈពេល២៥ឆ្នាំទៅមុខ របស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចធិបតី ហ៊ុន ម៉ាណែត ដែលបានកំណត់នៅក្នុងយុទ្ធសាស្ដ្របញ្ចកោណ។

ឯកឧត្ដមលើកឡើងថា ចាប់ពីពេលនេះទៅ កម្ពុជាត្រូវបោះជំហានចំនួន២ គឺឆ្នាំ២០៣០ ក្លាយទៅជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ក្លាយទៅជាប្រទេសដែលមានចំណូលខ្ពស់តែម្ដង។

ឯកឧត្ដម បានលើកនូវអំណះអំណាងមួយចំនួន ដែលរាជរដ្ឋាភិបាលកម្ពុជា ហ៊ានកំណត់បែបនេះ ពោលដោយសាររាជរដ្ឋាភិបាលកម្ពុជា នីតិកាលទី៧នេះ មានគ្រឹះដ៏រឹងមាំដែលបានកសាងឡើងដោយ សម្ដេចតេជោ ហ៊ុន សែន អតីតនាយករដ្ឋមន្ដ្រី និងបន្ដមកអ្នកជំនាន់ក្រោយដែលសុទ្ធសឹងតែជាអ្នកបន្ដវេនដ៏ខ្លាំងពូកែ ប្រកបដោយសមត្ថភាព និងមានឆន្ទៈមុះមុត។
ឯកឧត្ដម បានបង្ហាញដោយបែងចែកចំណុចសំខាន់រួមមាន៖
* ជ្រុងសេដ្ឋកិច្ច៖ សេដ្ឋកិច្ចប្រជាពលរដ្ឋមានចំណូលខ្ពស់ ប៉ុន្ដែត្រូវតែជាសេដ្ឋកិច្ចមួយដែលមានភាពធន់ រឹងមាំ បរិយាប័ន្ន។ ភាពធន់មានន័យថា សេដ្ឋកិច្ចដែលមិនងាយមានអ្វីមានប៉ះពាល់បានទេ, រឹងមាំ មានន័យថា គ្មានឥទ្ធិពលអ្វីដែលងាយនឹងផ្ដួលរលំសេដ្ឋកិច្ចកម្ពុជាបានទេ និងបរិយាប័ន្ន មានន័យថា ការបែងចែកភាគផលដល់ប្រជាពលរដ្ឋប្រកបដោយសមធម៌។

* ជ្រុងនយោបាយ៖ កម្ពុជាជារដ្ឋមួយដែលរឹតម៉ឹង សុខសន្ដិភាព ស្ថេរភាពនយោបាយ នីតិរដ្ឋ មានយុត្តិធម៌សង្គម ឯករាជ្យម្ចាស់ការ អធិបតេយ្យភាព បូរណភាពទឹកដី មានកិត្យានុភាពខ្ពស់ នៅលើឆាកអន្ដរជាតិ ហើយស្មើភាព ស្មើមុខមាត់។

* ជ្រុងសង្គមកិច្ច៖ កម្ពុជាជាប្រទេសមួយដែលប្រជាពលរដ្ឋគ្រប់រូប ទទួលបានការគាំពារពីសង្គមគ្រប់បែបយ៉ាងទាំងអស់ នៅពេលដែលពួកគាត់មានបញ្ហា ដូចកម្មវិធីគោលនយោបាយ៦ចំណុច។

* ជ្រុងបរិស្ថាន៖ ជាប្រទេសមួយដែលមានបរិយាកាសល្អ បរិស្ថានបៃតង ប្រជាពលរដ្ឋសប្បាយរីករាយជាមួយបរិស្ថានល្អ។

* ធនធានមនុស្ស៖ ជាមូលធនមនុស្សដូចក្នុងជ្រុងទី១ នៃយុទ្ធសាស្ដ្របញ្ចកោណបានបញ្ជាក់ថា ការកសាងមូលធនមនុស្ស ជាធនធានមនុស្សដែលមានកម្រិតខ្ពស់ ហើយមានចំណេះជំនាញច្បាស់លាស់យ៉ាងតិចមួយ។

ដើម្បីឈានសម្រេចបានទាំងស្រុងនូវមហិច្ឆតាទាំងអស់នេះ ក្រៅពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ឯកឧត្ដមស្វាយ សំអ៊ាង ក៏បានអំពាវនាវដល់ប្រជាពលរដ្ឋទាំងអស់ ត្រូវចូលរួមគាំទ្រដល់រាជរដ្ឋាភិបាល ដើម្បីទទួលបានជោគជ័យ៕