អគ្គនាយកដ្ឋានសវនកម្មផ្ទៃក្នុង រៀបចំកិច្ចប្រជុំត្រួតពិនិត្យ លើប្រធានបទពិភាក្សា និងទម្រង់របាយការណ៍ លទ្ធផលការងារឆ្នាំ២០២៣ និងលើកទិសដៅការងារបន្ត
ភ្នំពេញ៖ នាព្រឹកថ្ងៃចន្ទ ៣កើត ខែមាឃ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១២ ខែកុម្ភៈ ឆ្នាំ២០២៤ អគ្គនាយកដ្ឋានសវនកម្មផ្ទៃក្នុង បានរៀបចំកិច្ចប្រជុំត្រួតពិនិត្យ លើប្រធានបទពិភាក្សា និងទម្រង់របាយការណ៍ លទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងមហាផ្ទៃ ដើម្បីផ្តល់ធាតុចូល លើផ្នែកអគ្គនាយកដ្ឋានសវនកម្មផ្ទៃក្នុង ក្រោមអធិបតីភាពដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ដោយមានការអញ្ជើញចូលរួមពី ឯកឧត្តម អគ្គនាយករង និងប្រធាននាយកដ្ឋានទាំង៤ចំណុះអគ្គនាយកដ្ឋាន។
ជាកិច្ចចាប់ផ្តើម ឯកឧត្តម ឧត្តមសេនីយ៍ឯក អគ្គនាយក បានមានមតិស្វាគមន៍ ជូនចំពោះថ្នាក់ដឹកនាំដែលបានចូលរួមក្នុងកិច្ចប្រជុំនាវេលានេះ ក្នុងស្មារតីទទួលខុសត្រូវ ព្រមទាំងកោតសសើរលើការខិតខំបំពេញតួនាទីភារកិច្ច ដែលជាជោគជ័យជូនអង្គភាពនាពេលកន្លងមក។
ជាកិច្ចបន្ទាប់ ឯកឧត្តម ឧត្តមសេនីយ៍ឯក អគ្គនាយក បានផ្តល់ជូនថ្នាក់ដឹកនាំក្នុងអង្គប្រជុំលើកយោបល់អំពីបញ្ហាប្រឈម និងដំណោះស្រាយ ដើម្បីជាធាតុចូល លើប្រធានបទពិភាក្សា និងទម្រង់របាយការណ៍ លទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងមហាផ្ទៃ។
ឆ្លៀតក្នុងឱកាសនោះដែរ ឯកឧត្តមក៏បានបន្តជំរុញ ក្នុងការចុះបំពេញបេសកកម្មចុះធ្វើសវនកម្ម ក្នុងរយៈពេលឆាប់ៗនេះ ស្របតាមផែនការសកម្មភាពប្រចាំឆ្នាំ២០២៤ ៕
