ក្រសួងសុខាភិបាល៖ ចំនួនអ្នកស្លាប់ជិត២៨,០០០នាក់ នៅហ្គាហ្សា ក្នុងការវាយប្រហាររបស់អ៊ីស្រាអែល

តេហេរ៉ង់៖ ក្រសួងសុខាភិបាលហ្គាហ្សាបានឲ្យដឹងកាលពីថ្ងៃសុក្រថា ចំនួនអ្នកស្លាប់របស់ជនជាតិប៉ាឡេស្ទីនពីការវាយប្រហារបន្តរបស់អ៊ីស្រាអែលនៅតំបន់ហ្គាហ្សាស្ទ្រីប បានកើនឡើងដល់ ២៧,៩៤៧នាក់ហើយ។

នៅក្នុងសេចក្តីថ្លែងការណ៍មួយ ក្រសួងបានបន្តថា ជនជាតិប៉ាឡេស្ទីនចំនួន ៦៧,៤៥៩នាក់បានរងរបួសនៅក្នុងតំបន់ឆ្នេរ ចាប់តាំងពីការផ្ទុះឡើងនៃជម្លោះអ៊ីស្រាអែល និងក្រុមហាម៉ាស់នៅក្នុងខែតុលាឆ្នាំមុន។

ក្រសួងបន្ថែមថា កងកម្លាំងអ៊ីស្រាអែលបានសម្លាប់ជនជាតិប៉ាឡេស្ទីន ១០៧នាក់ និងរបួស ១៤២នាក់ ក្នុងរយៈពេល ២៤ម៉ោងចុងក្រោយនេះ ដោយកត់សម្គាល់ថា ជនរងគ្រោះមួយចំនួននៅតែស្ថិតនៅក្រោមគំនរបាក់បែក ចំពេលមានការទម្លាក់គ្រាប់បែកយ៉ាងធ្ងន់ធ្ងរ និងកង្វះកងការពារស៊ីវិល និងក្រុមរថយន្តសង្គ្រោះ។

ប្រភពសន្តិសុខប៉ាឡេស្ទីន បានឲ្យដឹងថា យន្តហោះអ៊ីស្រាអែលបានបើកការវាយឆ្មក់ជាបន្តបន្ទាប់សំដៅទៅលើផ្ទះជាច្រើននៅក្នុងសង្កាត់នៃទីក្រុង Gaza រួមមាន al-Rimal, al-Sabra, al-Zaytoun, Tal al-Hawa, និង Sheikh Ajlin។

ប្រភពបានប្រាប់ Xinhua ថា រថយន្តសង្គ្រោះមិនអាចទៅដល់ទីតាំងគោលដៅបានទេ ដោយសារការទម្លាក់គ្រាប់បែកពីលើអាកាស និងកាំភ្លើងធំរបស់អ៊ីស្រាអែល និងការវាយប្រហារដោយយន្តហោះគ្មានមនុស្សបើកលើអ្វីគ្រប់យ៉ាងដែលផ្លាស់ទីនៅក្នុងតំបន់ទាំងនោះ។

ប្រភពវេជ្ជសាស្ត្របានឲ្យដឹងថា ទន្ទឹមនឹងនេះដែរ យ៉ាងហោចណាស់ជនជាតិប៉ាឡេស្ទីន ០៨នាក់ត្រូវបានសម្លាប់នៅក្នុងការបំផ្ទុះគ្រាប់បែកដែលបានកំណត់គោលដៅផ្ទះពីរនៅ Rafah ដែលជាទីក្រុង Gazan ភាគខាងត្បូងបំផុត។

យោងតាមក្រុមគ្រូពេទ្យ នៅទីក្រុង Khan Younis ដែលជាទីក្រុងធំជាងគេនៅភាគខាងត្បូង តំបន់ Gaza បុរសវ័យក្មេងជាច្រើននាក់ត្រូវបានសម្លាប់ដោយសារការបាញ់កាំភ្លើងធំបន្តរបស់អ៊ីស្រាអែល ខណៈដែលយុវជនម្នាក់ទៀត និងបុរសចំណាស់ម្នាក់ត្រូវបានសម្លាប់ដោយគ្រាប់កាំភ្លើងរបស់កងកម្លាំងអ៊ីស្រាអែល នៅក្បែរមន្ទីរពេទ្យ Nasser ក្នុងទីក្រុង។

គួរបញ្ជាក់ផងដែរថា ជនជាតិប៉ាឡេស្ទីនជាច្រើននាក់បានស្លាប់ និងមួយចំនួនទៀតរងរបួស ដោយសារយន្តហោះអ៊ីស្រាអែលទម្លាក់គ្រាប់បែកលើផ្ទះមួយខ្នងក្នុងទីក្រុង Deir el-Balah កណ្តាលទីក្រុងហ្គាហ្សា។

ប្រភព៖ Mehr News

ប្រែសម្រួលដោយ៖ ឡាយ លីហួ