បរទេស៖ អ៊ុយក្រែនអាចចុះហត្ថលេខាលើកិច្ចព្រមព្រៀងសន្តិសុខជាមួយអាល្លឺម៉ង់ក្នុងខែកុម្ភៈ អឺរ៉ុប Pravda បានរាយការណ៍នៅថ្ងៃទី០៣ ខែកុម្ភៈដោយដកស្រង់កាសែតអាល្លឺម៉ង់ Frankfurter Allgemeine Zeitung។
កិច្ចព្រមព្រៀងនេះគ្រោងនឹងចុះហត្ថលេខានៅថ្ងៃទី១៦ ខែកុម្ភៈ។
ទីភ្នាក់ងារសារព័ត៌មានអាល្លឺម៉ង់ DPA បានបន្ថែមថា កិច្ចពិភាក្សារវាងប្រធានាធិបតីអ៊ុយក្រែន លោក Volodymyr Zelenskyy និងអធិការបតីអាល្លឺម៉ង់ លោក Olaf Scholz នឹងបន្តនាពេលខាងមុខ។
លោក Olaf Scholz បានប្រកាសកាលពីថ្ងៃទី២៩ ខែមករាថាទីក្រុង Berlin និង Kyiv អាចយល់ព្រមក្នុងពេលឆាប់ៗនេះលើកិច្ចព្រមព្រៀងសន្តិសុខមួយស្របតាមសេចក្តីប្រកាសក្របខ័ណ្ឌ G៧ ដែលបានអនុម័តនៅក្នុងកិច្ចប្រជុំកំពូលរបស់ណាតូក្នុងខែកក្កដា ឆ្នាំ២០២៣។
នាយករដ្ឋមន្ត្រីអង់គ្លេសលោក Rishi Sunak បានទៅបំពេញទស្សនកិច្ចនៅទីក្រុង Kyiv កាលពីថ្ងៃទី១២ ខែមករា ហើយបានជួបជាមួយលោក Zelenskyy។ ភាគីទាំងពីរបានចុះហត្ថលេខាលើកិច្ចព្រមព្រៀងសន្តិសុខរយៈពេល ១០ ឆ្នាំដែលនឹងនៅតែជាធរមានរហូតដល់អ៊ុយក្រែនចូលរួមជាមួយអង្គការណាតូ។
នាយករដ្ឋមន្ត្រី Denys Shmyhal បានឲ្យដឹងកាលពីថ្ងៃទី១៣ ខែមករាថាអ៊ុយក្រែនកំពុងចរចាជាមួយដៃគូជាច្រើនដើម្បីចុះហត្ថលេខាលើកិច្ចព្រមព្រៀងស្តីពីការធានាសន្តិសុខនិងកិច្ចសហប្រតិបត្តិការយោធា។
ប្រធានាធិបតីបារាំងលោក Emmanuel Macron បានប្រកាសកាលពីថ្ងៃទី១៧ ខែមករាថា ប្រទេសរបស់លោកកំពុងបញ្ចប់កិច្ចព្រមព្រៀងស្តីពីការធានាសន្តិសុខជាមួយអ៊ុយក្រែន។
ការិយាល័យប្រធានាធិបតីបានប្រកាសកាលពីថ្ងៃទី២៨ ខែវិច្ឆិកាថាអ៊ុយក្រែនបានចាប់ផ្តើមការពិគ្រោះយោបល់លើការធានាសន្តិសុខជាមួយប្រទេស G៧ ចុងក្រោយគឺអ៊ីតាលី។
ប្រភព៖ Yahoo News
ប្រែសម្រួលដោយ៖ ឡាយ លីហួ
