ធនាគារជាតិនៃកម្ពុជា-ក្រសួងអប់រំ រៀបចំសិក្ខាសាលាស្តីពី ការអនុវត្តគម្រោងបញ្ជ្រាបចំណេះដឹង ផ្នែកហិរញ្ញវត្ថុទៅក្នុងកម្មវិធីសិក្សាចំណេះទូទៅ ដំណាក់កាលទី៣

ភ្នំពេញ៖ ធនាគារជាតិនៃកម្ពុជា សហការជាមួយ ក្រសួងអប់រំ យុវជន និងកីឡា បានរៀបចំសិក្ខាសាលាស្តីពី ការអនុវត្តគម្រោងបញ្ជ្រាបចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សាចំណេះទូទៅ ដំណាក់កាលទី ៣ នៅថ្ងៃទី១ ខែកុម្ភៈ ឆ្នាំ២០២៤ នៅអគារមណ្ឌលសិក្សាបច្ចេកទេសធនាគារ។

សិក្ខាសាលានេះមានការអញ្ជើញចូលរួមជាអធិបតីភាពដ៏ខ្ពង់ខ្ពស់របស់លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា និង លោកជំទាវ គឹម សេដ្ឋានី រដ្ឋលេខាធិការប្រចាំការ នៃក្រសួងអប់រំ យុវជន និងកីឡា ព្រមទាំងមានអ្នកចូលរួមពីតំណាងក្រសួង-ស្ថាប័ន គ្រឹះស្ថាន ធនាគារនិងហិរញ្ញវត្ថុ ក្រុមហ៊ុនធានារ៉ាប់រង ដៃគូអភិវឌ្ឍន៍ សមាគមពាក់ព័ន្ធ និងសិស្សានុសិស្ស សរុបប្រមាណ ៤០០ រូប។

សិក្ខាសាលានេះមានគោលបំណងផ្សព្វផ្សាយអំពីសមិទ្ធផលនៃកិច្ចសហការរវាងស្ថាប័នទាំងពីរនាពេលកន្លងមកជូនភាគីពាក់ព័ន្ធ និងសាធារណជនទូទៅ និងដើម្បីស្វែងរកការគាំទ្រផ្នែកហិរញ្ញវត្ថុ សម្រាប់បន្តអនុវត្តគម្រោងដំណាក់កាលទី៣នេះ។

គួររំលេចថា ធនាគារជាតិនៃកម្ពុជា បានចាប់ផ្តើមសហការជាមួយ ក្រសួងអប់រំ យុវជន និងកីឡា អនុវត្តការងារបញ្ជ្រាបចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សាចំណេះទូទៅ តាំងពីឆ្នាំ២០១៧។ បច្ចុប្បន្ន ធនាគារជាតិនៃកម្ពុជា បានបញ្ចប់ការងារបញ្ជ្រាបចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សាចំណេះទូទៅដំណាក់កាលទី ១ និងដំណាក់កាលទី ២រួចរាល់ហើយ។

ដំណាក់កាលទី១ ផ្តោតលើការងារកំណត់មុខវិជ្ជាដែលត្រូវបញ្ជ្រាបក្នុងចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សាចំណេះទូទៅ ចំណែកឯដំណាក់កាលទី២ ផ្តោតលើការងាររៀបចំឯកសារសិក្សាសម្រាប់គ្រូនិងសិស្ស ការងារបណ្តុះបណ្តាលគ្រូបង្គោល និងការងារបង្រៀនសាកល្បងសម្រាប់ថ្នាក់ទី ៤ និងទី ៧។

ដោយឡែក សម្រាប់ដំណាក់កាលទី ៣ នេះ ជាការបញ្ជ្រាបចំណេះដឹងផ្នែកហិរញវត្ថុ ទៅក្នុងកម្មវិធីសិក្សាសម្រាប់ថ្នាក់ដែលនៅសល់ចំនួន ៧ ថ្នាក់ រួមមាន៖ ថ្នាក់ទី ៥, ៦, ៨, ៩, ១០, ១១ និង ១២។ គម្រោងដំណាក់កាលទី ៣ មានរយៈពេល ៣ ឆ្នាំ និងត្រូវរៀបចំឯកសារសិក្សាសម្រាប់ថ្នាក់ ដែលនៅសល់ ដូចជាការបណ្តុះបណ្តាលគ្រូបង្គោល និងការធ្វើតេស្តសាកល្បងនៅតាមសាលារៀនជាក់ស្តែង។