ការលើកយករឿង «ផ្កាស្រពោន» មកសម្ដែងឡើងវិញ ជាទម្រង់ទស្សនីយភាពល្ខោននិយាយ គឺដើម្បីចូលរួមលើកស្ទួយតម្លៃអក្សរសិល្ប៍ខ្មែរ និងចង់ឱ្យយុវជនខ្មែរស្វែងយល់ ស្គាល់កាន់តែច្បាស់នូវអក្សរសិល្ប៍
ភ្នំពេញ៖ «ផ្កាស្រពោន» គឺជារឿងអក្សរសិល្ប៍ទំនើបបែបប្រលោមលោកមនោសញ្ចេតនា ដ៏មានប្រជាប្រិយមួយនៅប្រទេសកម្ពុជា និងជាស្នាដៃដ៏ឆ្នើមរបស់ កវីនិពន្ធ នូ ហាច ដែលបាននិពន្ធឡើងនៅ គ.ស.១៩៣៨។ រឿងនេះផងដែរ បានពណ៌នាពីជីវិតស្នេហាព្រាត់ប្រាស់របស់យុវជន យុវតីពីររូបបណ្តាលមកពីការរើសអើងវណ្ណៈដោយឱ្យតម្លៃលើទ្រព្យសម្បត្តិធំជាងកិត្តិយស។
ដោយសារមានការសំណូមពរច្រើនពីសំណាក់មហាជនគ្រប់មជ្ឈដ្ឋានដូច្នេះហើយទើបក្រសួងវប្បធម៌ និងវិចិត្រសិល្បៈ បានលើកយករឿង «ផ្កាស្រពោន» មកសម្ដែងឡើងវិញម្ដងទៀត ជាទម្រង់ទស្សនីយភាពល្ខោននិយាយ ជូនទស្សនិកជនទស្សនាចាប់ពីថ្ងៃទី២-ទី៣ និងទី៤ ខែកុម្ភៈ ឆ្នាំ២០២៤ នៅសាលសន្និសីទចតុម្មុខ ។
កវីនិពន្ធ នូ ហាច (រូបថត៖ ឯកសារ)
ពាក់ព័ន្ធជាមួយនឹងហេតុផលធំផ្សេងទៀត ដែលនាំឱ្យក្រសួងវប្បធម៌ និងវិចិត្រសិល្បៈ លើកយក «ផ្កាស្រពោន»មកសម្ដែងឡើងវិញ ជាទម្រង់ទស្សនីយភាពល្ខោននិយាយ លោក ឈាង ឆដាភ័ក្រ្ត ប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ បានមានប្រសាសន៍ថា មានហេតុផលធំពីរ គឺទី១ ចង់ចូលរួមការពារ និងលើកស្ទួយតម្លៃអក្សរសិល្ប៍ខ្មែរ និងទី២ ចង់ឱ្យយុវជនខ្មែរយើងស្វែងយល់ និងស្គាល់កាន់តែច្បាស់នូវអក្សរសិល្ប៍ និងទម្រង់សិល្បៈល្ខោននិយាយ។
ទន្ទឹមគ្នានេះដែរ លោក ឈាង ឆដាភ័ក្រ្ត បានលើកឡើងថាបច្ចុប្បន្ន មហាជនមានទំនោរទៅលើភាពយន្តឌីជីថល ជាជាងការទស្សនាទស្សនីយភាពសម្ដែងនៅលើឆាក ដូច្នេះហើយក្នុងឱកាសនេះលោករំពឹងថា ទស្សនិកជន ដែលបានអញ្ជើញទៅទស្សនា ទម្រង់ទស្សនីយភាពល្ខោននិយាយ រឿង «ផ្កាស្រពោន» នឹងកាន់តែស្គាល់ច្បាស់នូវទម្រង់ល្ខោននិយាយរបស់ខ្មែរយើង។
លោកបន្តថា ដោយសារតែរឿង «ផ្កាស្រពោន» ជារឿងអក្សរសិល្ប៍ដែលបានបញ្ចូលនៅក្នុងកម្មវិធីសិក្សារបស់ក្រសួងអប់រំ យុវជន និងកីឡា ដូច្នេះហើយវាជាឱកាសល្អសម្រាប់ប្អូនៗជាសិក្សានុសិស្ស អាចមកទស្សនាដើម្បីកាន់តែងាយយល់ និងឆាប់ចេះ ឆាប់ចាំ ថែមទៀត។
សម្រាប់ទិសដៅបន្ទាប់ លោក ឈាង ឆដាភ័ក្រ្ត បានបង្ហាញថា ក្រសួងវប្បធម៌ និងវិចិត្រសិល្បៈនឹងពិនិត្យមើលតាមលទ្ធភាពជាក់ស្ដែង ថាតើអាចនឹងជ្រើសរើសរឿងប្រភេទណា ដូចជារឿងអក្សរសិល្ប៍ ឬរឿងអប់រំ បង្ហាញទីតថភាពក្នុងសង្គម ដើម្បីមកសម្ដែងជាទម្រង់ទស្សនីយភាពល្ខោននិយាយ ជូនទស្សនិកជនទស្សនា ដោយលោកបានយល់ឃើញថា ទម្រង់ល្ខោននិយាយ គឺជាទម្រង់បែបប្រាកដនិយម យកពាក្យពេជន៍តួអង្គជាសំខាន់ ដូច្នេះអាចបង្ហាញពីខ្លឹមសារ ឬគោលបំណងដែលចង់បង្ហាញកាន់តែច្បាស់ ជូនទៅដល់សង្គម ។
សូមបញ្ជាក់ថា នេះជាលើកទី២ ហើយដែល ក្រសួងវប្បធម៌ និងវិចិត្រសិល្បៈ បានលើកយក«ផ្កាស្រពោន» មកសម្ដែង ជាទម្រង់ទស្សនីយភាពល្ខោននិយាយ ជូនទស្សនិកជនទស្សនា បន្ទាប់ពីជោគជ័យនៅក្នុងការសម្ដែងលើកទី១ ៕ ប្រភព.ទ.ទ.ក
