Europol បង្កើតក្រុមការងារ OSINT ដើម្បីគាំទ្រការស៊ើបអង្កេតលើឧក្រិដ្ឋកម្មសង្គ្រាមនៅអ៊ុយក្រែន

បរទេស៖ ក្រុមការងារប្រតិបត្តិការថ្មី (OTF) ត្រូវបានបង្កើតឡើងដោយ Europol ដើម្បីជួយដល់ការស៊ើបអង្កេតដែលកំពុងបន្តលើឧក្រិដ្ឋកម្មអន្តរជាតិស្នូល ដែលបានប្រព្រឹត្តនៅក្នុងប្រទេសអ៊ុយក្រែន បន្ទាប់ពីការលុកលុយប្រទេសដោយកងកម្លាំងប្រដាប់អាវុធរុស្ស៊ីក្នុងខែកុម្ភៈ ឆ្នាំ២០២២។

ក្រុមការងារនេះមានគោលបំណងជួយកំណត់អត្តសញ្ញាណជនសង្ស័យ និងការចូលរួមរបស់ពួកគេក្នុងឧក្រិដ្ឋកម្មសង្រ្គាម ឧក្រិដ្ឋកម្មប្រឆាំងមនុស្សជាតិ ឬឧក្រិដ្ឋកម្មប្រល័យពូជសាសន៍ ដែលបានប្រព្រឹត្តនៅក្នុងប្រទេសអ៊ុយក្រែន តាមរយៈការប្រមូល និងការវិភាគនៃការស៊ើបការណ៍សម្ងាត់ប្រភពបើកចំហ (OSINT)។

ចាប់តាំងពីការផ្ទុះឡើងនៃសង្រ្គាមមក មានកម្រិត OSINT ដែលមិនធ្លាប់មានពីមុនមកដែលមាននៅលើអ៊ីនធឺណិត ដែលភាគច្រើនដោយសារតែសារៈសំខាន់កាន់តែខ្លាំងឡើងនៃអ៊ីនធឺណិត និងប្រព័ន្ធផ្សព្វផ្សាយសង្គម។ ការស៊ើបការណ៍សម្ងាត់បែបនេះអាចជួយអ្នកស៊ើបអង្កេតយ៉ាងខ្លាំងក្នុងការផ្ទៀងផ្ទាត់ និងកត់ត្រាករណីឧក្រិដ្ឋកម្មសង្គ្រាម។

ដោយសារតែចំនួនដ៏ធំនៃព័ត៌មានដែលមាននៅលើអ៊ីនធឺណិត និងផលប៉ះពាល់នៃឧក្រិដ្ឋកម្មអន្តរជាតិស្នូលលើសហគមន៍ពិភពលោកទាំងមូល កិច្ចសហប្រតិបត្តិការអន្តរជាតិមានតម្លៃមិនអាចកាត់ថ្លៃបាន។

OTF ត្រូវបានដឹកនាំដោយអង្គភាពឧក្រិដ្ឋកម្មអន្តរជាតិនៃប៉ូលីសហូឡង់ (Nationale Politie) និងការិយាល័យប៉ូលីសព្រហ្មទណ្ឌសហព័ន្ធអាល្លឺម៉ង់ (Bundeskriminalamt) ដោយមានការគាំទ្រពី Europol និងគម្រោងវិភាគស្នូលឧក្រិដ្ឋកម្មអន្តរជាតិ (AP CIC)។

រហូតមកដល់ពេលនេះ មានប្រទេសចំនួន១៤ បានយល់ព្រមប្រគល់សមត្ថភាព OSINT ដល់ក្រុមការងារ ដើម្បីគាំទ្រសំណើជាអាទិភាពពីអ៊ុយក្រែន ប្រទេសផ្សេងទៀត និងតុលាការឧក្រិដ្ឋកម្មអន្តរជាតិ។

OTF ក៏អាចអំពាវនាវលើការគាំទ្រ និងកិច្ចសហប្រតិបត្តិការរបស់សមាជិកមិនមែន OTF ភ្នាក់ងារសហភាពអឺរ៉ុប អង្គការក្រៅរដ្ឋាភិបាល ឬក្រុមហ៊ុនឯកជន។

ប្រភព៖ Europol

ប្រែសម្រួលដោយ៖ ឡាយ លីហួ