នាយករដ្ឋមន្ត្រី ណែនាំដល់ក្រសួងកិច្ចការនារី បន្តតាមដានសកម្មភាពរបស់ស្ត្រីមួយចំនួន ដែលធ្វើឱ្យប៉ះពាល់ដល់តម្លៃវប្បធម៌ និងសីលធម៌របស់ស្ត្រីខ្មែរ

ភ្នំពេញ៖ នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានណែនាំក្រសួងកិច្ចការនារី បន្តតាមដានសកម្មភាពរបស់ស្ត្រីមួយចំនួន ដែលធ្វើឱ្យប៉ះពាល់ដល់តម្លៃវប្បធម៌ និងសីលធម៌របស់ស្ត្រីខ្មែរ។

ក្នុងឱកាសអញ្ជើញបិទសន្និ បាតបូកសរុបការងារឆ្នាំចាស់ឆ្នាំ២០២៣ និងលើកទិសដៅការងារឆ្នាំថ្មី ឆ្នាំ២០២៤ របស់ក្រសួងកិច្ចការ នារី នៅសណ្ឋាគារសុខាភ្នំពេញ នារសៀលថ្ងៃទី១១ ខែមករា ឆ្នាំ២០២៤ សម្តេចធិបតី ករណីមនុស្សប៉ុន្មានរូបដែលត្រូវបានឃាត់ខ្លួនពាក់ព័ន្ធនឹងការផ្សព្វផ្សាយជ្រុល នៅលើប្រព័ន្ធផ្សព្វផ្សាយ អំពីការលក់ផលិតផល ព្រោះជាអំពើហួសហេតុ។ ពិតណាស់ សិទ្ធិរបស់ប្រជាពលរដ្ឋ និងសិទ្ធិនារី ត្រូវបានលើកតម្កើង ប៉ុន្តែយើងក៏មានកាតព្វកិច្ចថែរក្សា និងការពារតម្លៃសង្គម តម្លៃវប្បធម៌ និងប្រពៃណី ជាពិសេសតម្លៃស្ត្រីខ្មែរ។

សម្តេចបន្តថា ទោះបីប្រទេសយើងអភិវឌ្ឍថ្ងៃក្រោយ ដល់ណាក៏ដោយ សម្តេចគិតថា អត្តសញ្ញាណយើងមិនត្រូវបាត់ទេ។ ពិតណាស់ សាកលភាវូបនីយកម្ម ស្តង់ដារសម្ភារ ស្តងដារនៃការសិក្សា និងស្តង់ដារនៃតម្លៃទីផ្សារមួយចំនួន វាអាចប្រមូលផ្តុំ ជាមួយគ្នាបាន។ ការអនុវត្តគោលនយោបាយទីផ្សារសេរី ការអនុវត្តលទ្ធិប្រជាធិបតេយ្យ ប៉ុន្តែនៅលើលោកនេះគ្មានស្តង់ដារណាមួយឲ្យអនុវត្តទេ គឺត្រូវគោរពនូវតម្លៃមូលដ្ឋានផង។ អីចឹង នៅកម្ពុជាយើង សិទ្ធិសេរីភាពបុគ្គល ជាពិសេសស្ត្រីចាំបាច់ត្រូវតែលើកតម្កើង ប៉ុន្តែមិនត្រូវហួសព្រំដែន ពិសេសមិនត្រូវបាត់បង់អត្តសញ្ញាណដែលជាស្ត្រីខ្មែរ។

សូមជម្រាបថា អ្នកលក់អនឡាញស្រីប្រុស ចំនួន៥នាក់ ត្រូវបានសាលាដំបូងខេត្តកណ្ដាល សម្រេចឃុំខ្លួនដាក់ពន្ធនាគារ នៅថ្ងៃទី០៣ ខែវិច្ឆិកា ឆ្នាំ២០២៣ ក្រោយត្រូវកម្លាំងនគរបាលចាប់ខ្លួន ដោយសារពួកគេរួមគ្នាឡាយវីដេអូតាមបណ្ដាញសង្គមបង្ហាញនូវកាយវិការ និងពាក្យសម្ដីអាសអាភាស នាំឲ្យប៉ះពាល់ដល់កិត្តិយសនារីខ្មែរ។ អ្នកទាំង៥ បានបង្ហោះ និងឡាយវីដេអូ ក្នុងបណ្តាញសង្គម និងបណ្តាញ Tik Tok ដែលសមត្ថកិច្ចថា ជាករណីញុះញង់ឲ្យប្រព្រឹត្តបទឧក្រិដ្ឋជាអាទិ៍, ញុះញង់ឲ្យមានការរើសអើង និងសញ្ចារកម្ម៕