មជ្ឈមណ្ឌលបណ្ដុះបណ្ដាលវិជ្ជាជីវៈខេត្តស្ទឹងត្រែង ត្រៀមខ្លួនរួចរាល់សម្រាប់វគ្គបណ្ដុះបណ្ដាល ខណៈយុវជន ២៥៤នាក់បានចុះឈ្មោះចូលរៀនជំនាញ

ភ្នំពេញ៖ មជ្ឈមណ្ឌលបណ្តុះបណ្តាលវិជ្ជាជីវៈខេត្តស្ទឹងត្រែង បានត្រៀមខ្លួនរួចជាស្រេចក្នុងការបើកវគ្គបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសាររងហានិភ័យ នៅថ្ងៃទី១៥ ខែមករា ឆ្នាំ២០២៤ ខាងមុខនេះ ខណៈយុវជនចំនួន ២៥៤នាក់ បានចុះឈ្មោះចូលរៀនជំនាញដែលខ្លួនស្រឡាញ់ពេញចិត្ត ។

ចាប់តាំងពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានប្រកាសដាក់ឱ្យអនុវត្តជាផ្លូវការនូវវគ្គបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១.៥ លាននាក់នៅថ្ងៃទី១៤ វិច្ឆិកា ឆ្នាំ២០២៣ មជ្ឈមណ្ឌលបានទទួលយុវជនមកចុះឈ្មោះចូលរៀនបានចំនួន ២៥៤នាក់ ស្រី ១៥២នាក់ លើវិស័យចំនួន៤ ដែលសិក្សាលើជំនាញចំនួន ៦ ដែលជាជំនាញមានតម្រូវការទីផ្សាការងារខ្ពស់ តាមបណ្តាក្រុមហ៊ុនសហគ្រាស និងមានប្រាក់ចំណូលសមរម្យនាពេលបច្ចុប្បន្ននេះ។ ក្នុងចំណោមយុវជនបានចុះឈ្មោះរៀនជំនាញទាំង ២៥៤នាក់ មានយុវជនចុះដោយខ្លួនឯងចំនួន ១៥១នាក់ (ស្រី ៨២នាក់) ចុះឈ្មោះតាមគ្រឹះស្ថានសិក្សាចំនួន ៨៩នាក់ (ស្រី ៦២នាក់) ចុះឈ្មោះតាមមន្ទីរការងារ និងបណ្តុះបណ្តាលវិជ្ជាជីវៈខេត្តស្ទឹងត្រែង ចំនួន ៥នាក់ (ស្រី២នាក់) ចុះឈ្មោះតាមទីភ្នាក់ងារជាតិមុខរបរ និងការងារចំនួន ៩នាក់ (ស្រី៦នាក់) ។

មជ្ឈមណ្ឌលបណ្ដុះបណ្ដាលវិជ្ជាជីវៈខេត្តស្ទឹងត្រែង បានត្រៀមគ្រូបង្រៀនជំនាញ បន្ទប់អនុវត្តន៍ និងសម្ភារៈបច្ចេកទេសផ្សេងៗទៀតផងដែរ ។

ជាមួយគ្នានោះមជ្ឈមណ្ឌលបណ្ដុះបណ្ដាលវិជ្ជាជីវៈខេត្តស្ទឹងត្រែង ក៏បានអំពាវនាវឱ្យយុវជនទាំងអស់ មកចុះឈ្មោះចូលរៀនជំនាញ របស់រាជរដ្ឋាភិបាលអាណត្តិទី៧នេះ ដើម្បីមានជំនាញមួយច្បាស់លាស់ប្រចាំជីវិត មានការងារ និងប្រាក់ចំណូលសមរម្យ ក្នុងការសម្រួលជីវភាពគ្រួសារ និងកំណើនសេដ្ឋកិច្ចជាតិ។

សូមបញ្ជាក់ផងដែរថា គិតត្រឹមថ្ងៃទី៧ ខែមករា ឆ្នាំ២០២៤ មានយុវជនចុះឈ្មោះចំនួន ២១ ៥៩៥នាក់ ក្នុងនោះ រាជធានីភ្នំពេញចំនួន ៨ ៣៥៣នាក់, បាត់ដំបង ២ ៦៩៩នាក់, សៀមរាប ១ ៦១២នាក់, កណ្តាល ៧៧៦នាក់, ព្រះសីហនុ ៧៥៥នាក់, និងបណ្ដាខេត្តផ្សេងៗចំនួន ៧ ៤០០នាក់។ ក្រសួងការងារ និងបណ្តុះបណ្តាលវិជ្ជាជីវៈ នឹងចាប់ផ្តើមបើកវគ្គបណ្តុះបណ្តាលជំហ៊ាន ដំបូងនាពេលដ៏ខ្លីខាង មុខនេះ ចំនួន ៥០០ថ្នាក់។

សូមរំលឹកថា កាលពីថ្ងៃទី១៤ ខែវិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានដាក់ឱ្យអនុវត្តជាផ្លូវការនូវការបណ្តុះបណ្តាលជំនាញវិជ្ជាជីវៈ និងបច្ចេកទេសទៅដល់គ្រួសារក្រីក្រ និងគ្រួសារងាយរងហានិភ័យ ចំនួន ១លាន ៥សែននាក់ ដែលមានរយៈពេល ៤ខែ សិក្សាដោយឥតគិតថ្លៃ ម្យ៉ាងវិញទៀត យុវជនដែលមកពីគ្រួសារក្រីក្រ និងគ្រួសារងាយរងហានិភ័យ នឹងទទួលបានប្រាក់ឧបត្ថម្ភប្រចាំខែចំនួន ២៨ម៉ឺនរៀល រហូតដល់បញ្ចប់ការសិក្សា៕