ឯកឧត្តម កែវ រតនៈ អញ្ជើញបិទការប្រគួតកីឡា ដណ្តើមពានរង្វាន់ ៧ មករា លើកទី១០ នៅទីលានបរិវេណអនុវិទ្យាល័យព្រះសីហនុក្រគរ

ភ្នំពេញ៖ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ នាថ្ងៃទី០៦ ខែមករា ឆ្នាំ២០២៤ បានអញ្ជើញជាអធិបតី ក្នុងពិធីបិទការប្រគួតកីឡា ដណ្តើមពានរង្វាន់ ៧ មករា លើកទី១០ នៅទីលានបរិវេណអនុវិទ្យាល័យព្រះសីហនុក្រគរ ស្ថិតក្នុងឃុំក្បាលត្រាច ស្រុកក្រគរ ខេត្តពោធិ៍សាត់ បន្ទាប់បានដំណើរការអស់រយៈពេល៣២ថ្ងៃ ដើម្បីអបអរសាទរខួបលើកទី៤៥ នៃទិវាជាតិជ័យជំនះ (៧ មករា ១៩៧៩ – ៧ មករា ២០២៤)។

ពិធីនេះបានការចូលរួមពី ឯកឧត្តម កែវ វីរៈ តំណាងរាស្ត្រមណ្ឌលពោធិ៍សាត់ និងជាប្រធានក្រុមការងារ ចុះជួយស្រុកវាលវែង, ឯកឧត្តម បណ្ឌិតប្រាំង ជលសា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកអគ្គិសនីកម្ពុជា និងជាប្រធានក្រុមការងារ ចុះជួយស្រុកក្រគរ និងស្រុកកណ្តៀង ព្រមទាំងក្រុមការងារទាំង១១ឃុំ អាជ្ញាធរមូលដ្ឋាន និងសិស្សានុសិស្សយ៉ាងច្រើនកុះករ។

នៅក្នុងខណៈនោះ ឯកឧត្តម កែវ រតនៈ បានប្រគល់លិខិតសរសើរ ដល់ក្រុមការងារ អាជ្ញាធរមូលដ្ឋាន គណៈកម្មការដឹកនាំការប្រគួត និងប្រគល់ជូនជ័យលាភី ដល់កីឡាករ កីឡាការិនី ចាប់ពីចំណាត់ថ្នាក់លេខ១ ដល់លេខ៤ ទាំងបាល់ទាត់ និងបាល់ទះ អមដោយពានរង្វាន់១ ទង់១ និងថវិកាមួយចំនួន និងបានថតរូបអនុស្សាវរីយ ជាមួយក្មួយៗសិស្សានុសិស្សផងដែរ។

គួរជម្រាបផងដែរថា ចំពោះលទ្ធផលប្រគួតជាផ្លូវការ៖
-វិញ្ញាសាបាល់ទាត់បុរស ចំណាត់ថ្នាក់លេខ១ បានមកលើក្លិបយុវជន TigerFC, លេខ២ ក្លិបយុវជន ស្វាយស, លេខ៣ ក្លិបយុវជន អន្សាចំបក់ និងលេខ៤ ក្លិបយុវជន ក្បាលត្រាច។
-វិញ្ញាសាបាត់ទាត់នារី ចំណាត់ថ្នាក់លេខ១ បានមកលើក្លិបនារី ត្នោតជុំ បឹងកន្ទួត, លេខ២ ក្លិបនារី ស្វាយស, លេខ៣ ក្លិបនារី អនុវិទ្យាល័យព្រះសីហនុក្រគរ និងលេខ៤ ក្លិបនារី អន្សាចំបក់។
-វិញ្ញាសារបាល់ទះនារី ចំណាត់ថ្នាក់លេខ១ បានមកលើក្លិបនារី អនុវិទ្យាល័យព្រះសីហនុក្រគរ, លេខ២ ក្លិបនារី ស.ស.យ.ក ក្រគរ, លេខ៣ ក្លិបនារីវិទ្យាល័យ ហ៊ុន សែន១០មករា បឹងកន្ទួត និងលេខ៤ ក្លិបនារី វិទ្យាល័យ ហ៊ុន សែន ឈើតុំ ៕