នាយឧត្ដមសេនីយ៍ ឯក មនោសែន ណែនាំឱ្យបេក្ខជនបណ្ឌិតទាំងអស់ បន្តខិតខំស្រាវជ្រាវឱ្យបានស៊ីជម្រៅលើប្រធានបទរបស់ខ្លួន ដើម្បីការងារនិក្ខេបបទឱ្យបានសម្រេចជោគជ័យ

ភ្នំពេញ៖ នារសៀលថ្ងៃចន្ទ ទី២៥ ខែធ្នូ ឆ្នាំ២០២៣ ឯកឧត្ដម នាយឧត្ដមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញជាអធិបតីក្នុងពិធីសំណេះសំណាលជាមួយនឹងបេក្ខជនបណ្ឌិតចំនួន១៣រូប ជំនាន់ទី១ នៃបណ្ឌិត្យសភានគរបាលកម្ពុជា ដែលរៀបចំឡើងនៅសាលប្រជុំព្រះគណេស(អគារ A)នៃបណ្ឌិត្យសភានគរបាលកម្ពុជា។

ឯកឧត្តម នាយឧត្ដមសេនីយ៍ សាស្ត្រាចារ្យ បានថ្លែងកោតសរសើរចំពោះបេក្ខជនបណ្ឌិតទាំងអស់ ដែលខិតខំប្រឹងប្រែងសិក្សានិងស្រាវជ្រាវក្នុងការសរសេរនិក្ខេបទរបស់ខ្លួនឱ្យបានល្អប្រកបដោយលក្ខណៈវិទ្យាសាស្ត្រ ព្រមទាំងគោរពតាមលក្ខខណ្ឌនានាដែលបណ្ឌិត្យសភានគរបាលកម្ពុជាបានកំណត់។

ឯកឧត្តម នាយឧត្ដមសេនីយ៍ សាស្ត្រាចារ្យ បានលើកឡើងអំពីតម្លៃនៃសន្តិភាព ដែលយើងមានឱកាសសិក្សាដល់ថ្នាក់បណ្ឌិតវិទ្យាសាស្រ្តនគរបាល នាពេលនេះ គឺដោយសារមានសម្តេចពុកតេជោសែនជាបិតានៃសន្តិភាពនិងការអភិវឌ្ឍ។ ទន្ទឹមនឹងនេះដែរ កម្ពុជាបច្ចុប្បន្នក្រោមការដឹកនាំបន្តវេនដ៏ឈ្លាសវៃប្រកបដោយទស្សនវិស័យជឿនលឿនរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានបន្តវឌ្ឍនភាពលើគ្រប់វិស័យ ព្រមទាំងការគាំទ្រពីគ្រប់មជ្ឍដ្ឋាន។

ឯកឧត្តម នាយឧត្ដមសេនីយ៍ សាស្ត្រាចារ្យ បានបញ្ជាក់ថា កងកម្លាំងត្រូវការពាររាជរដ្ឋាភិបាលនិងស្តាប់បទបញ្ជារបស់ប្រមុខរាជរដ្ឋាភិបាល គ្រប់កាលៈទេសៈ ដោយឥតងាករេ។

ឯកឧត្តម នាយឧត្ដមសេនីយ៍ សាស្ត្រាចារ្យ បានលើកឡើងបន្ថែមថា បណ្ឌិត្យសភាក្រោមឱវាទក្រសួងមហាផ្ទៃ ដឹកនាំដោយ ឯកឧត្តមអភិសន្តិបណ្ឌិត ស សុខា បន្តវេនដឹកនាំពីសម្ដេចក្រឡាហោម បានធ្វើការបណ្ដុះបណ្ដាលផ្អែកលើគុណភាពជាធំ។ ដូច្នេះ បេក្ខជនបណ្ឌិតទាំងអស់នឹងក្លាយទៅជាធនធានមនុស្សប្រកបសមត្ថភាពវិជ្ជាជីវៈនិងគុណវុឌ្ឍិសមស្រប សម្រាប់បន្តជាអ្នកបន្តវេនដឹកនាំ និងជាសាស្ត្រាចារ្យ បម្រើឱ្យការងារបណ្ដុះបណ្ដាលនិងស្រាវជ្រាវក្នុងវិស័យសន្តិសុខ។

ជាចុងក្រោយឯកឧត្តម នាយឧត្ដមសេនីយ៍ សាស្ត្រាចារ្យ បានណែនាំឱ្យបេក្ខជនបណ្ឌិតទាំងអស់ បន្តខិតខំសិក្សានិងស្រាវជ្រាវឱ្យបានស៊ីជម្រៅលើប្រធានបទរបស់ខ្លួន ដើម្បីការងារនិក្ខេបបទឱ្យបានសម្រេចជោគជ័យ ព្រមទាំងស្នើឱ្យបេក្ខជនបណ្ឌិត លើកសំណូមពរនានាមកឯកឧត្តមផ្ទាល់ ដើម្បីដោះស្រាយទាន់ពេលវេលា ៕