នាយករដ្ឋមន្ត្រី ហ៊ុន ម៉ាណែត៖ ការរក្សា និងពង្រឹងទីផ្សារមានស្រាប់ ពង្រីកទីផ្សារថ្មី» ជាពាក្យស្រួលនិយាយ ប៉ុន្តែពិបាកធ្វើ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងបញ្ជាក់ថា ការរក្សា ពង្រឹងទីផ្សារដែលមានស្រាប់ និងពង្រីកទីផ្សារថ្មី ជាពាក្យស្រួលនិយាយ ប៉ុន្តែពិបាកធ្វើ ។

ក្នុងឱកាសអញ្ជើញបិទសន្និបាតបូកសរុបលទ្ធផលការងារពាណិជ្ជកម្ម ឆ្នាំ២០២៣ និងលើកទិសដៅពាណិជ្ជកម្មឆ្នាំ២០២៤» នៅថ្ងៃទី២២ ខែធ្នូ ឆ្នាំ២០២៣ សម្តេចធិបតី
មានប្រសាសន៍ថា ថ្វីត្បិតឆ្នាំ២០២៣ ជាឆ្នាំដ៏លំបាកសម្រាប់សេដ្ឋកិច្ចកម្ពុជាដោយសារឥទ្ធិពលអវិជ្ជមានពីសេដ្ឋកិច្ចសកលក្តី ក៏យើងបានកត់សម្គាល់ឃើញថា ក្រសួងពាណិជ្ជកម្មបានប្រែក្លាយបញ្ហាប្រឈមឱ្យទៅជាឱកាស ដោយបានពង្រឹងកាលានុវត្តភាពវិស័យពាណិជ្ជកម្មកម្ពុជាតាមរយៈការសម្រេចបាននូវការចរចាដាក់អោយចូលជាធរមាន នូវកិច្ចព្រមព្រៀងពាណិជ្ជកម្មសេរីទ្វេរភាគី និងពហុភាគីសំខាន់ៗចំនួន ៤ ដូចជា៖

ទី១-កិច្ចព្រមព្រៀងពាណិជ្ជកម្មសេរីកម្ពុជា-ចិន
ទី២-កិច្ចព្រមព្រៀងពាណិជ្ជកម្មសេរីសាធាណៈរដ្ឋកូរ៉េ
ទី៣-កិច្ចព្រមព្រៀងភាពជាដៃគូរសេដ្ឋកិច្ចគ្រប់ជ្រុងជ្រោយតំបន់ (RCEP)
ទី៤-កិច្ចព្រមព្រៀងភាពជាដៃគូគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម (CEPA)

សម្តេចធិបតី ថ្លែងថា ទីផ្សារដែលបើកហើយ គឺយើងត្រូវព្យាយាមថែរក្សាធានាគុណភាពទំនិញ និងធានាភាពជឿជាក់ឱ្យបាន ៕