ឯកឧត្តមសន្តិបណ្ឌិត ម៉ៅ ច័ន្ទតារា អញ្ជើញបិទកម្មវិធីបណ្ដុះបណ្ដាលចំនួន ៤វគ្គ របស់សាលាជាតិរដ្ឋបាលមូលដ្ឋាន
ភ្នំពេញ៖ ឯកឧត្តមសន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ ក្រសួងមហាផ្ទៃ នាព្រឹកថ្ងៃសុក្រ ទី២២ ខែធ្នូ ឆ្នាំ២០២៣នេះ បានអញ្ជើញជាអធិបតីបិទកម្មវិធីបណ្ដុះបណ្ដាលចំនួន០៤វគ្គដែលរៀបចំដោយសាលាជាតិរដ្ឋបាលមូលដ្ឋាន ក្រសួងមហាផ្ទៃ ដោយវគ្គបណ្ដុះបណ្ដាលទាំង០៤នោះ រួមមានកម្មវិធីគ្រប់គ្រងកម្រិត២ កម្មវិធីភាពជាអ្នកដឹកនាំស្រ្ដីជំនាន់ទី៥ កម្មវិធីវិក្រឹត្យការមូលដ្ឋានជំនាន់ទី៧ ឆ្នាំ២០២៣ និងវគ្គជំនាញស្ដីពីការសរសេរសំណើគម្រោង។
ពិធីបិទកម្មវិធីបណ្ដុះបណ្ដាលនេះក៏មានការអញ្ជើញចូលរួមពីរដ្ឋលេខាធិការ អនុរដ្ឋលេខាធិការ នាយកសាលជាតិរដ្ឋបាលមូលដ្ឋាន ប្រធាន អនុប្រធាននាយកដ្ឋាន ប្រធានការិយាល័យ ចំណុះ សាលាជាតិរដ្ឋបាលមូលដ្ឋាន និងសិក្ខាកាមជាច្រើនរូបផងដែរ។
លោក លឹម ពុទ្ធារី ប្រធាននាយកដ្ឋានបណ្ដុះបណ្ដាល នៃ
សាលាជាតិរដ្ឋបាលមូលដ្ឋាន បានធ្វើសេចក្ដីរាយការណ៍សង្ខេបនៃវគ្គបណ្ដុះបណ្ដាល ដោយបានលើកឡើងថា កម្មវិធីបណ្ដុះបណ្ដាលនេះត្រូវបានរៀបចំឡើងដោយប្រើប្រាស់វិធីសាស្ត្រមួយចំនួន ដូចជាការពិភាក្សាជាក្រុមតូច និងក្រុមធំ ការប្រើប្រាស់សំណួរបំផុសគំនិត ការចែករំលែកបទពិសោធន៍ ការអនុវត្តជាក់ស្ដែង ការសំដែងតួ ការប្រើប្រាស់វិធីសាស្ត្រផែនទីគំនិត ការរៀបចំផែនការស្រាវជ្រាវជាក្រុម ជាដើម។ បន្ថែមពីនេះ គណៈគ្រប់គ្រងវគ្គបានពង្រឹងការអនុវត្តវិន័យ និងបទបញ្ជាផ្ទៃក្នុងបានយ៉ាងតឹងរ៉ឹង ហើយជាលទ្ធផល កម្មវិធីបណ្ដុះបណ្ដាលនេះទទួលបានលទ្ធផលល្អប្រសើរ ដោយមានសិក្ខាកាមចំនួនតូចប៉ុណ្ណោះដែលមិនទទួលបានវិញ្ញាបនបត្របញ្ជាក់ការសិក្សា។
ពាក់ព័ន្ធនឹងការរៀបចំកម្មវិធីបណ្ដុះបណ្ដាលនេះ ឯកឧត្តម សន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ បានសម្ដែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងក្រុមការងារនៃសាលាជាតិរដ្ឋបាល ដែលបានខិតខំរៀបចំឱ្យមានការបណ្ដុះបណ្ដាលនានា ដើម្បីឆ្លើយតបទៅនឹងតម្រូវការអភិវឌ្ឍសមត្ថភាពរបស់មន្ត្រីរាជការស៊ីវិលទាំងនៅទីស្ដីការក្រសួងមហាផ្ទៃ និងនៅរដ្ឋបាលថ្នាក់ក្រោមជាតិ។
ឯកឧត្តម សន្តិបណ្ឌិត បានមានប្រសាសន៍ថា ការអភិវឌ្ឍមូលធនមនុស្សសម្រាប់ស្ថាប័នសាធារណៈ និងរដ្ឋបាលថ្នាក់ក្រោមជាតិដើរតួនាទីជាយុទ្ធសាស្ត្រយ៉ាងសំខាន់ ក្នុងការពង្រឹង និងលើកកម្ពស់សមត្ថភាព និងប្រសិទ្ធភាពរបស់ស្ថាប័ន និងរដ្ឋបាលថ្នាក់ក្រោមជាតិ ក្នុងការផ្តល់សេវាសាធារណៈជូនប្រជាពលរដ្ឋ ក៏ដូចការអភិវឌ្ឍមូលដ្ឋាន ឱ្យមានប្រសិទ្ធភាព តម្លាភាព គណនេយ្យភាព និងបរិយាបន្ន។ ឯកឧត្តម បានបន្តថា ការពង្រឹងស្ថាប័ន និងការអភិវឌ្ឍធនធានមនុស្សនៅរដ្ឋបាលថ្នាក់ក្រោមជាតិ គឺជាការពង្រឹងមូលដ្ឋាននីយកម្ម ដើម្បីទប់ទល់ជាមួយឥទ្ធិពល និងផលប៉ះពាល់នៃចរន្តសកលភាវូបនីយកម្ម ការពង្រឹងភាពជាម្ចាស់ និងសមត្ថភាពរបស់មូលដ្ឋានក្នុងការអភិវឌ្ឍមូលដ្ឋាន និងការដោះស្រាយបញ្ហាប្រឈម ដើម្បីលើកកម្ពស់គណនេយ្យភាពរបស់ក្រុមប្រឹក្សានៅរដ្ឋបាលថ្នាក់ក្រោមជាតិ តាមរយៈការពង្រឹងការ ឆ្លើយតបតម្រូវការរបស់ប្រជាពលរដ្ឋនៅមូលដ្ឋាន សំដៅលើកកម្ពស់គុណភាពជីវិតរបស់ប្រជាពលរដ្ឋ។
ឯកឧត្តមសន្តិបណ្ឌិត រដ្ឋលេខាធិការប្រចាំការ បានបន្តថា ដោយផ្អែកលើសារសំខាន់នៃការអភិវឌ្ឍធនធានមនុស្ស និងស្ថាប័ន ទាំងនៅទីស្តីការក្រសួងមហាផ្ទៃ និងរដ្ឋបាលថ្នាក់ក្រោមជាតិ ក្រសួងមហាផ្ទៃបានអភិវឌ្ឍរចនាសម្ព័ន្ធ និងប្រព័ន្ធបណ្តុះបណ្តាល ធនធានមនុស្សជាបន្តបន្ទាប់។ ជាមួយនេះ ក្រសួងមហាផ្ទៃ ក៏បានដាក់ចេញនូវប្រកាសពាក់ព័ន្ធកាតព្វកិច្ចរបស់មន្ត្រីរាជការស៊ីវិលនៅទីស្តីការក្រសួងមហាផ្ទៃ និងនៅរដ្ឋបាលថ្នាក់ក្រោមជាតិ ក្នុងការចូលរួមកម្មវិធីបណ្តុះបណ្តាលជាកាតព្វកិច្ច និងកម្មវិធីបណ្តុះបណ្តាលប្រចាំឆ្នាំ។ ស្របតាមស្មារតីនៃប្រកាសនេះ សាលាជាតិរដ្ឋបាលមូលដ្ឋានបាននិងកំពុងរៀបចំដាក់ឲ្យអនុវត្ត ជាផ្លូវការនូវកម្មវិធីបណ្តុះបណ្តាលជាកាតព្វកិច្ច និងកម្មវិធីបណ្តុះបណ្តាលពាក់ព័ន្ធមួយចំនួនទៀត តួយ៉ាង កម្មវិធីគ្រប់គ្រងកម្រិត២ និងកម្មវិធីវិក្រឹត្យការមូលដ្ឋាន ជាប្រភេទកម្មវិធីបណ្ដុះបណ្ដាលកាតព្វកិច្ច ហើយកម្មវិធីភាពជាអ្នកដឹកនាំសម្រាប់ស្ត្រី និងវគ្គជំនាញស្ដីពីការសរសេរសំណើគម្រោងជាកម្មវិធីបណ្ដុះបណ្ដាលពិសេស និងជំនាញ។
ឯកឧត្តមសន្តិបណ្ឌិត សង្ឃឹមជឿជាក់ថា សិក្ខាកាមទាំងអស់នឹងខិតខំប្រែក្លាយចំណេះដឹង ក៏ដូចបទពិសោធន៍ថ្មីដែលទទួលបានក្នុងរយៈពេលនៃការសិក្សា ទៅជាការអនុវត្តជាក់ស្តែង នៅក្នុងការដឹកនាំ ការរៀបចំគោលនយោបាយ ក៏ដូចការបម្រើសេវាសាធារណៈ ឆ្ពោះទៅលើកកម្ពស់ការអភិវឌ្ឍសេដ្ឋកិច្ច សង្គមឲ្យកាន់តែមានប្រសិទ្ធភាព និងស័ក្តិសិទ្ធភាពនៅមូលដ្ឋានរបស់ខ្លួន សំដៅផ្តល់បរិយាកាសឱ្យប្រជាពលរដ្ឋគ្រប់មជ្ឈដ្ឋាន រស់នៅក្នុងស្ថានភាពប្រកបដោយផាសុកភាព សុខដុមរមនា មានជីវភាពធូរធារ និងមានសន្តិសុខទាំងផ្លូវកាយនិងផ្លូវចិត្ត ទាំងក្នុងពេលបច្ចុប្បន្ន និងទៅអនាគត ដើម្បី រួមចំណែកសម្រេចឱ្យបាននូវគោលដៅអភិវឌ្ឍន៍ប្រកបដោយចរីភាព របស់រាជរដ្ឋាភិបាលកម្ពុជា ក៏ដូចរបស់សហគមន៍អន្តរជាតិទាំងមូល និងរួមចំណែកសម្រេចបាននូវគោលដៅជាយុទ្ធសាស្រ្តដូចមាន កំណត់នៅក្នុងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧នៃរដ្ឋសភា។
គួរជម្រាបថា សាលាជាតិរដ្ឋបាលមូលដ្ឋានបានរៀបចំនូវកម្មវិធីបណ្ដុះបណ្ដាលចំនួន៤ រួមមានកម្មវិធីគ្រប់គ្រងកម្រិត២ កម្មវិធីភាពជាអ្នកដឹកនាំស្រ្ដីជំនាន់ទី៥ កម្មវិធីវិក្រឹត្យការមូលដ្ឋានជំនាន់ទី៧ ឆ្នាំ២០២៣ និងវគ្គជំនាញស្ដីពីការសរសេរសំណើគម្រោងសម្រាប់សិក្ខាកាមសរុបចំនួន១៧០រូប ចាប់ពីថ្ងៃទី០២ ខែតុលា ដល់ថ្ងៃទី២២ ខែធ្នូ ឆ្នាំ២០២៣ ដោយរៀបចំឆ្លាស់គ្នាតាមប្រព័ន្ធហ៊្សូម និងនៅទីស្ដីការក្រសួងមហាផ្ទៃ។ កម្មវិធីបណ្ដុះបណ្ដាលចំនួន៤នេះត្រូវបានរៀបចំឡើងដើម្បីលើកកម្ពស់សមត្ថភាពដល់ក្រុមគោលដៅជា អភិបាលរងរាជធានី ខេត្ត អភិបាលរងក្រុង ស្រុក ខណ្ឌ នាយក ឬនាយករងរដ្ឋបាលក្រុង ស្រុក ខណ្ឌជាស្រ្ដី ប្រធានការិយាល័យនៃរដ្ឋបាលក្រុង ស្រុក និងមន្រ្ដីរាជការនៅទីស្ដីការក្រសួងមហាផ្ទៃក្នុងការអនុវត្តការងារប្រកបដោយប្រសិទ្ធភាព៕
