១០ឆ្នាំនៃកិច្ចប្រតិបត្តិការ CMAC និង APOPO បោសសម្អាតផ្ទៃដីបានជាង ៣ពាន់ហិកតា និងកម្ទេចចោលគ្រាប់មីនគ្រប់ប្រភេទជាង ៥ម៉ឺនគ្រាប់
ភ្នំពេញ៖ ឯកឧត្ដម ហេង រតនា ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយក CMAC បានឲ្យដឹងថា ក្នុងរយៈពេល១០ឆ្នាំ នៃកិច្ចសហប្រតិបត្តិការ អង្គភាព CMAC និងអង្គការAPOPO បានធ្វើបោសសម្អាតផ្ទៃដីបានចំនួនជាង៣០០០ហិកតា និងកម្ទេចចោលគ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានចំនួនប្រមាណជាង៥១.០០០គ្រាប់។
នាថ្ងៃទី១៣ ខែធ្នូ ឆ្នាំ២០២៣ នៅទីបញ្ជាការCMACភ្នំពេញ ឯកឧត្ដម ហេង រតនា ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយក CMAC និងលោក Michael Raine ប្រធានអង្គការ APOPO ប្រចាំកម្ពុជា បានចុះហត្ថលេខាលើកិច្ចព្រមព្រៀងកិច្ចសហប្រតិបត្តិការ និងភាពជាដៃគូរវាង អង្គការ APOPO និង មជ្ឈមណ្ឌលសកម្មភាពកំចាត់មីនកម្ពុជា លើគម្រោងសមាហរណកម្មកណ្តុរហិតរកមីន និងសុនខស្រាវជ្រាវបច្ចេកទេស ដែលមានថវិកាជំនួយចំនួន៣៨៧,១៦៧ ដុល្លារអាមេរិក ដែលនឹងចាប់ផ្តើមអនុវត្តគម្រោងចាប់ពីខែមករា ដល់ខែធ្នូ ឆ្នាំ២០២៤។
សូមបញ្ជាក់ថា គម្រោងនេះមានផែនការបោសសម្អាតផ្ទៃដីសរុបចំនួន៩៨,០០០,០០០ ម៉ែត្រក្រឡាក្នុងខេត្តសៀមរាប ព្រះវិហារ និងខេត្តមណ្ឌលគីរី។
សូមរំលឹកថា អង្គភាពCMAC និងអង្គការAPOPO បានសហប្រតិបត្តិការជាដៃគូជាមួយគ្នាជិត១០ឆ្នាំមកហើយលើកណ្តុតហិតមីននេះ។
តាមរយៈបណ្ដាញសង្គមហ្វេសប៊ុក ឯកឧត្ដម ហេង រតនា បញ្ជាក់ថា «ក្នុងរយៈពេល១០ឆ្នាំនៃកិច្ចសហប្រតិបត្តិការនេះ អង្គភាពCMAC បានធ្វើបោសសម្អាតផ្ទៃដីបានចំនួនជាង៣០០០ហិកតា និងកម្ទេចចោលគ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានចំនួនប្រមាណជាង៥១.០០០គ្រាប់» ។
បន្ថែមពីលើកិច្ចសហប្រតិបត្តិការបោសសម្អាតមីននៅកម្ពុជា អង្គភាពCMAC និងអង្គការAPOPO ក៏បានពង្រឹងកិច្ចសហប្រតិបត្តិការជាមួយបណ្តាដៃគូដទៃទៀត តាមរយៈការបញ្ចូនសុនខហិតមីនរបស់អង្គភាពCMACទៅប្រទេសទួកគី និងបណ្តាប្រទេសនៅអាហ្វ្រិចកណ្តាលជាដើម ជាពិសេសក៏បានសម្របសម្រួល និងគាំទ្រក្នុងការបញ្ជូនកម្លាំងជំនាញអង្គភាពCMAC ទៅបណ្តាប្រទេសទាំងអស់នោះដើម្បីផ្តល់ការហ្វឹកហ្វឺនជំនាញសុនខស្រាវជ្រាវបច្ចេកទេស ហើយក៏មានមន្រ្តីផ្នែកយុទ្ធភណ្ឌមិនទាន់ផ្ទុះបណ្តាប្រទេសទាំងនោះមកហ្វឹកហ្វឺនជំនាញបោសសម្អាតមីននៅអង្គភាពCMAC តាមរយៈអង្គការAPOPO ផងដែរ ៕
