រដ្ឋមន្ត្រី ហួត ហាក់ ទទួលជួបពិភាក្សាការងារជាមួយ ឯកអគ្គរាជទូតថៃប្រចាំនៅកម្ពុជា
ភ្នំពេញ៖ ឯកឧត្តម ហួត ហាក់ រដ្ឋមន្ត្រីក្រសួងអធិការកិច្ច នារសៀលថ្ងៃពុធ ១កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៣ ខែធ្នូ ឆ្នាំ២០២៣ បានទទួលជួបពិភាក្សាការងារជាមួយ ឯកឧត្តម ឆឺតកៀត អាត់ថាកន (Cherdkiat ATTHAKOR) ឯកអគ្គរាជទូតថៃប្រចាំនៅព្រះរាជាណាចក្រកម្ពុជា និងសហការី នៅទីស្តីការក្រសួងអធិការកិច្ច។
ក្នុងឱកាសនោះ ឯកឧត្តមរដ្ឋមន្រ្តី បានសម្តែងនូវក្ដីសោមនស្សរីករាយ ក្នុងការទទួលស្វាគមន៍ ឯកឧត្តម ឆឺតកៀត អាត់ថាកន (Cherdkiat ATTHAKOR) និងសហការី មកកាន់ទីស្ដីការក្រសួង ដើម្បីជួបសម្តែងការគួរសម និងពិភាក្សាការងារអំពីការបង្កើតកិច្ចសហប្រតិបត្តិការ ជាពិសេសទំនាក់ទំនងសហប្រតិបត្តិការជាមួយការិយាល័យ the office of the Ombudsman។
ឯកឧត្តមរដ្ឋមន្រ្តី មានប្រសាសន៍ថា ថ្ងៃទី១៩ ខែធ្នូ ឆ្នាំ១៩៥០ កម្ពុជា និងថៃ បានបង្កើតទំនាក់ទំនងការទូតជាផ្លូវការ (រយៈពេល៧៣ឆ្នាំ គិតមកដល់ឆ្នាំ២០២៣) ទន្ទឹមនឹងនោះទំនាក់ទំនងរវាងកម្ពុជា និងថៃ សព្វថ្ងៃនេះ បានឈានឡើងដល់កម្រិត “ភាពជាដៃគូសន្តិភាព និងវិបុលភាព” ដោយកម្ពុជា និងថៃ គាំទ្រដល់ការបង្កើតទីក្រុង-ខេត្តសម័្ពន្ធមេត្រី (ភាគីកម្ពុជា៧រាជធានី-ខេត្ត ហើយភាគីថៃ១១រាជធានី-ខេត្ត)។
ឯកឧត្តមរដ្ឋមន្ត្រី បានបន្តថា ទំនាក់ទំនងការទូត និងទស្សនកិច្ចផ្លូវការ២ឆ្នាំចុងក្រោយគឺ ឯកឧត្តម សេដ្ឋា ថាវីស៊ីន នាយករដ្ឋមន្រ្តីថៃ អមដំណើរដោយឯកឧត្តម ប៉ាន់ព្រី ផាហ៊ិតថានុកន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស បានអញ្ជើញមកបំពេញទស្សនកិច្ចផ្លូវការនៅប្រទេសកម្ពុជានៅថ្ងៃទី២៨ ខែកញ្ញា ឆ្នាំ២០២៣ និងបានអញ្ជើញជួបសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅវិមានសន្ដិភាព។ ក្នុងនោះសម្តេចធិបតី និងឯកឧត្តម សេដ្ឋា ថាវីស៊ីន បានអបអរសាទរគ្នា តាមទូរស័ព្ទក្នុងឱកាសដែលត្រូវបានតែងតាំងជានាយករដ្ឋមន្រ្តីនៃប្រទេសទាំងពីរ នៅថ្ងៃទី២២ ខែសីហា ឆ្នាំ២០២៣។ ទន្ទឹមនឹងនេះផងដែរ សម្តេចធិបតីនាយករដ្ឋមន្រ្តី បានអញ្ជើញទៅបំពេញទស្សនកិច្ចផ្លូវការពីថ្ងៃទី១៩-២១ ខែកញ្ញា ឆ្នាំ២០២២ នៅប្រទេសថៃ។
ជាចុងក្រោយ ភាគីទាំងពីរបានរំលឹកថា នាជំនួបសំដែងការគួរសមនៅឆ្នាំ២០១៨ ជាមួយឯកឧត្តម ប៉ាន់យ៉ារ៉ាក់ ភូនថាប់ (PANYARAK POOLTHUB) អតីតឯកអគ្គរាជទូត សម្ដេចសង្គហបណ្ឌិត ម៉ែន សំអន អតីតឧបនាយករដ្ឋមន្រ្តី បានលើកឡើងថា“នឹងរកពេលវេលាសមរម្យណាមួយ ដើម្បីអញ្ជើញទៅប្រទេសថៃ ក្នុងគោលបំណងបំពេញទស្សនកិច្ចផ្លូវការ” ដូចនេះឆ្នាំ២០២៤ ក្រសួងអធិការ នឹងបំពេញទស្សនកិច្ចផ្លូវការ ហើយស្នើភាគីមិត្តថៃ ជួយរៀបចំសម្របសម្រួលទស្សនកិច្ចផ្លូវការ ដើម្បីសិក្សារៀនសូត្រ ដកស្រង់ និងផ្លាស់ប្ដូរបទពិសោធន៍ជាមួយស្ថាប័នប្រហាក់ប្រហែលរបស់ប្រទេសថៃ ជាមួយគ្នានេះ ភាគីទាំងពីរនឹងពិនិត្យលទ្ធភាពចុះ MOU រវាងក្រសួង និងស្ថាប័នប្រហាក់ប្រហែល នៅព្រះរាជាណាចក្រថៃដែល ផ្តោតលើការងារអធិការកិច្ច និងអភិបាលកិច្ចល្អដែលជាបេសកកម្មចម្បងរបស់ក្រសួង និងផ្តល់អ្នកប្រឹក្សា ឬ អ្នកជំនាញបច្ចេកទេសលើវិស័យអធិការកិច្ច និងការរៀបចំសេចក្តីព្រាងច្បាប់បណ្ដឹងតវ៉ា និងបណ្ដឹងបរិហា ព្រមទាំងផ្តល់ការបណ្តុះបណ្តាល និងការផ្តល់នូវព័ត៌មានពីអាហារូបករណ៍របស់ព្រះរាជាណាចក្រថៃមកក្រសួងអធិការកិច្ចផ្ទាល់៖ កសាង និងពង្រឹងសមត្ថភាពមន្ត្រីលើវិស័យអធិការកិច្ច, ជំនាញទន់ និងព័ត៌មានវិទ្យា ព្រមទាំងជួយអភិវឌ្ឍន៍វិទ្យាស្ថានជាតិអធិការកិច្ចរបស់ក្រសួង ជាពិសេសជួយផ្តល់ព័ត៌មានផ្ទាល់មកក្រសួងអធិការកិច្ចពីអាហារូបករណ៍ ដើម្បីជាឱកាសដល់មន្ត្រីរាជការក្រសួងអាចរៀបចំដាក់ពាក្យស្នើសុំទាន់ពេលវេលា ៕