រដ្ឋបាលខេត្តសៀមរាប រៀបចំប្រកួតប្រណាំងទូក ដើមី្បអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅដងស្ទឹងខេត្តសៀមរាប
ភ្នំពេញ៖ នៅថ្ងៃទី២៦ ខែវិច្ឆិកា ឆ្នាំ២០២៣ នៅដងស្ទឹងខេត្តសៀមរាប មានធ្វើការប្រកួតប្រណាំងទូក ដើមី្បអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលប្រព្រឹត្តទៅក្រោមអធិបតីភាពរបស់ ឯកឧត្តម អ៊ាន ឃុន ប្រធានក្រុមប្រឹក្សាខេត្ត ឯកឧត្តម ប្រាក់ សោភ័ណ អភិបាលខេត្តសៀមរាប ដោយមានការអញ្ជើញ ចូលរួមពីសំណាក់ឯកឧត្តម លោកឧកញ៉ា លោកជំទាវ អ្នកតំណាងរាស្ត្រ គណៈអភិបាលខេត្ត សមាជិកក្រុមប្រឹក្សាខេត្ត មេបញ្ជាការកងកម្លាំងប្រដាប់អាវុធ និង វត្តមានចូលរួមរបស់ឯកឧត្តម លោកជំទាវជាប្រធានក្រុមប្រឹក្សាខេត្ត គណៈអភិបាលខេត្តឧត្តរមានជ័យ ខេត្តបន្ទាយមានជ័យ ព្រះវិហារ កំពង់ធំ ព្រមទាំងថ្នាក់ដឹកនាំមន្ទីរ មន្ត្រីរាជការ អាជ្ញាធរ ក្រុង ស្រុក អង្គការសង្គមស៊ីវិល វិស័យឯកជន ភ្ញៀវជាតិ អន្តរជាតិ និង ប្រជាពលរដ្ឋ បានចូលរួមទស្សនាកម្សាន្តយ៉ាងច្រើនកុះករផងដែរ។
តាមសេចក្តីរាយការណ៍របស់លោក អ៊ឹង គឹមលាង ប្រធានគណៈកម្មការបច្ចេកទេស បានបញ្ជាក់ឲ្យដឹងថា ក្នុងឆ្នាំ២០២៣នេះ ការប្រណាំងទូក(ង) មានទូកចូលរួមចំនួន ៣២ទូក មានទូកនារី ០៣ទូក ដែលមានចំណុះ ២២នាក់ ហើយ មានកីឡាករ កីឡាការី សរុប ៨២១នាក់ នារី ៨៩នាក់ តាមប្រភេទទូកខ្នាតអន្តរជាតិ ដែលបានកំណត់ដោយគណៈកម្មាធិការជាតិកីឡាអូឡាំពិច ដើម្បីសម្រាប់ប្រកួតជាលក្ខណៈជាតិ អន្តរាជាតិ។ ក្នុងពិធីប្រណាំងទូក(ង)នេះ ក៏មានទូកមកពីខេត្ត ព្រះវិហារ បានចូលរួមផងដែរ ព្រមទាំងការប្រកួតប្រណាំងនូវក្រឡោ ចំនួន១០ ដែលជាសម្បត្តិវប្បធម៌ប្រពៃណីខ្មែរយើងនៅខេត្តសៀមរាប។
មានប្រសាសន៍បើកការប្រកួតប្រណាំងទូក(ង)នាឱកាសនោះ ឯកឧត្តម ប្រាក់ សោភ័ណ ក៏បានលើកឡើងថា ជារៀងរាល់ឆ្នាំ នៅលើទីដីប្រវត្តិសាស្រ្តខេត្តសៀមរាប តែត្រូវបានខកខានរៀបចំពិធីនេះ ក្នុងពេលនៅលើពិភពលោក ជួបនូវ វិបត្តិជំងឺកូវីដ-១៩ រយៈពេលពីរឆ្នាំ។ រដ្ឋបាលខេត្តសៀមរាប បានរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលប្រព្រឹត្តទៅក្នុងលក្ខខណ្ឌ សន្តិសុខ សណ្តាប់ធ្នាប់ និងសុវត្ថិភាព សង្គមល្អប្រសើរ ដែលកត្តាចំបងនេះ បានកំពុងធ្វើការស្តារឡើងវិញលើវិស័យទេចរណ៍ សំដៅទាក់ទាញភ្ញៀវទេសចរនៅលើពិភពលោក ចូលមកទស្សនាកម្សាន្តកាន់តែច្រើនឡើងៗ។
ឯកឧត្តម ប្រាក់ សោភ័ណ បានបន្តទៀតថា ព្រះរាជពិធីបុណ្យបណ្តែតប្រទីប គឺជាការឧទ្ទិស ដល់អារុក្ខ អារក្ស អ្នកតា បារមីថែរក្សាទឹកដី ដើម្បីសុំសេចក្តីសុខក្សេមក្សាន្តដល់កូនចៅ ដែលរស់នៅឲ្យទទួលបានសុខសុភមង្គលចំរើនរុងរឿង និងដើម្បីព្យាករណ៍អាកាសធាតុសម្រាប់បង្កបង្កើនផលនៅឆ្នាំបន្ទាប់ផងដែរ។ ឯកឧត្តម ប្រាក់ សោភ័ណ ក៏លើកឡើងផងដែរថា ក្រោយពីបានទទួលនូវសមទ្ធិផលធំៗ ផ្លូវ៣៨ខ្សែ និងអាកាសយានដ្ឋានថ្មី ធ្វើឲ្យកំណើននៃភ្ញៀវទេសចរណ៍មានការកើនឡើងផងដែរ។
ក្នុងរយៈពេលកន្លងមក រដ្ឋបាលខេត្ត ក្រុងបានយកចិត្តទុកដាក់ខ្ពស់បំផុតក្នុងការរៀបចំកែលម្អសោភ័ណភាព និងប្រមូលផ្តុំធនធានក្នុងការរៀបចំកែសម្រួល ជួសជុល ស្ថាបនាហេដ្ឋារចនាសម្ព័ន្ធក្នុងក្រុង គួបផ្សំជាមួយនឹងការជួយជ្រោមជ្រែងពីរាជរដ្ឋាភិបាល ក្រសួងស្ថាប័នពាក់ព័ន្ធ ដៃគូអភិវឌ្ឍន៍ ផ្នែកឯកជន និងបណ្តាខេត្ត ក្រុងជាសម្ព័ន្ធមេត្រីភាព ដើម្បីរៀបចំ ផែនការមេអភិវឌ្ឍន៍ទីក្រុងសៀមរាបឲ្យបានសមស្របទៅនឹងស្ថានភាព ភូមិសាស្ត្រ ធម្មជាតិបៃតង។ ក្នុងន័យនេះ យើងក៏មានមោទនភាព ដោយក្រុងសៀមរាបយើងទទួលបាននូវកិត្តិនាមដ៏ល្បីខ្ទរខ្ទារនៅលើពិភពលោក ក្លាយជាគោលដៅរបស់ភ្ញៀវទេសចរ លើពិភពលោក ចូលមកទស្សនាកម្សាន្ត។
ឯកឧត្តមបណ្ឌិតក៏បានធ្វើការផ្តាំផ្ញើ ដល់ជនរួមជាតិទាំងអស់ ដែលចូលរួមក្នុងព្រះរាជពិធីបុណ្យអុំទូកនេះសូមចូលរួមថែរក្សានូវអនាម័យ បរិស្ថាន ក្នុងការលើកស្ទួយវប្បធម៌ សោភ័ណ្ឌភាពក្រុងប្រវត្តិសាស្ត្រអង្គរ ព្រមទាំងរក្សាការពារនូវទ្រព្យសម្បត្តិផ្ទាល់ខ្លួន សំខាន់កុមារតូចៗ នៅក្នុងពិធីបុណ្យផងដែរ៕
