រាជរដ្ឋាភិបាល នឹងជំរុញការវិនិយោគបង្កើតរោងចក្រ តំបន់សេដ្ឋកិច្ចពិសេសបន្ថែមទៀត តាមបណ្តោយផ្លូវជាតិលេខ៥
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា រាជរដ្ឋាភិបាលនឹងខិតខំជំរុញការវិនិយោគបង្កើតរោងចក្រ ក៏ដូចជាតំបន់សេដ្ឋកិច្ចពិសេសបន្ថែមទៀតនៅតាមបណ្តោយផ្លូវជាតិលេខ៥ ដែលនាំឱ្យខេត្តដែលស្ថិតនៅតាមបណ្តោយផ្លូវនេះ មានសេដ្ឋកិច្ចកាន់តែរីកចម្រើន ហើយប្រជាជនមានការងារធ្វើដោយមិនចាំបាច់ចំណាកស្រុក។
ក្នុងឱកាសដែលសម្តេចអញ្ជើញសម្ពោធដាក់ឱ្យប្រើប្រាស់កំណាត់ផ្លូវជាតិលេខ៥ ពីព្រែកក្តាម រហូតដល់ខេត្តបាត់ដំបង និងបើកការដ្ឋានសាងសង់ផ្លូវពីសិរីសោភ័ណ ទៅកាន់ប៉ោយប៉ែត នាថ្ងៃទី២២ ខែវិច្ឆិកា ឆ្នាំ២០២៣នេះ សម្តេចបានថ្លែងថា ផ្លូវជាតិលេខ៥ គឺជាសរសៃឈាមដ៏សំខាន់សម្រាប់កម្ពុជា និងបានដើរតួនាទីក្នុងការតភ្ជាប់ផ្លូវនានាពីខេត្តមួយទៅខេត្តមួយ និងភ្ជាប់ជាមួយប្រទេសជិតខាង ដែលជំរុញឱ្យខេត្តដែលស្ថិតនៅតាមបណ្តាយផ្លូវជាតិលេខ៥ កាន់តែមានសេដ្ឋកិច្ចរីកចម្រើន។ ជាក់ស្តែងខេត្តកំពង់ឆ្នាំង ពោធិ៍សាត់ ដែលកន្លងមកជាខេត្តដែលគេទៅហួសមកហួស តែបច្ចុប្បន្ននេះ មានការវិនិយោគរោងចក្រជាបន្តបន្ទាប់ ដូចជារោងចក្រកាត់ដេរសម្លៀកបំពាក់ រោងចក្រដំឡើងរថយន្តហ្វត ខណៈក្រុមហ៊ុនមីនីបៀរ ក៏មានគម្រោងទៅវិនិយោគនៅទីនោះទៀតផង។ នាពេលខាងមុខ រាជរដ្ឋាភិបាលនឹងជំរុញការវិនិយោគបង្កើតតំបន់សេដ្ឋកិច្ចពិសេស នៅតាមបណ្តាយផ្លូវជាតិលេខ៥នេះបន្ថែមទៀត ដើម្បីបង្កើតការងារបានកាន់តែច្រើន ប្រជាជននៅក្នុងតំបន់ មិនចាំបាច់ត្រូវចំណាកស្រុកទៅឆ្ងាយទៀតឡើយ។
សម្តេចធិបតីមានប្រសាសន៍បន្ថែមទៀតថា«ហ្នឹងហើយជាសារៈសំខាន់នៃហេដ្ឋារចនាសម្ព័ន្ធរបស់យើង ផ្លូវជាតិលេខ៥ ដែលចិញ្ចឹមសរសៃរឈាម។ គោលដៅរបស់យើង គឺសមធម៌នេះ មិនមែនឱ្យការរីកចម្រើនប្រមូលផ្តុំនៅតែភ្នំពេញនោះទេ ធ្វើយ៉ាងណាយើងរុញឱ្យដល់មូលដ្ឋាន ផ្លូវ ទឹកភ្លើង ឥលូវនេះភ្លើងយើងសឹងតែមានគ្រប់ឃុំអស់ហើយ នៅសល់តែមួយចំនួនតិចណាស់ ហើយយើងដាក់គោលដៅតភ្ជាប់ ទឹកស្អាតរបស់យើងបានច្រើន យើងធ្វើប្រព័ន្ធធារាសាស្រ្តផ្សេងៗទៀត ពិតណាស់មិនទាន់ស្រោចទូទាំងប្រទេស តែយើងនឹងជំរុញខិតខំ» ៕
