ភ្នំពេញ៖ សត្វស្លាបទឹកចំនួន៧ប្រភេទ កំពុងពងកូននៅតំបន់ការពារទេសភាពបឹងព្រែកល្ពៅ ដែលនេះជា សញ្ញាមួយបញ្ជាក់ថា តំបន់នេះ នៅមានសក្តានុពលសម្រាប់ធនធានជីវៈចម្រុះគ្រប់ប្រភេទ បន្តរស់នៅ តំបន់នេះ។
លោក ប៊ូ វរសក្ស នាយកកម្មវិធីអង្គការជីវិតធម្មជាតិប្រចាំកម្ពុជាបានឱ្យដឹងថា មន្ត្រីឧទ្យានុរក្សស្នាក់ការ តំបន់ការពារទេសភាពបឹងព្រែកល្ពៅ និងក្រុមការងារអង្គការជីវិតធម្មជាតិនៅកម្ពុជា បានកត់ត្រា សំបុក សត្វស្លាបប្រចាំឆ្នាំនៅតំបន់ការពារទេសភាពបឹងព្រែកល្ពៅ ដោយជាលទ្ធផល មានសត្វស្លាបទឹក ចំនួន ៧ប្រភេទ បានធ្វើសំបុកពងកូននៅតំបន់នេះ ដែលរួមមាន សត្វស្មោញ ចង្កៀលខ្យង ក្អែកទឹកតូច ខ្វែក ក្រសារប្រផេះ ក្រសារធ្នង់ និងកុកគ្រោងតូច។
លោកបានបន្តថា បើយោងតាមមន្រ្តីជំនាញបានបញ្ជាក់ថា ចំនួនសំបុកសត្វមានការថយចុះខ្លាំង បើប្រៀបធៀបនឹងឆ្នាំកន្លងទៅ ព្រោះព្រៃលិចទឹកធំៗ ដែលជាទ្រនំពងកូនបាត់បង់ដោយបានងាប់ពីតំបន់ និងសំបុកមួយចំនួនរងការលិចទឹក ដោយសារតែសត្វស្លាបបានធ្វើសំបុកលើព្រៃលិចទឹកទាប។
«សកម្មភាពជាគោលដៅវែងឆ្ងាយរបស់យើងសម្រាប់ការងារអភិរក្សយើងមានការគាំទ្រទៅដល់ ឧទ្យានុរក្សនូវរដូវពងកូននេះមានការល្បាតយកចិត្តទុកដាក់នៅជុំវិញតំបន់ពងកូនហ្នឹងហើយយើងក៏បានអប់រំផ្សព្វផ្សាយដល់សហគមន៍មូលដ្ឋានកុំប្រព្រឹត្តបទល្មើស បញ្ហាផ្លូវច្បាប់មួយចំនួនប្រសិនបើគាត់ប្រព្រឹត្ត បទល្មើស នឹងទទួលទោសទណ្ឌក៏ដូចជាសារៈសំខាន់ពីការអភិរក្សនិងគ្រោង ដាំស្តារព្រៃឈើឡើងវិញ ពីព្រោះព្រៃឈើវាបានងាប់មួយចំនួន»។
លោកបានបន្ថែមថា អង្គការជីវិតធម្មជាតិគ្រោងនឹងដាំស្តារព្រៃលិចទឹកឡើងវិញ ដើម្បីបង្កើតគម្របព្រៃឈើ សម្រាប់ឱ្យសត្វស្លាបគ្រប់ប្រភេទវាកាច់សំបុកពងកូន ដោយសារបច្ចុប្បន្ននេះ នៅតំបន់ការពារទេសភាព បឹងព្រែកល្ពៅ ជម្រកព្រៃលិចទឹកមួយចំនួនត្រូវបានងាប់ដោយសារទឹកជំនន់។
លោកបានបន្ថែមទៀតថា មកទល់ពេលនេះអង្គការជីវិតធម្មជាតិបានធ្វើសកម្មភាពអប់រំដល់ប្រជាពលរដ្ឋនៅក្នុងភូមិគោលដៅជុំវិញតំបន់ការពារទេសភាពបឹងព្រែកល្ពៅ តាមរយៈការប្រជុំជាក្រុម ផ្តោតការផ្សព្វផ្សាយនិងពិភាក្សាអំពី សារ:សំខាន់នៃតំបន់ការពារទេសភាពបឹងព្រែកល្ពៅ ដែលជាប្រភពជីវ:ចម្រុះសម្រាប់ផ្គត់ផ្គង់ជីវភាព សហគមន៍មូលដ្ឋាន នឹងជាកន្លែងផ្តល់ចំណីដល់សត្វស្លាបទឹក ជាពិសេសសត្វក្រៀល និងអំពីបញ្ហា ប្រឈមនឹងបទល្មើសកើតមានក្នុងតំបន់នេះ ។
សូមជម្រាបថា គម្រោងអភិរក្សនិងគ្រប់គ្រងតំបន់ដីសើមបឹងព្រែកល្ពៅ ស្ថិតក្រោមកិច្ចសហការរវាង ក្រសួងបរិស្ថាន (ដែលមានមន្ទីរបរិស្ថានខេត្តតាកែវ ជាសេនាធិការ) អង្គការជីវិតសត្វស្លាបអន្តរជាតិ អង្គការជីវិតធម្មជាតិនៅកម្ពុជា និងអង្គការWWT។ តំបន់ការពារទេសភាពបឹងព្រែកល្ពៅមានផ្ទៃដីទំហំ ៨៣០៥ ហិកតាស្ថិតនៅក្នុងភូមិសាស្ត្រខេត្តតាកែវ៕
