សម្តេចធិបតី៖ មនុស្សគ្រប់រូបចាំបាច់ត្រូវមានការងារធ្វើ ដើម្បីចិញ្ចឹមជីវភាព

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ពាក្យថា «វិស័យការងារ» គឺផ្តោតទៅលើជីវភាពប្រចាំរបស់ប្រជាពលរដ្ឋ ពីព្រោះមនុស្សយើងកើតមកត្រូវមានការងារ មិនថាតែនៅក្នុងវិស័យកសិកម្មនោះទេ។ សម្ដេចបានគូសបញ្ជាក់ថា សូម្បីតែកាលពីជំនាន់ដើម ដែលមនុស្សមិនទាន់កើតជាសហគមន៍ នៅជាមនុស្សព្រៃ មនុស្សភ្នំ ឬមនុស្សកុលសម្ព័ន្ធក្ដី ក៏ត្រូវមានការងារធ្វើដែរ ពោលគឺបរបាញ់សត្វ ដើររកអាហារ ដើម្បីចិញ្ចឹមជីវភាព។

សម្តេចធិបតី ហ៊ុន ម៉ាណែត បានថ្លែងបែបនេះក្នុងឱកាសដែលសម្តេច បានអញ្ជើញចុះជួបសំណេះសំណាលជាមួយបងប្អូនកម្មករ និយោជិត ចំនួន ១៨,១០៨នាក់ នៅតាមបណ្តារោងចក្រ សហគ្រាសចំនួន ១៣រោងចក្រ ដែលមានមូលដ្ឋានក្នុងខណ្ឌកំបូល រាជធានីភ្នំពេញ នាព្រឹកថ្ងៃទី២១ ខែវិច្ឆិកា ឆ្នាំ២០២៣។

សម្តេចធិបតី នាយករដ្ឋមន្ត្រី បានថ្លែងបន្តថា ទំនើបកម្មការងារ បានរៀបចំជាវិស័យផ្សេងៗ ហើយនៅទីនេះ មានវិស័យឧស្សាហកម្ម មានរោងចក្រ ដែលបានប្រមូលផ្តុំ មានលក្ខណៈទំនើបជាងមុន។

សម្ដេចធិបតី នាយករដ្ឋមន្ត្រី បានសង្កត់ធ្ងន់ថា គឺរាជរដ្ឋាភិបាលបាននិងកំពុងបន្តធ្វើកិច្ចការងារទាំងអស់នេះ អស់រយៈពេលជាង ៤០ឆ្នាំ មកហើយ ដើម្បីបង្កើតការងារជូនប្រជាពលរដ្ឋ ៕