នាយករដ្ឋមន្ត្រី លើកទឹកចិត្តឲ្យវិនិយោគិនក្នុងស្រុក ដាក់លក់ផលិតផល លើទីផ្សារអនឡាញ Alibaba

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងលើកទឹកចិត្តឲ្យអ្នកវិនិយោគក្នុងស្រុក ដាក់លក់ផលិតផលរបស់ខ្លួន នៅលើទីផ្សារអនឡាញធំរបស់ចិន អាលីបាបា ។

ក្នុងពិធីប្រកាសដាក់ឱ្យអនុវត្តជាផ្លូវការនូវកម្មវិធីគោលនយោបាយអាទិភាពទី៥ និងទី៦ របស់រាជរដ្ឋាភិបាល ដើម្បីលើកស្ទួយផលិតកម្មកសិកម្ម រកទីផ្សារ និងរក្សាលំនឹងថ្លៃកសិផល តាមរយៈកម្មវិធីហិរញ្ញប្បទាន នាថ្ងៃទី២០ វិច្ឆិកា សម្តេចធិបតី ហ៊ុន ម៉ាណែត បានបញ្ជាក់ថា ក្រៅពីការធ្វើពាណិជ្ជកម្ម ទៅនឹងពាណិជ្ជកម្ម Business To Business និងការចុះនូវកិច្ចព្រមព្រៀងសេរីជាមួយនឹងបណ្ដាលប្រទេសជាដៃគូ កម្ពុជា ក៏គួរមានបង្កើតនូវរូបមន្តមួយបន្ថែម គឺធ្វើយ៉ាងណាអោយអ្នកលក់ អ្នកដាក់លក់ផលិតផលរបស់ខ្លួន នៅលើទីផ្សារធំរបស់ចិន Alibaba ដើម្បីទាញយកអត្ថប្រយោជន៍ពីទីផ្សារដ៏ធំមួយនេះ។

គួរំលឹកដែរថា ក្នុងជំនួបពិភាក្សាការងារ នាឱកាសនៃការចូលរួមក្នុង “វេទិកាខ្សែក្រវាត់ និងផ្លូវ លើកទី៣” នៅរដ្ឋធានីប៉េកាំង កាលពីពេលថ្មីៗកន្លងទៅ ក្រសួងពាណិជ្ជកម្មកម្ពុជា រួមជាមួយនឹងក្រុមហ៊ុន Alibaba បានចុះហត្ថលេខាលើ “អនុស្សារណៈនៃការយោគយល់ ដើម្បីដាក់លក់ដោយត្រង់នូវផលិតផលកម្ពុជាលើទីផ្សារចិន ក៏ដូចជាបណ្តាប្រទេសអាស៊ាន តាមរយៈ “ថ្នាលពាណិជ្ជកម្មសកលតាមប្រព័ន្ធអេឡិចត្រូនិក-Platform eWTP)” និងជំរុញការធ្វើពាណិជ្ជកម្មតាមប្រព័ន្ធអេឡិចត្រូនិក ៕