សម្តេចធិបតី៖ កុំប្រកួតប្រជែងគ្នាឯង ក្នុងប្រទេសរហូតដល់បាត់បង់លទ្ធភាព ប្រកួតប្រជែងនៅក្រៅប្រទេស

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្នើឲ្យប្រតិបត្តិករ ក៏ដូចជាវិស័យឯកជនដែលជួញដូរ-នាំចេញផលិផលកសិកម្ម និងផលិតផលផ្សេងៗទៀត កុំប្រកួតប្រជែងគ្នាឯងនៅក្នុងប្រទេសរហូតដល់បាត់បង់លទ្ធភាពប្រកួតប្រជែងនៅក្រៅប្រទេស ។

ក្នុងពិធីប្រកាសដាក់ឱ្យអនុវត្តជាផ្លូវការនូវកម្មវិធីនយោបាយចំនួន៣ទៀត ពាក់ព័ន្ធនឹងវិស័យកសិកម្ម នាថ្ងៃទី២០ ខែវិច្ឆិកា សម្ដេចធិបតីបានឱ្យដឹងថា ប្រទេសកម្ពុជាជាប្រទេសនាំចេញកសិកម្ម ហើយក៏ប្រកួតប្រជែងជាមួយប្រទេសជិតខាងដែលជាគោលដៅនាំចេញផលិតផលដ៏ធំសម្រាប់ទីផ្សារពិភពលោកផងដែរ តែនេះមិនមែនបានន័យថាកម្ពុជាគ្មានទីផ្សារនោះទេ គឺគ្រាន់ផលិតផលកម្ពុជានៅមានការចន្លោះប្រហោងដែលត្រូវពង្រឹងបន្ថែម ពីព្រោះអ្នកបញ្ជាទិញក៏គេមានជម្រើសក្នុងការទិញផលិតផលពីប្រទេសកម្ពុជា ឬប្រទេសផ្សេងៗទៀតដែរ ប្រសិនបើកម្ពុជាពង្រឹងគុណភាពផលិតផលរបស់ខ្លួនបានល្អអ្នកបញ្ជាទិញក៏នឹងងាកមកទិញពីកម្ពុជាថែមទៀតដូចគ្នា។

សម្ដេចបញ្ជាក់ថា «យើងត្រូវរួមគ្នាគិតគូរពីការប្រកួតប្រជែងផ្ទៃក្នុង តែកុំឱ្យប្រកួតរហូតដល់បាត់ការប្រកួតប្រជែងជាមួយប្រទេសជិតខាង……យើងសុខចិត្តយកលេខ១០ក្នុងក្រុមលេខ១ ជាជាងយកលេខ១ក្នុងក្រុមលេខ១០ បានន័យថា ត្រូវមានការកិច្ចសការ ព្រោះយើងម្នាក់ៗមិនអាចផលិតម្នាក់ឯងនោះទេ»។

សម្ដេចធិបតីបានសង្កត់ធ្ងន់ថា «ការគិតពីផលប្រយោជន៍រួមនៃវិស័យទាំងមូលរបស់កម្ពុជា ជាជាងផលប្រយោជន៍របស់ក្រុមហ៊ុនណាមួយ»។

សម្ដេចធិបតីបន្ថែមថា ប្រសិនបើប្រទេសកម្ពុជាស្ថិតក្នុងក្រុមប្រទេសមានការប្រកួតប្រជែងខ្ពស់ គឺជារឿងល្អ តែប្រសិនបើកម្ពុជាបានលេខ១ តែស្ថិតក្នុងក្រុមប្រទេសមានការប្រកួតប្រជែងទាប នោះមិនសូវឈ្នះគេទេ ផលលាភក៏មិនសូវបានច្រើនដែរ ៕