អភិបាលរងខេត្តក្រចេះ ណែនាំដល់ក្រុមកីឡាករទូក ង ត្រូវខិតខំហ្វឹកហាត់ និងរួមកម្លាំងគ្នាដើម្បីយកជ័យជម្នះ និងកិត្តិយសជូនខេត្ត
ភ្នំពេញ៖ នៅរសៀលថ្ងៃពុធ ៣កើត ខែកត្ដិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៥ ខែវិច្ឆិកា ឆ្នាំ២០២៣ ឯកឧត្តម ហង់ ចាន់ឌី អភិបាលរងខេត្តក្រចេះ បានអញ្ជើញដឹកនាំកិច្ចប្រជុំ និងណែនាំដល់គណៈកម្មាការគ្រប់គ្រងទូក ង ដែលមានឈ្មោះត្រូវទៅធ្វើការប្រកួតប្រណាំងក្នុងព្រះរាជពិធីបុណ្យអុំទូក បណ្តែតប្រទីត និងសំពះព្រះខែ អកអំបុក នាថ្ងៃទី២៦-២៧-២៨ ខែវិច្ឆិកា ឆ្នាំ២០២៣ ខាងមុខនេះ ។
ឯកឧត្ដមអភិបាលរងខេត្ត ក៏បានណែនាំដល់ គណៈកម្មការ និងក្រុមកីឡាករទូក ង ត្រូវគោរពវិន័យបទបញ្ជា មានការឯកភាពផ្ទៃក្នុងល្អ និងចេះយោគយល់អធ្យាស្រ័យគ្នាទៅវិញទៅមក ត្រូវខិតខំហ្វឹកហាត់ និងរួមកម្លាំងគ្នាដើម្បីធ្វើយ៉ាងណាឲ្យទូក ង កាន់តែលឿនជាងមុនដើម្បីយកជ័យជម្នះ និងកិត្តិយសជូនខេត្ត និងហាមដាច់ខាតមិនត្រូវពិសារគ្រឿងស្រវឹង។
សូមបញ្ជាក់ដែរថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នឹងឈានចូលមកដល់នាថ្ងៃទី២៦-២៧-២៨ ខែវិច្ឆិកា ឆ្នាំ២០២៣ ខាងមុខនេះ ហើយសម្រាប់ខេត្តក្រចេះ មានទូក ង ចំនួន២០ទូក ក្នុងនោះមានទូក ង ខ្នាតពិសេសចំនួន៤ទូក ៕
