មន្ទីរវប្បធម៌ខេត្តកំពង់ស្ពឺ ប្រគល់-ទទួល បដិមាតោថ្ម ចំនួន៦ ស្ថិតនៅភូមិចំការហ្លួង សង្កាត់វាំងចាស់

ភ្នំពេញ៖ លោក ស៊ុន មានជ័យ ប្រធានមន្ទីរវប្បធម៌ និង វិចិត្រសិល្បៈ ខេត្តកំពង់ស្ពឺ និងសហការី បានចុះទៅធ្វើពិធីប្រគល់-ទទួល បដិមាតោថ្ម ចំនួន ៦ ដែលស្ថិតនៅភូមិចំការហ្លួង សង្កាត់វាំងចាស់ ក្រុងឧដុង្គម៉ែជ័យ។

ចំពោះបដិមាតោថ្ម ទាំង ៦ នេះ បើតាមការវាយតម្លៃពីមន្រ្ដីជំនាញ បានសន្និដ្ឋាន ជាបឋម លើចំណុចចំនួន ២ គឺ៖ ទី១ សិល្បៈចម្លាក់បដិមាតោនេះ ប្រហែលស្ថិតក្នុង សម័យក្រោយអង្គរ (សម័យកណ្ដាល អំឡុងសតវត្សរ៍ទី១៦) ជាសម័យកាល ដែលជាងចម្លាក់ និយមតែចម្លាក់ឈើ មិនសូវនិយមចម្លាក់ថ្ម ហើយចម្លាក់តោថ្ម ដែលដាក់លម្អ តាមខ្លោងទ្វារចូលផ្ទះ វត្ត ចេតិយ ដែលបន្សល់មកតិចតួច គឺជាចម្លាក់ បដិមាតោ យកតាមគម្រូនៃសិល្បៈសម័យមុនអង្គរ។

ទី២ បដិមាតោថ្មទាំង ៦ នេះ ប្រហែលជាសិល្បៈចម្លាក់ ស្ថិតក្នុងរចនាបថបាយ័ន ប៉ុន្តែបើតាមស្ថានភាព នៃទម្រង់សិល្បៈចម្លាក់ទាំងនេះ ភាគច្រើន អាចជាស្នាដៃនៃ សិល្បៈចម្លាក់ បែបជនបទ ឬជាសិល្បៈចម្លាក់ ដែលមានការវិវត្តជាបន្ត ពេលក្រោយៗ មកទៀត ដែលយើងមើលទៅមិនមានក្បាច់លម្អ តាមសិល្បៈចម្លាក់ដើម…។

គួរបញ្ជាក់ផងដែរថា បដិមាតោថ្មទាំង ៦ នេះ ត្រូវបានលោក ទិត ភុំ និងក្រុមគ្រួសារ បានរក្សាទុកជាច្រើនឆ្នាំ កន្លងមកហើយ។ ដោយសារតែលោក និងក្រុមគ្រួសារ មានបំណងប្រគល់ជូន មន្ទីរវប្បធម៌ និងវិចិត្រសិល្បៈ រក្សាទុកជាបេតិកភណ្ឌវប្បធម៌ជាតិ ទើបនៅថ្ងៃសុក្រនេះ ក្រុមការងាររបស់មន្ទីរ បានទៅធ្វើពិធី-ប្រគល់ទទួល ដើម្បីយកមក រក្សាទុកនៅមន្ទីរវប្បធម៌ និងវិចិត្រសិល្បៈខេត្តវិញ៕