រាជរដ្ឋាភិបាលប្រកាសដាក់ឱ្យអនុវត្តនីតិវិធីរួម សម្រាប់ប្រព័ន្ធស្បៀងបម្រុងកម្ពុជា ជំរុញដំណើរការចែកជូនពលរដ្ឋរងគ្រោះ ឱ្យកាន់តែមានប្រសិទ្ធភាព
ភ្នំពេញ៖ រាជរដ្ឋាភិបាលកម្ពុជា បានតាមរយៈក្រសួងសេដ្ឋកិច្ច និងហិរញ្ញវត្ថុ បានប្រកាសដាក់ឱ្យអនុវត្តនូវ «នីតិវិធីរួមសម្រាប់ប្រព័ន្ធស្បៀងបម្រុងកម្ពុជា» ដែលបង្ហាញពីការគិតគូរ របស់រាជរដ្ឋាភិបាលលើការត្រៀមស្បៀងបម្រុងទុកចែកជូនប្រជាពលរដ្ឋក្រីក្រ និងងាយរងគ្រោះ ដែលត្រូវការជំនួយចាំបាច់ ក្នុងអំឡុងគ្រោះមហន្តរាយផ្សេងៗ ខណៈគិតមកទល់ដំណាច់ខែតុលានេះ រាជរដ្ឋាភិបាលបានបញ្ចេញស្បៀង និងគ្រាប់ពូជដំណាំបានចែកជូនដល់កសិករបានជិត ៣០ម៉ឺនតោន។
ក្នុងពិធីប្រកាសដាក់ឱ្យអនុវត្តនូវ «នីតិវិធីរួមសម្រាប់ប្រព័ន្ធស្បៀងបម្រុងកម្ពុជា»ថ្ងៃទី២ ខែវិច្ឆិកា ឆ្នាំ២០២៣នេះ នៅសណ្ឋាគារសូហ្វីតែល អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានថ្លែងថា នីតិវិធីរួមសម្រាប់ប្រព័ន្ធស្បៀងបម្រុងកម្ពុជា មានសារៈសំខាន់ណាស់ ពោលគឺជាផែនទីចង្អុលផ្លូវ សម្រាប់ការអនុវត្តការងារ ការសហការ និងការសម្របសម្រួលនានា រវាងលេខាធិការដ្ឋាននៃគណៈកម្មាធិការប្រព័ន្ធស្បៀងបម្រុងកម្ពុជា (ប.ស.ប.ក.) ក្រសួង-ស្ថាប័ន ពាក់ព័ន្ធ រដ្ឋបាលថ្នាក់ក្រោមជាតិ និងភាគីពាក់ព័ន្ធទាំងអស់ ដើម្បីឱ្យដំណើរការនៃការចាត់ចែង និងប្រើប្រាស់ស្បៀងបម្រុង គ្រាប់ពូជស្រូវ និងបន្លែ របស់ ប.ស.ប.ក. ដែលរាជរដ្ឋាភិបាលបាន «ដាក់ក្នុងពាងរួម» ទុកសម្រាប់ត្រៀមផ្ដល់ជូនប្រជាពលរដ្ឋក្រីក្រ និងងាយរងគ្រោះ ដែលត្រូវការជំនួយចាំបាច់ ក្នុងអំឡុងគ្រោះមហន្តរាយផ្សេងៗ បានប្រកបដោយប្រសិទ្ធភាព ស័ក្តិសិទ្ធភាព តម្លាភាព និងគណនេយ្យភាព។
អគ្គបណ្ឌិតសភាចារ្យបន្តថា រាជរដ្ឋាភិបាលបានប្ដេជ្ញាចិត្ត ក្នុងការលុបបំបាត់ភាពអត់ឃ្លាននៅកម្ពុជា នៅត្រឹមដំណាច់ឆ្នាំ ២០២៥ តាមរយៈការដាក់ចេញនូវគោលនយោបាយ និងយុទ្ធសាស្ត្រជាច្រើន រួមមាន៖ គោលនយោបាយជំរុញផលិតកម្មស្រូវ និងការនាំចេញអង្ករ, គោលនយោបាយជាតិអភិវឌ្ឍន៍វិស័យកសិកម្ម ឆ្នាំ ២០២២-២០៣០, យុទ្ធសាស្ត្រជាតិ ស្ដីពីសន្តិសុខស្បៀង និង អាហារូបត្ថម្ភជាដើម សំដៅលើកកម្ពស់ផលិតភាព និង ធ្វើពិពិធកម្មកសិកម្ម ពង្រឹងសន្តិសុខ និង សុវត្ថិភាពស្បៀង ដើម្បីកាត់បន្ថយភាពក្រីក្រឱ្យបានរហ័ស។
ទន្ទឹមនេះ រាជរដ្ឋាភិបាលក៏មានមហិច្ឆិតា ក្នុងការកែទម្រង់វិស័យកសិកម្មកម្ពុជា ឱ្យវិវត្តឈានឡើងកាន់តែប្រសើរ ដើម្បីធានាស្ថិរភាពស្បៀងនៅក្នុងប្រទេស និងជំរុញការនាំចេញផលិតផលកសិកម្ម ទៅកាន់ទីផ្សារអន្តរជាតិ ។
បន្ថែមលើនេះ រាជរដ្ឋាភិបាលក៏បានគិតគូរ និងយកចិត្តទុកដាក់ខ្ពស់ចំពោះការបម្រុងស្បៀង សម្រាប់ជួយប្រជាពលរដ្ឋក្រីក្រ និងងាយរងគ្រោះ ដែលអាចត្រូវការស្បៀង។ ជាពិសេស នៅពេលមានគ្រោះមហន្តរាយ ឬ គ្រោះធម្មជាតិកើតឡើង។
អគ្គបណ្ឌិតសភាចារ្យ អូន ព័ន្ធមុនីរ័ត្ន បានឱ្យដឹងផងដែរថា មុនពេលប្រព័ន្ធស្បៀងបម្រុងកម្ពុជា (ប.ស.ប.ក.) ត្រូវបានបង្កើតឡើងជាផ្លូវការកាលខែកញ្ញា ឆ្នាំ២០១២ រាជរដ្ឋាភិបាលតែងបម្រុងគ្រាប់ពូជស្រូវ ចំនួន៣០០០តោន ជារៀងរាល់ឆ្នាំ ដើម្បីត្រៀមទុក សម្រាប់ផ្តល់ជូនប្រជាកសិករ ដែលទទួលរងគ្រោះមហន្តរាយធម្មជាតិ ។ យ៉ាងណាមិញ ដើម្បីពង្រឹងប្រសិទ្ធភាព ស័ក្តិសិទ្ធភាព តម្លាភាព និងគណនេយ្យភាព ក្នុងការអនុវត្តតួនាទី និងភារកិច្ចរបស់ ប.ស.ប.ក. ស្របតាមការវិវត្តជាក់ស្តែង រាជរដ្ឋាភិបាលបានធ្វើវិសោធនកម្មជាបន្តបន្ទាប់ចំនួន ២លើក, ពោលគឺលើកទី១ ក្នុងឆ្នាំ ២០១៦ និងលើកទី២ ក្នុង ឆ្នាំ ២០២១។
លោកបណ្ឌិត វង់ សណ្តាប់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានឱ្យដឹងថាការកែទម្រង់ប្រព័ន្ធស្បៀងបម្រុងកម្ពុជាចំនួនពីរនេះ ដើម្បីធានាថា ប្រព័ន្ធស្បៀងបម្រុងកម្ពុជា អាចជួយពលរដ្ឋរងគ្រោះមហន្តរាយ ផ្នែកស្បៀង និងគ្រាប់ពូជដំណាំ (ស្រូវ និងបន្លែ) ទាន់ពេល និងគ្រប់គ្រាន់។ លើកទី១ បានធ្វើឡើងនៅឆ្នាំ២០១៦ ដោយបានកែប្រែពីការលក់គ្រាប់ពូជដណាំ ដោយការបញ្ចុះថ្លៃ ៥០% មកផ្ដល់ដល់កសិករក្រីក្រ និងងាយរងគ្រោះ ដែលរងការខូចខាតដោយឥតគិតថ្លៃ ។លើកទី២ នៅឆ្នាំ២០២១ ដោយបង្កើនស្បៀងបម្រុង និងគ្រាប់ពូជដំណាំបម្រុងទាំងបរិមាណ ទាំងប្រភេទ, សម្រួលដំណើរការអនុម័តស្បៀង និងគ្រាប់ពូជដំណាំពីច្រកច្រើន មកច្រកតែមួយ ហើយទុកតែពីរកម្រិត គឺកំរិតប្រធានគណកម្មាធិការ ប. ស. ប. ក. និង កម្រិតនាយករដ្ឋមន្រ្តី, ពង្រឹងភាពជាម្ចាស់របស់រដ្ឋបាលថ្នាក់ក្រោមជាតិគ្រប់ថ្នាក់ សម្រាប់បង្កើនការសម្រេចចិត្តលឿន ប្រកបដោយប្រសិទ្ធភាព និងស័ក្តសិទ្ធភាព និង ពង្រឹងសមត្ថភាព និងសមត្ថកិច្ចរបស់អង្គភាព និងមន្ទីរជំនាញរបស់ក្រសួងស្ថាប័ននីមួយៗ។
បើតាមលោក វង់ សណ្តាប់ គិតពីថ្ងៃបង្កើត ប.ស.ប.ក.កាលពីខែកញ្ញា ឆ្នាំ២០១២ រហូតដល់ត្រឹមថ្ងៃទី៣០ ខែតុលា ឆ្នាំ២០២៣ រាជរដ្ឋាភិបាលបានបញ្ចេញស្បៀង និងគ្រាប់ពូជដំណាំ( ស្រូវនិងបន្លែ) ដើម្បីជួយពលរដ្ឋនៅគ្រប់ ២៥ រាជធានីខេត្ត ប្រមាណជិត ៣០ម៉ឺនតោន។ក្នុងនោះផ្ដល់ស្បៀងដល់ប្រជាជន ពេលមានគ្រោះមហន្តរាយនានា ជាអង្ករសរុបជាង១៣ ៦៦៨ តោន ដល់ប្រជាជន សរុប ៥៤៨ ៨៤៦ គ្រួសារ ពីរាជធានីខេត្តចំនួន១៧ ដែលរងគ្រោះដោយសារគ្រោះធម្មជាតិ និងរងផលប៉ះពាល់ពីវិបត្តិកូវីដ-១៩ ក្នុងតំបន់បិទខ្ទប់នៅភ្នំពេញ និងក្រុងព្រះសីហនុ។ ផ្តល់គ្រាប់ពូជស្រូវដល់កសិកររងការខូចខាតដំណាំស្រូវ ដោយសារគ្រោះធម្មជាតិ ២៦២ ១៤៤ គ្រួសារ ដោយប្រើគ្រាប់ពូជស្រូវសរុបជាង ២០ ២៥៩ តោន សម្រាប់ស្តារឡើងវិញ ក្នុងរាជធានី-ខេត្តចំនួន២២ និងផ្តល់គ្រាប់ពូជបន្លែដល់កសិកររងការខូចខាតដំណាំដោយសារគ្រោះធម្មជាតិ ១២៣ ៣៣១ គ្រួសារ៕
