កម្លាំងនគរបាលជាង៥០នាក់ ចូលរួមធ្វើការសម្អាតបរិស្ថាន ទីតាំងបណ្តែតប្រទីប ដងស្ទឹងសិរីសោភ័ណ កាលពីចុងសប្តាហ៍
ភ្នំពេញ៖ ដោយមានការចាត់តាំងពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ លោកឧត្តមសេនីយ៍ត្រី ប៊ុន ផេង លោកឧត្តមសេនីយ៍ត្រី សម្បត្តិ កុសល ស្នងការរងបានដឹកនាំកម្លាំងនគរបាលខេត្តនិងក្រុងសិរីសោភ័ណប្រមាណជាង៥០នាក់ ចូលរួមជាមួយគណៈបញ្ជាការឯកភាពរដ្ឋបាលក្រុងសិរីសោភ័ណ ដោយមានការចូលរួមពីមន្ទីរបរិស្ថាន សិស្សានុសិស្ស ក្រុមការងារអភិវឌ្ឍយុវជនខេត្តបន្ទាយមានជ័យ យុវជនកាយរឹទ្ធិ យុវជនកាកបាទក្រហមកម្ពុជា ស.ស.យ.ក អាជ្ញាធរមូលដ្ឋាន ជិត១ពាន់នាក់ បានចូលធ្វើការសម្អាតបរិស្ថាន នាបរិវេណដងស្ទឹងសិរីសោភ័ណ (ស្ពានថ្ម) នៅក្នុងសង្កាត់ព្រះពន្លាក្រុងសិរីសោភ័ណ ដែលជាទីតាំងបណ្តែតប្រទីប អបអរសាទរព្រះរាជពិធីបុណ្យអុំទូក បណ្តែត អកអំបុក និងសំពះព្រះខែ នាខែវិច្ឆកានាពេលខាងមុខ។
គូរបញ្ជាក់ផងដែរថា រដ្ឋបាលខេត្តបន្ទាយមានជ័យ នឹងរៀបចំពិធីប្រណាំងទូក(ង)ថ្នាក់ខេត្ត មានចំនួន២៨ទូក នៅដងស្ទឹងសិរីសោភ័ណ ខាងក្រោយសាកលវិទ្យាល័យជាតិមានជ័យ ដែលនឹងប្រព្រឹត្តទៅនាថ្ងៃទី១១-១២ ខែវិច្ឆិកា ឆ្នាំ២០២៣ នាពេលខាងមុខនេះ ។ ដោយឡែកសម្រាប់ការដាក់តាំងបង្ហាញផលិតផល ភូមិមួយផលិតផលមួយ និងសមិទ្ធផលនានា របស់រដ្ឋបាលខេត្ត អមដោយ ការប្រគុំតន្រ្តីសម័យ ព្រមទាំងមានការរៀបចំកម្មវិធីផ្សេងៗ នៅបរិវេណសួនមានជ័យ នឹងចាប់ផ្ដើមដាក់រៀបចំនៅថ្ងៃទី៦ ខែវិច្ឆិកា ឆ្នាំ២០២៣ ដោយមានស្តង់ពិពណ៌ចំនួន ៨៩ស្តង់។
សម្រាប់ការបណ្តែតប្រទីប និងចាប់ផ្តើមដាក់រៀបចំថ្ងៃទី៦ ខែវិច្ឆិកា ឆ្នាំ២០២៣ ដែលមាន ៣៦ប្រទីប នៅដងស្ទឹងសិរីសោភ័ណ (ស្ពានថ្ម) សង្កាត់ព្រះពន្លា ក្រុងសិរីសោភ័ណ។ ចំពោះពិធីអកអំបុក នឹងរៀបចំនារាត្រីថ្ងៃទី២៧ ខែវិច្ឆិកា ឆ្នាំ២០២៣ នៅបរិវេណសួនមានជ័យ ខេត្តបន្ទាយមានជ័យ៕
