ឯកឧត្តម កៅ ខុនដារ៉ា អញ្ជើញដឹកនាំកិច្ចប្រជុំអំពីតម្រូវការសម្ភារការិយាល័យបន្ថែម ដំណាក់កាលទី២ សម្រាប់អង្គភាពមានទីតាំង នៅអគារទីស្ដីការក្រសួងមហាផ្ទៃ
ភ្នំពេញ៖ នៅទីស្ដីការក្រសួងមហាផ្ទៃ នារសៀលថ្ងៃអង្គារ ទី២៤ ខែតុលា ឆ្នាំ២០២៣ ឯកឧត្តម កៅ ខុនដារ៉ា រដ្ឋលេខាធិការ ក្រសួងមហាផ្ទៃ និងជាអនុគណៈកម្មការសាងសង់អគារទីស្ដីការក្រសួងមហាផ្ទៃ បានអញ្ជើញជាអធិបតីដឹកនាំកិច្ចប្រជុំអំពីតម្រូវការសម្ភារការិយាល័យបន្ថែម ក្នុងទីស្ដីការក្រសួងមហាផ្ទៃ ដោយមានការអញ្ជើញចូលរួមពី អនុរដ្ឋលេខាធិការក្រសួងមហាផ្ទៃ, ប្រធានបណ្ឌិត្យសភានគរបាលកម្ពុជា, ប្រធានក្រុមប្រឹក្សានីតិកម្ម និងតំណាងអគ្គនាយកដ្ឋាននានាក្រោមចំណុះក្រសួងមហាផ្ទៃ។
នាឱកាសនោះ ឯកឧត្តម កៅ ខុនដារ៉ា បានលើកឡើងអំពីការសិក្សាឡើងវិញនូវតម្រូវការបន្ថែម តុ កៅអី និងសម្ភារការិយាល័យ សម្រាប់បម្រើឱ្យការងារប្រចាំថ្ងៃ របស់អគ្គនាយកដ្ឋាននីមួយៗ ដែលត្រូវរៀបចំដាក់ក្នុងទីស្ដីការក្រសួងមហាផ្ទៃថ្មីនេះ នៅដំណាក់កាលទី២។ ជាមួយគ្នានេះដែរ កន្លងមកនេះ យើងបានរៀបចំរួចម្ដងហើយ ប៉ុន្ដែនៅមានការខ្វះខាតនូវសម្ភារៈមួយចំនួនទៀត។
ឯកឧត្តម រដ្ឋលេខាធិការ បានរៀបរាប់ឱ្យដឹងថា តាមការស្នើសុំពីអគ្គនាយកដ្ឋាននីមួយៗ នាពេលកន្លងមក អនុគណៈកម្មការ បានរៀបចំទៅតាមសំណើររបស់អគ្គនាយកដ្ឋាននីមួយៗ ដើម្បីជូនថ្នាក់ដឹកនាំក្រសួងមហាផ្ទៃធ្វើការសម្រេច ក្នុងរៀបចំសម្ភារការិយាល័យ នៅតាមអង្គភាពនីមួយៗ។
ឯកឧត្តម រដ្ឋលេខាធិការ គិតរហូតមកដល់ពេលនេះ តាមការស្នើសុំរបស់អង្គភាពនីមួយៗ នៅមានការខ្វះខាតច្រើន នូវសម្ភារការិយាល័យ។
ឯកឧត្តម បន្ដថា ដោយទទួលបានការអនុញ្ញាតពី ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ឱ្យធ្វើគម្រោងសារឡើងវិញ ចំពោះអង្គភាពណា ដែលនៅមានការខ្វះខាតចំពោះសម្ភារការិយាល័យ។
សូមជម្រាបជូនថា អគារទីស្ដីការក្រសួងមហាផ្ទៃថ្មី ត្រូវបានសាងសង់នៅលើទីតាំងចាស់ តាមបណ្ដោយផ្លូវព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។ តាមការគ្រោងទុកអគារថ្មីនេះ នឹងត្រូវបានរៀបចំធ្វើពិធីសម្ពោធដាក់ឱ្យប្រើប្រាស់ជាផ្លូវការ នៅដើមខែវិច្ឆិកា ឆ្នាំ២០២៣ខាងមុខ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕
