ភ្នំពេញ៖ មេដឹកនាំចិនលោកស៊ី ជីនពីង កាលពីថ្ងៃសុក្របានប្រាប់សមភាគីវៀតណាមនិងជាបុគ្គលជាន់ខ្ពស់លំដាប់ទីពីររបស់រដ្ឋាភិបាលទីក្រុងហាណូយថា ប្រទេសទាំងពីរមិនត្រូវបំភ្លេច«គោលបំណងដើម»នៃមិត្តភាពជាប្រពៃណីរបស់ខ្លួនឡើយ។
សូមបញ្ជាក់ថា ចិននិងអាមេរិកបាននិងកំពុងប្រជែងយកឥទ្ធិពលក្នុងចំណោមប្រជាជាតិអាស៊ីអាគ្នេយ៍ រួមមានប្រទេសវៀតណាម ដែលកាលពីខែមុនបានដំឡើងកំរិតទំនាក់ទំនងរបស់ខ្លួនជាមួយរដ្ឋាភិបាលទីក្រុងវ៉ាស៊ីនតោន ដល់ភាពជាដៃគូយុទ្ធសាស្ត្រគ្រប់ជ្រុងជ្រោយ ដោយទាញអតីតគូសត្រូវមួយនេះមកនៅក្នុងឋានៈស្មើនឹងរដ្ឋាភិបាលទីក្រុងប៉េកាំងនិងមូស្គូ។
ជាប្រពៃណី ចិនមានទំនាក់ទំនងរឹងមាំជាមួយវៀតណាមចាប់តាំងពីពេលបង្កើតទំនាក់ទំនងការទូតនៅឆ្នាំ១៩៥០ ទោះជាមានសង្គ្រាមនឹងគ្នាមួយរយៈពេលខ្លីនៅឆ្នាំ១៩៧៩។ រដ្ឋាភិបាលទីក្រុងប៉េកាំងគាំទ្រការតស៊ូរបស់រដ្ឋាភិបាលទីក្រុងហាណូយប្រឆាំងនឹងអតីតអាណានិគមននិយមបារាំង និងក្រោយមកប្រឆាំងនឹងរដ្ឋាភិបាលវៀតណាមខាងត្បូងក៏ដូចជាអាម៉េរិកក្នុងអំឡុងសង្គ្រាមវៀតណាម។
លោក ស៊ី ជីនពីង បានប្រាប់ប្រធានាធិបតីវៀតណាម លោក វ៉ូ វ៉ាន់ ធឿង (Vo Van Thuong)ថា «ប្រឈមនឹងស្ថានការណ៍អន្តរជាតិផ្លាស់ប្តូរខ្លាំងមិនដែលធ្លាប់ជួប និងភារកិច្ចអភិវឌ្ឍន៍ក្នុងស្រុកដ៏លំបាក ប្រទេសទាំងពីរមិនត្រូវបំភ្លេចគោលបំណងដើមនៃទំនាក់ទំនងមិត្តភាពជាប្រពៃណីរបស់ខ្លួន»ឡើយ។
ភាគីទាំងពីរគួរប្រកាន់ខ្ជាប់គោលការណ៍នៃការប្រឹក្សាយោបល់រួមគ្នា។ ចិននិងវៀតណាមគួរឆ្លៀតរកផលប្រយោជន៍ពីភាពជាអ្នកភូមិផងជាប់របងគ្នានិងការបំពេញអោយគ្នាខាងឧស្សាហកម្ម។
លោក វ៉ូ វ៉ាន់ ធឿង បុគ្គលមានឥទ្ធិពលទីពីរបន្ទាប់ពីអគ្គលេខាបក្សលោក ង្វៀន ភូ ជុង (Nguyen Phu Trong) បានជួបពិភាក្សាជាមួយលោក ស៊ី ជីនពីង ក្រោយចូលរួមវេទិកាខ្សែក្រវាត់និងផ្លូវនៅក្រុងប៉េកាំង។
កាលពីដើមខែតុលា យោងតាមប្រភពដែលដឹងរឿងសារព័ត៌មានរ៉យទ័របានរាយការណ៍ថា មន្ត្រីវៀតណាមនិងចិនបានត្រៀមរៀបចំដំណើររបស់លោក ស៊ី ជីនពីង ទៅកាន់ទីក្រុងហាណូយនៅចុងខែតុលា ឬនៅដើមខែវិច្ឆិកា ។
មិនមានការបញ្ជាក់ជាផ្លូវការអំពីដំណើរទស្សនកិច្ចរបស់លោក ស៊ី ជីនពីង នៅវៀតណាមនៅឡើយទេ តែកាលពីថ្ងៃពុធ សារព័ត៌មានវៀតណាមបានរាយការណ៍ថា ប្រធានាធិបតីរុស្ស៊ី លោក ពូទីន បានទទួលការអញ្ជើញរបស់លោក វ៉ូ វ៉ាន់ ធឿង សម្រាប់មេដឹកនាំរុស្ស៊ីធ្វើទស្សនកិច្ចវៀតណាមក្នុងពេលឆាប់ៗ ពេលអ្នកទាំងពីរបានជួបគ្នានៅវេទិកាខ្សែក្រវាត់និងផ្លូវនៅចិន ៕
