រដ្ឋមន្ត្រីអប់រំ៖ កម្ពុជាមានសិស្ស៣សែននាក់ ទទួលបានកម្មវិធីអាហារនៅសាលារៀន តាមរយៈបណ្ណក្រីក្រ

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ក្រោមការយកចិត្តទុកដាក់របស់រាជរដ្ឋាភិបាលកម្ពុជា លើកុមារមកពីគ្រួសារក្រីក្រមកទល់នឹងពេលនេះ កម្ពុជាមានសិស្សានុសិស្សចំនួន៣សែននាក់ ទទួលបានកម្មវិធីអាហារនៅតាមសាលារៀន ដែលមានបណ្ណក្រីក្រ។

ការគូសបញ្ជាក់យ៉ាងដូច្នេះរបស់ ឯកឧត្តមបណ្ឌិតសភាចារ្យ ធ្វើឡើងក្នុងជំនួបសម្តែងការគួរសម និងពិភាក្សាការងារជាមួយ លោកស្រី អាហ្វស្ហាន ខាន (Afshan Khan) ជំនួយការអគ្គលេខាធិការអង្គការសហប្រជាជាតិ និងជាអ្នកសម្របសម្រួល នៃអង្គការ Scaling Up Nutrition (SUN) Movement កាលពីថ្ងៃទី១៨តុលា នាទីក្រុងប៉ារីស ប្រទេសបារាំង។

ក្នុងជំនួបនោះ ឯកឧត្តមឧបនាយករដ្ឋមន្ត្រី បានគូសបញ្ជាក់បន្ថែថា ការរៀបចំកម្មវិធីអាហារតាមសាលារៀនមានគោលបំណង ជួយដល់កុមារមកពីគ្រួសារក្រីក្រមិនមានអាហារបរិភោគប៉ុណ្ណោះទេ តែដើម្បីជួយជំរុញការផលិត និងប្រើប្រាស់ផលិតផលក្នុងស្រុកមានដូចជា៖ ត្រី សាច់ បន្លែ ផ្លែឈើ របស់ប្រជាកសិករនៅក្នុងមូលដ្ឋានតែម្ដង ហើយនៅកម្ពុជា បញ្ហាក្រិន គឺជាអ្វីដែលត្រូវដោះស្រាយជាចាំបាច់ នាដំណាក់កាលនេះ។ កុមារក្រិនធ្វើឱ្យការសិក្សារបស់ពួកគេមានការលំបាក ហើយការផ្ដល់អាហារតាមសាលារៀន ក៏បានទាក់ទាញកុមារក្រីក្រមកសាលារៀនផងដែរ ព្រោះវាជាទម្រង់មួយនៃប្រព័ន្ធសុវត្ថិភាពសង្គម។

ឯកឧត្តមឧបនាយករដ្ឋមន្ត្រីបន្តថា កម្ពុជាមានបទពិសោធជាច្រើនពាក់ព័ន្ធកម្មវិធីអាហារតាមសាលារៀនេះ ដោយអនុវត្តស្របតាមនិយាមអន្តរជាតិពាក់ព័ន្ធនឹងស្ដង់ដារកាឡូរីសម្រាប់កុមារតាមអាយុ ព្រមទាំងគោរពបាននូវគោលការណ៍នៃលក្ខខណ្ឌទាំងបី សម្រាប់អាហារប្រកបដោយចីរភាពដែលនោះគឺ៖ ១.អាហារត្រូវមានរសជាតិឆ្ងាញ់ពិសា, ២. អាហារមិនត្រូវបំផ្លាញដល់ផែនដី និង ៣.អាហារត្រូវមានសារធាតុចិញ្ចឹមស្របតាមស្ដង់ដារ៕