អនុព័ន្ធយោធាបារាំង បង្ហាញជំហរជួយដល់មជ្ឈមណ្ឌលជាតិរក្សាសន្តិភាព ក្នុងការផ្តល់វគ្គសិក្សាភាសាបារាំង ដល់កម្លាំងមួកខៀវកម្ពុជា
ភ្នំពេញ៖ ឯកឧត្តម នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព នាព្រឹកថ្ងៃទី១៩ ខែតុលា ឆ្នាំ២០២៣ បានអនុញ្ញាតឱ្យលោក វរនាវាឯក Frederic DAUMAS អនុព័ន្ធយោធាបារាំង ផ្នែកការពារ ចូលជួបពិភាក្សាការងារ ដើម្បីបង្កើនកិច្ចសហប្រតិបត្តិការកាន់តែល្អប្រសើរ។
ក្នុងជំនួបនេះផងដែរ ឯកឧត្តម នាយឧត្តមសេនីយ៍ សែម សុវណ្ណនី បានស្នើដល់ភាគីបារាំងបន្តផ្តល់ការបណ្តុះបណ្តាលភាសាបារាំង និងជំនាញនាយទាហានសេនាធិការ និងសង្កេតការណ៍ ដល់កម្លាំងមួកខៀវកម្ពុជាបន្ថែម។ ឯកឧត្តម នាយឧត្តមសេនីយ៍ ក៏បានស្នើឱ្យបង្កើនកម្រិតនៃវគ្គហ្វឹកហ្វឺនទ្វេភាគី ទៅជាកម្រិតត្រីភាគី កម្ពុជា-បារាំង-អសប និងជំរុញឱ្យបើកវគ្គហ្វឹកហ្វឺនផ្នែកបោសសម្អាតយុទ្ធភ័ណ្ឌមិនទាន់ផ្ទុះនៅលីបង់ផងដែរ។ ជាមួយគ្នានោះ ឯកឧត្តម នាយឧត្តមសេនីយ៍ សែម សុវណ្ណនី ក៏បានស្នើដល់ភាគីបារាំងជួយជម្លៀសកងកម្លាំងមួកខៀវកម្ពុជា ចេញពីតំបន់អសន្តិសុខទៅកាន់តំបន់មានសុវត្ថិភាព ក្នុងលក្ខខណ្ឌចាំបាច់ណាមួយ។
លោក វរនាវាឯក Frederic DAUMAS បានបង្ហាញជំហរជួយដល់មជ្ឈមណ្ឌលជាតិរក្សាសន្តិភាព និងតែងរីករាយក្នុងការផ្តល់វគ្គសិក្សាភាសាបារាំង ដល់កម្លាំងមួកខៀវកម្ពុជា។ លោកបានលើកឡើងថា បារាំងនឹងឈរជើងជួយ មជ្ឈមណ្ឌលជាតិរក្សាសន្តិភាព ជានិច្ច ដើម្បីឱ្យជាសាលាមួយនេះក្នុងថ្នាក់តំបន់ ដែលគេទទួលស្គាល់។ ទន្ទឹមនោះ សំណើរខាងលើ ដែលឯកឧត្តមអគ្គនាយកមជ្ឈមណ្ឌលជាតិរក្សាសន្តិភាព បានលើកឡើង លោកវរនាវាឯក Frederic DAUMAS ក៏បានទទួលយកទៅសិក្សាផងដែរ ៕
