ភ្នំពេញ៖ នៅសាលាក្រុងសិរីសោភ័ណ ថ្ងៃទី១៧ ខែតុលា ឆ្នាំ ២០២៣ បានរៀបចំសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិលសង្កាត់ ២០២៤-២០២៦ ក្រោមអធិបតីភាពលោកហ៊ិល រ៉ាយ៉ា អភិបាលរងខេត្ត តំណាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងមានការចូលរួមពី លោកស្រី ព្រំ ស៊ីណា ប្រធានមន្ទីរផែនការខេត្ត លោកប្រធានក្រុមប្រឹក្សា ក្រុងសិរីសោភ័ណ លោកអភិបាលក្រុងសិរីសោភ័ណ ចៅសង្កាត់ទាំង៧ ក្នុងក្រុងសិរីសោភ័ណ មន្ទីរពាក់ព័ន្ធនិងអង្គការដៃគូចូលរួម ។ គោលបំណងនៃសិក្ខាសាលានេះគឺ៖១/-បង្កឱកាសគាំទ្រគម្រោង សកម្មភាពពវិនិយោគនានារបស់ក្រុងនិងសង្កាត់ ដែលពុំមានមូលនិធិអនុវត្ត ។២/-សម្របសម្រួលនិងបន្ស៊ីគ្នារវាង៖-គម្រោងសកម្មភាពវិនិយោគក្រុងនិងសង្កាត់ -គម្រោងសកម្មភាពវិនិយោគសង្កាត់និងសង្កាត់ – គម្រោងសកម្មភាពវិនិយោគក្រុងនិងមន្ទីរ វិស័យនិងបណ្តាដៃគូអភិវឌ្ឍន៍ – គម្រោងសកម្មភាពវិនិយោគសង្កាត់និងមន្ទីរ វិស័យនិងបណ្តាដៃគូអភិវឌ្ឍ ។ ៣/-ពង្រឹងកិច្ចសហការរវាងរដ្ឋបាលក្រុង រដ្ឋបាលសង្កាត់និងភាគីពាក់ព័ន្ធនានា ។ ថ្លែងនាឱកាសបើកសិក្ខាសាលានោះ លោក ហ៊ិល រ៉ាយ៉ា អភិបាលរងខេត្តបន្ទាយមានជ័យ បានថ្លែងថា៖ កម្មវិធីវិនិយោគ៣ឆ្នាំរំកិលនេះ ទី១/-គឺចង់បន្ស៊ីគម្រោងដែលមាននៅថ្នាក់ខេត្ត មានប៉ុន្មានគម្រោងបន្ស៊ីជាមួយក្រុងសិរីសោភ័ណ បន្ស៊ីជាមួយសង្កាត់ ជាពិសេសគឺបន្ស៊ីជាមួយអង្គភាពដែលមានគម្រោងក្នុងក្រុងសិរីសោភ័ណនិងអង្គការដៃគូនានាដែលមានគម្រោងជួយក្រុងសិរីសោភ័ណ ក្រោមការសម្របសម្រួលរបស់មន្ទីរផែនការ។ លោក ហ៊ិល រ៉ាយ៉ា បានបន្តថា៖ពាក់ព័ន្ធនឹងការអភិវឌ្ឍ ក្រុងសិរីសោភ័ណគឺជាក្រុងមួយស្ថិតក្នុងទីរួមខេត្ត តម្រូវឲ្យមានការអភិវឌ្ឍច្រើនជាង ស្រុក ក្រុងផ្សេងៗ ចំពោះហេដ្ឋារចនាសម្ព័ន្ធគឺយើងបានច្រើនទាំងគម្រោងរបស់ខេត្តទាំងគម្រោងរបស់ក្រុងនិងគម្រោងរបស់សង្កាត់ ប៉ុន្តែទោះបីយ៉ាងណាយើងនៅមិនទាន់បានការឆ្លើយតបនោះទេ ។ ហើយមួយទៀតគឺបញ្ហាគម្រោងកែលម្អ បរិស្ថាន ជុំវិញបឹងទន្លេសាបជំហាន២ដូចជាផ្លូវដែលយើងបានធ្វើពីមុនមកបានស្អាតរួចរាល់ហើយនោះត្រូវគម្រោងគម្រោងកែលម្អ បរិស្ថាន ជុំវិញបឹងទន្លេសាបជំហាន២បាន ជីកកសាងប្រព័ន្ធលូទឹកកខ្វក់និងលូរំដោះទឹកភ្លៀងធ្វើឲ្យខូចខាតផ្លូវប្រជាពលរដ្ឋមានការរអ៊ូរទាំពីបញ្ហាខូចផ្លូវជួបការលំបាកក្នុងការធ្វើដំណើររបស់គាត់ ប៉ុន្តែជាផែនការម្ចាស់គម្រោងគេអះអាងថាធ្វើសងយើងវិញផងដែរ ៕
