ឧត្តមសេនីយ៍ទោ ផង់ យ៉ុត បិទវគ្គហ្វឹកហ្វឺនបំប៉នពង្រឹង សមត្ថភាពយោធាប្រចាំឆ្នាំ២០២៣ របស់កងពលតូចថ្មើរជើងលេខ៣១ យោធភូមិភាគទី៣
ភ្នំពេញ៖ នៅល្ងាចថ្ងៃទី១៦ ខែតុលា ឆ្នាំ ២០២៣ ពិធីបិទវគ្គហ្វឹកហ្វឺនបំប៉នពង្រឹង សមត្ថភាពយោធា ប្រចាំឆ្នាំ ២០២៣ របស់កងពលតូចថ្មើរជើងលេខ៣១ យោធភូមិភាគទី៣ ក្រោមអធិបតីភាព ឧត្តមសេនីយ៍ទោ ផង់ យ៉ុត មេបញ្ជាការកងពលតូចថ្មើរជើងលេខ៣១។
របាយការណ៍បិទវគ្គហ្វឹកហ្វឺនបានបញ្ជាក់ឲ្យដឹងថា៖ ក្នុងឆ្នាំ ២០២៣នេះយើងដំណើរការហ្វឹកហ្វឺនសម្រេចបានចំនួន ១ វគ្គមានសមាសភាពចូលរួមចំនួន ១៣២នាក់ ក្នុងនោះ សិក្ខាកាម ១២០ នាក់ គ្រូ ១២នាក់ ចាប់ដំណើរការការងារហ្វឹកហាត់ចាប់ពីថ្ងៃទី ១៨ ខែកក្កដា ឆ្នាំ ២០២៣ ដល់ថ្ងៃទី១៦ ខែតុលា ឆ្នាំ ២០២៣ ដែលមានរយៈពេល ៣ខែ ស្មើ៩១ថ្ងៃ និងបានធ្វើយុទ្ធវិធី យុទ្ធដំណើរទ័ពដោយថ្មើរជើង ថ្នាក់កងអនុសេនាតូចបានចំនួន ០២លើក លើចម្ងាយផ្លូវ ១៥គីឡូម៉ែត្រ និង ២៥គីឡូម៉ែត្រហើយនិងត្រូវបិទបញ្ចប់នៅពេលនេះ ។
ក្រោយពីរៀនចប់ នូវរាល់មុខវិជ្ជានីមួយៗ ទាំងទ្រឹស្ដីការអនុវត្តជាក់ស្ដែងនៅលើទីលានរួចមកគណៈកម្មការដឹកនាំការងារហ្វឹកហ្វឺនកងពលតូចថ្មើរជើងលេខ៣១ រួមជាមួយយោធាចារ្យ បានត្រួតពិនិត្យវាស់ស្ទង់ពីកម្រិតយល់ដឹងរបស់សិក្ខាកាមម្នាក់ៗ ដែលមានសិក្ខាសរុបចំនួន ១២០ នាក់ ជាលទ្ធផលនិទ្ទេសល្អ ៥១ នាក់ស្មើនឹង ៤២,៥% និទ្ទេសល្អបង្គួរ ៥៤ នាក់ស្មើនឹង ៤៥% និទ្ទេសមធ្យម ១៥ នាក់ស្មេីនឹង ១២,៥% និទ្ទេសខ្សោយគ្មាន។
ឧត្តមសេនីយ៍ទោ ផង់ យ៉ុត មេបញ្ជាការកងពលតូចថ្មើរជើងលេខ៣១ បានមានប្រសាសន៍ថា ការហ្វឹកហ្វឺនកងទ័ព ជាវិស័យអាទិភាពមួយ នៃការកែទម្រង់ របស់កងយោធពលខេមរភូមិន្ទ សំដៅធ្វើទំនើបកម្ម និងបង្កើនសមត្ថភាព ដេីម្បីការពារបូរណភាពទឹកដី ការពារសន្តិភាព ការពាររាជរដ្ឋាភិបាលស្របច្បាប់ ការពារសន្តិសុខ និងសណ្ដាប់ធ្នាប់សាធារណៈ ក៏ដូចជាការអភិវឌ្ឍលើគ្រប់វិស័យនៅកម្ពុជា។
បច្ចុប្បន្នការងារហ្វឹកហ្វឺនបានដើរតួនាទីជាយុទ្ធសាស្ត្រយ៉ាងសំខាន់ ក្នុងការពង្រឹងខឿនការពារជាតិ តាមរយៈការផ្ដល់នូវចំណេះដឹង និងចំណេះធ្វើ ពិតប្រាកដឱ្យដល់កងទ័ព ជាពិសេសយោធិនដែលមានវ័យក្មេង ដែលជាប្រភពបន្តវេនជំនាន់ក្រោយ។
ជាមួយគ្នានេះលោកបញ្ជាការ បានផ្ដាំផ្ញើដល់នាយទាហាន នាយទាហានរង និងពលទាហាន កងពលតូចថ្មើរជើងលេខ ៣១ ត្រូវរក្សាភាពស្មោះត្រង់ដាច់ខាតជាមួយជាតិ សាសនា ព្រះមហាក្សត្រ គោរពអនុវត្តឱ្យបានម៉ឺងម៉ាត់ នូវរដ្ឋធម្មនុញ្ញ ច្បាប់លក្ខន្តិកៈយោធា ច្បាប់រដ្ឋផ្សេងៗ និងបទបញ្ជារបស់រាជរដ្ឋាភិបាល អគ្គមេបញ្ជាការ មេបញ្ជាការកងទ័ពជើងគោក មេបញ្ជាការយោធភូមិភាគទី៣ និងកងពល ដែលបានដាក់ចុះ ៕
