ឯកឧត្តម កែ គឹមយ៉ាន ចុះពិនិត្យមើលស្ថានភាពទឹក និងជួបសំណេះសំណាលជាមួយប្រជាពលរដ្ឋ នៅឃុំសឿ ឃុំចំណោមនៅ ស្រុកមង្គលបុរី

ភ្នំពេញ៖ ឯកឧត្តម កែ គឹមយ៉ាន អ្នកតំណាងរាស្រ្តមណ្ឌលខេត្តបន្ទាយមានជ័យ និងជាប្រធានក្រុមការងារចុះមូលដ្ឋានខេត្តបន្ទាយមានជ័យ រួមនឹងអាជ្ញាធរស្រុកមង្គលបុរី មន្ទីរធនធានទឹក និងឧត្តុនិយម និងមន្ទីរអភិវឌ្ឍន៍ជនបទ នាថ្ងៃអង្គារ ទី១០ ខែតុលា ឆ្នាំ២០២៣ បានចុះពិនិត្យមើលស្ថានភាពទឹក និងជួបសំណេះសំណាលជាមួយប្រជាពលរដ្ឋ នៅឃុំសឿ ឃុំចំណោមនៅ ស្រុកមង្គលបុរី ខេត្តបន្ទាយមានជ័យ។

ក្នុងឱកាសនោះ ឯកឧត្តម កែ គឹមយ៉ាន បានពាំនាំការសួរសុខទុក្ខ ការនឹករលឹក យកចិត្តទុកដាក់ ពីសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងថ្នាក់ដឹកនាំគណបក្សជូនចំពោះមន្រីរាជការ អាជ្ញាធរដែនដី និងបងប្អូនប្រជាពលរដ្ឋទាំងអស់ នៅក្នុងខេត្ត ដែលបានចូលរួមជាមួយរាជរដ្ឋាភិបាលកម្ពុជា ដឹកនាំដោយ សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្នុងការបន្តថែរក្សា ការពារសុខសន្តិភាព និងការអភិវឌ្ឍន៍មូលដ្ឋានបានរីកចម្រើន លើគ្រប់វិស័យ។

ឯកឧត្តម កែ គឹមយ៉ាន ក៏បានណែនាំដល់អាជ្ញាធរដែនដីទាំងអស់ត្រូវបន្តយកចិត្តទុកដាក់ តាមដានពីស្ថានទឹកជាប្រចាំក្នុងរដូវទឹកឡើងនេះ និងត្រូវបម្រើសេវាសាធារណ: ជូនប្រជាពលរដ្ឋឲ្យបានកាន់តែល្អប្រសើរ និងរួមគ្នាអនុវត្តជាដាច់ខាតនូវគោលនយោបាយភូមិ ឃុំ សង្កាត់មានសុវត្ថិភាព ដើម្បីអភិវឌ្ឍមូលដ្ឋានយើង ៕