ឯកឧត្តម រស់ វរុណ អញ្ជើញសំណេះសំណាលការងារ ជាមួយថ្នាក់ដឹកនាំ និងមន្ត្រីនៃនាយកដ្ឋានសុចរិតភាព និងអភិបាលកិច្ច នៃអគ្គនាយកដ្ឋានសវនកម្មផ្ទៃក្នុង

ភ្នំពេញ៖ ឯកឧត្តម រស់ វរុណ រដ្ឋលេខាធិការ ក្រសួងមហាផ្ទៃ នាថ្ងៃសុក្រ ទី៦ ខែតុលា ឆ្នាំ២០២៣ បានអញ្ជើញជាអធិបតីក្នុងពិធីសំណេះសំណាលការងារ ជាមួយថ្នាក់ដឹកនាំ និងមន្ត្រីនៃនាយកដ្ឋានសុចរិតភាព និងអភិបាលកិច្ច នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ ដោយមានការអញ្ជើញចូលរួមពី ឯកឧត្តម លោកជំទាវ អនុរដ្ឋលេខាធិការ ទទួលបន្ទុក ឯកឧត្តម លោកជំទាវ អគ្គនាយក អគ្គនាយករង នៃអគ្គនាយកដ្ឋានសវនកម្មផ្ទៃក្នុង និងប្រធាន អនុប្រធាននាយកដ្ឋាន ព្រមទាំងមន្ត្រី នៃនាយកដ្ឋានសុចរិតភាព និងអភិបាលកិច្ច ជាច្រើនរូបផងដែរ។

ឯកឧត្តម នាយឧត្តមសេនីយ៍ ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង បានមានប្រសាសន៍ថា ថ្ងៃនេះអគ្គនាយកដ្ឋានសវនកម្មផ្ទៃក្នុង ជាពិសេស នាយកដ្ឋានសុចរិតភាព និងអភិបាលកិច្ច ពិតជាមានសេចក្តីសោមនស្សរីករាយយ៉ាងក្រៃលែង ដែលទទួលបានវត្តមានដ៏ខ្ពង់ខ្ពស់ពីសំណាក់ ឯកឧត្តមរដ្ឋលេខធិការ ទទួលបន្ទុក និងឯកឧត្តម លោកជំទាវ អនុរដ្ឋលេខាធិការទទួលបន្ទុក ដែលបានផ្តល់កិត្តិយសអញ្ជើញសំណេះសំណាល និងសួរសុខទុក្ខ នាឱកាសនេះ។

ជាមួយគ្នានោះ ឯកឧត្តម នាយឧត្តមសេនីយ៍ បានរម្លឹកពីការខិតខំតស៊ូ និងការពុះពារគ្រប់ឧបសគ្គរបស់ថ្នាក់ដឹកនាំ និងមន្ត្រី នៃអគ្គនាយកដ្ឋានសវនកម្មផ្ទៃក្នុង នាពេលកន្លងមក។ ទន្ទឹមនោះ ឯកឧត្តម នាយឧត្តមសេនីយ៍ បានបញ្ជាក់ថា បច្ចុប្បន្ន នាយកដ្ឋានសុចរិតភាព និងអភិបាលកិច្ច មានតួនាទីចំនួនពីរសំខាន់ៗ ដែលរួមមាន៖ បំពេញតួនាទីលើការងារសវនកម្ម និងការងារចុះបណ្តុះបណ្តាលស្តីពីការប្រើប្រាស់ថវិការបស់គម្រោងអង្គការនានាផងដែរ។ ក្នុងនោះ ឯកឧត្តម នាយឧត្តមសេនីយ៍ បានណែនាំដល់មន្ត្រីក្រោមឱវាទ ឱ្យខិតខំបំពេញតួនាទី ភារកិច្ច ដែលបានប្រគល់ជូនពីថ្នាក់ដឹកនាំ ធ្វើយ៉ាងណាឱ្យសម្រេចបានជោគជ័យតាមផែនការជូនថ្នាក់ដឹកនាំ ក៏ដូចជាក្រសួងមហាផ្ទៃ ជាពិសេស ត្រូវគោរពវិន័យឱ្យបានខ្ជាប់ខ្ជួន និងបទបញ្ជាផ្ទៃក្នុងនានាឱ្យបានម៉ឺងមាត់។

លោក ហេង សុផាត ប្រធាននាយកដ្ឋានសុចរិតភាព និងអភិបាលកិច្ច នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ បានធ្វើសេចក្តីរាយការណ៍សង្ខេប ស្តីពីរបាយការណ៍រយៈពេល៩ខែ ឆ្នាំ២០២៣ និងទិសដៅការងារបន្តរបស់នាយកដ្ឋានសុចរិតភាព និងអភិបាលកិច្ច គោរពជូនគណៈអធិបតី និងអង្គពិធីជ្រាប។ លោក ប្រធាននាយកដ្ឋាន បានលើកឡើងថា នាយកដ្ឋានសុចរិតភាព និងអភិបាលកិច្ច បានដើរតួនាទីយ៉ាងសំខាន់ធ្វើជាសេនាធិការជូនអគ្គនាយកដ្ឋានសវនកម្មផ្ទៃក្នុង លើការងារចម្បងៗរួមមាន៖ ធ្វើទំនាក់ទំនង និងសម្របសម្រួលទូទៅ ក្នុងការពង្រឹង និងការកសាងសមត្ថភាពស្ថាប័ន, ការបណ្តុះបណ្តាលធនធានមនុស្ស, ការពង្រឹងកិច្ចសហប្រតិបត្តិជាមួយដៃគូអភិវឌ្ឍ, ធ្វើការសិក្សាស្រាវជ្រាវលើគោលនយោបាយសុចរិតភាព និងអភិបាលកិច្ចល្អ, ធ្វើការផ្សព្វផ្សាយអំពីព័ត៌មានទាក់ទងគោលនយោបាយសុចរិតភាព និងអភិបាលកិច្ចល្អជូនដល់ថ្នាក់ជាតិ និងថ្នាក់ក្រោមជាតិ ដែលស្ថិតក្រោមឱវាទក្រសួងមហាផ្ទៃ, ធ្វើការបណ្តុះបណ្តាលស្តីពីគោលនយោបាយសុចរិតភាព និងអភិបាលកិច្ចជូនដល់មន្ត្រីនគរបាល មន្ត្រីរាជការស៊ីវិលទាំងថ្នាក់ជាតិ និងថ្នាក់ក្រោមជាតិ ព្រមទាំងរៀបចំធ្វើវេទិកាសាធារណៈដើម្បីផ្សព្វផ្សាយគោលនយោបាយសុចរិតភាព និងអភិបាលកិច្ចជូនប្រជាពលរដ្ឋគ្រប់មូលដ្ឋានផងដែរ។

នាឱកាសនោះ ឯកឧត្តម រស់ វរុណ រដ្ឋលេខាធិការ បានថ្លែងការកោតសើរចំពោះលទ្ធផលដែលនាយកដ្ឋានសម្រេចបាន។ ជាមួយគ្នានោះ ឯកឧត្តម ក៏បានមានប្រសាសន៍ណែនាំដល់ថ្នាក់ដឹកនាំ និងមន្ត្រីទាំងអស់ ឱ្យខិតខំអនុវត្តតួនាទីភារកិច្ចរបស់ខ្លួនឱ្យសម្រេចបានជោគជ័យ តាមផែនការយុទ្ធសាស្ត្ររបស់ក្រសួងមហាផ្ទៃ សម្រាប់ឆ្នាំ២០២៣ ដែលបានប្រគល់ជូនអគ្គនាយកដ្ឋានសវនកម្មផ្ទៃក្នុង។ ឯកឧត្តម រដ្ឋលេខាធិការ បានបញ្ជាក់ថា យោងតាមតួនាទី ភារកិច្ចរបស់នាយកដ្ឋានសុចរិតភាព និងអភិបាលកិច្ច ពិតជាបានឆ្លុះពីការងារសំខាន់ៗជាច្រើន ដែលជាការងារអាទិភាពរបស់គោលនយោបាយរបស់រាជរដ្ឋាភិបាល។
ទន្ទឹមនឹងមានតួនាទី ភារកិច្ចដែលត្រូវបំពេញដ៏សំខាន់ខាងលើ ឯកឧត្តម រដ្ឋលេខាធិការ បានណែនាំបន្ថែមឱ្យថ្នាក់ដឹកនាំ និងមន្ត្រីទាំងអស់ឱ្យសហការជាធ្លុងមួយ រួបរួមសាមគ្កីភាព គោរពស្រឡាញគ្នា ចូលរួមបំពេញការងារឱ្យបានសម្រេចនូវសមិទ្ធផលថ្មីៗបន្ថែមទៀតជូនរាជរដ្ឋាភិបាល ក៏ដូចជាក្រសួងមហាផ្ទៃ៕