ឯកឧត្តម វ៉ា ថន៖ ការអភិវឌ្ឍមូលធនមនុស្ស គឺជាលក្ខណ្ឌចាំបាច់មិនអាចខ្វះបានសម្រាប់ជំរុញពិពិធកម្ម និងកំណើនសេដ្ឋកិច្ច
ភ្នំពេញ៖ ឯកឧត្តម វ៉ា ថន អភិបាលខេត្តក្រចេះ នារសៀលថ្ងៃចន្ទ ៣រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី0២ ខែតុលា ឆ្នាំ២០២៣ បានអញ្ជើញបិទវគ្គបណ្ដុះបណ្ដាលគ្រូបឋមសិក្សា ១២បូក២ ជំនាន់៣៨-៣៩ និងប្រគល់សញ្ញាបត្រជំនាន់ ៣៧-៣៨ នៃសាលាគរុកោសល្យ និងវិក្រឹតការខេត្តក្រចេះ ដែលបានបញ្ជប់ការសិក្សាដោយជោគជ័យ។
តាមការរបាយការណ៍របស់លោក អេង សុខា នាយកសាលាគរុកោសល្យ និងវិក្រឹតការខេត្ត បានបញ្ជាក់ថា ៖ វគ្គដែលបានបណ្ដុះបណ្ដាល នៅសាលាគរុកោសល្យមានចំនួន៣៩វគ្គ ចេញទៅបំរើការនៅតាមមូលដ្ឋាន មាន ៣៨វគ្គ មានគ្រូសរុបចំនួន ២៣២៦ នាក់ នារី ១៣៥៤នាក់។ នៅឆ្នាំសិក្សា២០២២-២០២៣នេះបានបញ្ចប់វគ្គបណ្តុះបណ្តាលជំនាន់ទី៣៩ មានចំនួន ៥៦ នាក់នារី៣៩នាក់។
ឯកឧត្តម វ៉ា ថន អភិបាលខេត្ត បានមានប្រសាសន៍ថា រាជរដ្ឋាភិបាល នីតិកាលទី៧ នៃរដ្ឋសភា បានដាក់ចេញនូវយុទ្ធសាស្រ្តបច្ចកោណដំណាក់កាលទី១ ដែលអាទិភាពជាគន្លឹះរួមមាន៖ មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល។ ការអភិវឌ្ឍមូលធនមនុស្ស គឺជាលក្ខណ្ឌចាំបាច់មិនអាចខ្វះបានសម្រាប់ជំរុញពិពិធកម្ម និងកំណើនសេដ្ឋកិច្ច ប្រកបដោយបរិយាបន្ន និងភាពធន់។
ឯកឧត្តមអភិបាលខេត្ត បានបន្តថា ការវិនិយោគក្នុងការអភិវឌ្ឍមូលធនមនុស្សមានសារៈសំខាន់ដើម្បីឆ្លើយតបទៅនឹងការកើនឡើងនៃតម្រូវការអភិវឌ្ឍសង្គមកិច្ច សេដ្ឋកិច្ចជាតិ។ ក្នុងន័យនេះ រាជរដ្ឋាភិបាលផ្ដោតលើអាទិភាពចំនួន ៥ រួមមាន៖
ទី១-ការពង្រឹងគុណភាពវិស័យអប់រំ កីឡា វិទ្យាសាស្រ្ត និងបច្ចេកវិទ្យា
ទី២-ការបណ្ដុះបណ្ដាល ជំនាញបច្ចេកទេស
ទី៣-ការលើកកម្ពស់សុខភាព និងសុខុមាលភាពប្រជាជន
ទី៤-ការពង្រឹងប្រព័ន្ធគាំពារសង្គម និងប្រព័ន្ធស្បៀង
ទី៥-ការពង្រឹងភាពជាពលរដ្ឋក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន។
ក្នុងនោះឯកឧត្តមអភិបាលខេត្ត ក៏បានផ្ដាំផ្ញើដល់ក្មួយៗគរុសិស្សទាំងបីជំនាន់៖
-ត្រូវបន្ដពង្រឹង និងអនុវត្តន៍ការងារដោយយកចិត្តទុកដាក់ស្រាវជ្រាវបន្ថែម និងដកស្រង់បទពិសោធន៍ជាក់ស្ដែងដើម្បីបង្កើនសមត្ថភាពវិជ្ជាជីវៈរបស់ខ្លួនឱ្យកាន់តែប្រសើរឡើង ក្លាយជាគ្រូកម្រិតមូលដ្ឋានប្រកបដោយគុណភាព ពិសេសប្រែក្លាយសាលារៀនដែលក្មួយៗបានទៅបង្រៀនឱ្យក្លាយទៅជាសាលាកុមារមេត្រី
-បង្កឱកាសដល់កុមារគ្រប់តំបន់ គ្រប់ជនជាតិស្ថិតក្នុងវ័យសិក្សាឲ្យចូលរៀនសូត្របានគ្រប់ៗគ្នា និងឈានទៅបញ្ចប់ការអប់រំមូលដ្ឋានរយៈពេល ៩ឆ្នាំ
-គោរពវិន័យការងារ បទបញ្ញត្តិផ្សេងៗ និងសេចក្ដីណែនាំរបស់ក្រសួង និងរដ្ឋបាលក្រុង ស្រុក និងបន្តត្រូវខិតខំរៀនសូត្របន្ថែមទៀតដើម្បីទទួលបានលទ្ធផលល្អមានចរិយាសម្បត្តិថ្លៃថ្នូរ មានអភិបាលកិច្ចល្អ និងសាមគ្គីភាពទូលំទូលាយ។
ក្នុងឱកាសនោះដែរ ឯកឧត្តម វ៉ា ថន ក៏បានប្រគល់នូវថវិការបន្ថែមចំពោះគ្រូគរុកោសល្យទាំង១៦៥ នូវថវិការចំនួន ៤ម៉ឺនរៀលក្នុងម្នាក់ផងដែរ ៕
