ឧត្តមសេនីយ៍ឯក សុខ វាសនា អនុញ្ញាតឱ្យ ក្រុមការងារនគរបាល តំណាងក្រសួងការបរទេសវៀតណាម ប្រចាំស្ថានទូតវៀតណាមនៅកម្ពុជា ចូលជួបពិភាក្សារការងារស្ដីពី ការគ្រប់គ្រងជនបរទេសអន្តោប្រវេសន្ត
ភ្នំពេញ៖ ឯកឧត្តម ឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ នារព្រឹកថ្ងៃពុធ ១៣កើត ខែភទ្របទ ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី២៧ ខែកញ្ញា ឆ្នាំ២០២៣ បានអនុញ្ញាតឱ្យ ក្រុមការងារនគរបាល តំណាងក្រសួងការបរទេសវៀតណាម ប្រចាំស្ថានទូតវៀតណាមនៅព្រះរាជាណាចក្រកម្ពុជា និងសហការី តំណាងក្រសួងនគរបាលវៀតណាមចូលជួបពិភាក្សារការងារស្ដីពី ការគ្រប់គ្រងជនបរទេសអន្តោប្រវេសន្ត នៅអគ្គនាយកដ្ឋានអន្តោប្រវេសន៍បឹងស្នោរ។
ជាកិច្ចចាប់ផ្តើម ឯកឧត្តម ឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ បានមានប្រសាសន៍ស្វាគមន៍ចំពោះគណៈប្រតិភូ នៃស្ថានទូតវៀតណាម ប្រចាំព្រះរាជាណាចក្រកម្ពុជា។
តំណាងប្រតិភូវៀតណាម បានថ្លែងអំណរគុណដល់ រាជរដ្ឋាភិបាលកម្ពុជា ក្រសួងមហាផ្ទៃ ជាពិសេសអគ្គនាយកដ្ឋានអន្តោប្រវេសន៍ ដែលបានសហការគ្នាដោះស្រាយបញ្ហារបស់ជនបរទេសអន្តោប្រវេសន្តវៀតណាម ដែលរស់នៅកម្ពុជានាពេលកន្លងមក។
ជាមួយគ្នានោះដែល ខាងភាគីវៀតណាម ស្នេីសុំមក ឯកឧត្តម អគ្គនាយក ក៏ដូចជាអគ្គនាយកដ្ឋានអន្តោប្រវេសន៍ បន្តសហការគ្នាដោះស្រាយបញ្ហារដែលនៅសេសសល់ស្របទៅតាមច្បាប់នៃព្រះរាជាណាចក្រកម្ពុជា ដែលបានកំណត់អំពីជនបរទេសអន្តោប្រវេសន្តបន្តទៀត។
ជាការឆ្លើយតប ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ បានគូសបញ្ជាក់ទៅភាគីវៀតណាម ថានឹងខិតខំយកចិត្តទុកដាក់ សហការជាមួួយភាគីវៀតណាម ដេីម្បធ្វេីការដោះស្រាយរាល់បញ្ហាជនបរទេសអន្តោប្រវេសន្តទាំងអស់នៅកម្ពុជា ដោយយកចិត្តទុកដាក់ខ្ពស់ស្របទៅតាមបទដ្ឋានច្បាប់របស់ព្រះរាជាណាចក្រកម្ពុជា។
បន្ថែមពីលើនេះផងដែរ ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ ក៏បានសំណូមពរតំណាងស្ថានទូតវៀតណាម បន្តជូនដំណឹង ជំរុញផ្សព្វផ្សាយ ដល់ពលរដ្ឋវៀតណាម ដែលបានប្រកាសទទួលស្គាល់ថាជាជនបរទសអន្តោប្រវេសន្តហេីយ ត្រូវទៅបន្តប័ណ្ណឱ្យបានឆាប់រហ័សទាន់ពេលវេលាក្នុងការបន្តសុពលភាព ប័ណ្ណស្នាក់នៅអចិន្រ្តៃយរបស់ខ្លួនឱ្យបានទៀងទាត់ស្របទៅតាមសុពលភាពដែលបានកំណត់ ដេីម្បីទទួលបាននូវសិទ្ធរស់នៅក្នុងនាមជាជនបរទេសអន្តោប្រវេសន្តស្របច្បាប់នៅព្រះរាជណាចក្រកម្ពុជា។
ជាកិច្ចបញ្ជប់អង្គភាពទាំងពីរ បានឯកភាពនឹងបន្តពង្រឹង និងពង្រីកកិច្ចសហប្រតិបត្តិការទ្វេភាគីផ្សេងទៀតដែលនៅសេសសល់នេះឱ្យកាន់តែប្រសើរឡើង ៕
