នាយករដ្ឋមន្ត្រីថ្មីកម្ពុជា៖ ខែមុនថ្លែងសុន្ទរកថានៅក្នុងរដ្ឋសភា ខែនេះថ្លែងសុន្ទរកថានៅក្នុងUN អំពីគោលនយោបាយរាជរដ្ឋាភិបាល

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងអំពីការចូលកាន់តំណែងជានាយករដ្ឋមន្រ្តីរបស់សម្តេច ដែលគិតត្រឹមថ្ងៃទី២២ ខែកញ្ញា ឆ្នាំ២០២៣ ជាថ្ងៃដែលសម្តេចឡើងថ្លែងសុន្ទរកថា នៅក្នុង
អង្គការសហប្រជាជាតិ គឺមានរយៈពេល១ខែគត់។

សម្តេចធិបតី បានលើកឡើងបែបនេះក្នុងឱកាសដែលសម្តេច បានអញ្ជើញជួបសំណេះសំណាលជាមួយប្រជាពលរដ្ឋខ្មែរនៅអាមេរិក និងកាណាដា នាល្ងាចថ្ងៃទី២៣ ខែកញ្ញា ឆ្នាំ២០២៣។

សម្តេចធិបតី បានរំលឹកថា កាលពីថ្ងៃទី២២ ខែសីហា ឆ្នាំ២០២៣ កន្លងទៅនេះ គឺជាថ្ងៃដែលសម្តេចឡើងថ្លែងសុន្ទរកថា នៅក្នុងរដ្ឋសភា អំពីគោលនយោបាយជាតិ បម្រើប្រជាពលរដ្ឋ​ ជូនដល់រដ្ឋសភា និងសាធារណជន ចំណែកឯថ្ងៃទី២២ ខែកញ្ញា ឆ្នាំ២០២៣ នៅអង្គការសហប្រជាជាតិ គឺជាការបង្ហាញអំពីគោលនយោបាយរបស់រាជរដ្ឋាភិបាលកម្ពុជា នៅក្នុងប្រទេស ក៏ដូចជា ចូលរួមចំណែកក្នុងផែនការមេរបស់អង្គការសហប្រជាជាតិ ដើម្បីការអភិវឌ្ឍប្រកបដោយចីរភាព និងនិរន្តរភាព និងការងារពាក់ព័ន្ធនឹងរឿងសន្តិសុខផ្សេងៗ។

សម្តេចធិបតី ក៏បានរំលឹកផងដែរ អំពីសកម្មភាពសំខាន់ៗរបស់សម្តេច ក្រោយពេលចូលកាន់តំណែងរយៈពេលមួយខែមកនេះ ដោយក្នុងនោះមានសកម្មភាពនៅក្នុងប្រទេស និងសកម្មភាពនៅក្រៅប្រទេស។

សកម្មភាពនៅក្រៅប្រទេស សម្តេចបានអញ្ជើញទៅចូលរួមកិច្ចប្រជុំកំពូលអាស៊ាន នៅប្រទេសឥណ្ឌូនេស៊ី ហើយបន្ទាប់មកទៅបំពេញទស្សនកិច្ចនៅប្រទេសចិន រួចហើយទើបធ្វើដំណើរមកកាន់សហរដ្ឋអាមេរិក ដើម្បីចូលរួមកិច្ចប្រជុំអង្គការសហប្រជាជាតិ លើកទី៧៨ ដែលជាការចំណាយពេលវេលាយូរជាងគេផងដែរ ៕