ឯកឧត្តម ជា វ៉ាន់ដេត អញ្ជើញការដ្ឋានស្ថាបនាផ្លូវបេតុងថ្មី ជូនដល់បងប្អូនប្រជាពលរដ្ឋក្នុងឃុំចំបក់ ស្រុកបាទី
ភ្នំពេញ៖ ឯកឧត្តម បណ្ឌិត ជា វ៉ាន់ដេត រដ្ឋមន្រ្តីក្រសួងប្រៃសនីយ៍ និងទូរគមនាគមន៍ និងជាប្រធានក្រុមការងារចុះជួយស្រុកបាទី នារសៀលថ្ងៃសៅរ៍ ទី១៦ ខែកញ្ញា ឆ្នាំ២០២៣ បានអញ្ជើញជាអធិបតី បើកការដ្ឋានស្ថាបនាផ្លូវបេតុងថ្មី ប្រវែង ១៩គីឡូម៉ែត្រ ទុកជាចំណងដៃរបស់ឯកឧត្តមបណ្ឌិត ជូនដល់សមាជិក សមាជិកា ព្រមទាំងបងប្អូនប្រជាពលរដ្ឋក្នុងឃុំចំបក់ ស្រុកបាទី ខេត្តតាកែវ។
ជាមួយគ្នានោះដែរ ឯកឧត្តមប្រធានក្រុមការងារ សូមសម្តែងការអរគុណជាអនេកប្បការចំពោះបងប្អូន ពូមីង លោកតា លោកយាយ បានបោះឆ្នោតគាំទ្រគណបក្សប្រជាជនកម្ពុជា យើងច្រើនលើសលប់ ពិសេសគាំទ្របេក្ខភាពសម្តេចតេជោ នាយករដ្ឋមន្ត្រី និងសម្តេចធិបតី ហ៊ុន ម៉ាណែត ព្រមទាំងគាំទ្រឯកឧត្តមរដ្ឋមន្ត្រី ជាប់ជាតំណាងរាស្ត្រមណ្ឌលខេត្តតាកែវ ផងដែរ។
ពិធីបើកការដ្ឋាន បានអញ្ជើញចូលរួមឯកឧត្តមបណ្ឌិតសភាចារ្យ ច័ន្ទ សំណព្វ ប្រធានក្រុមការងារឃុំចំបក់ ព្រមទាំងលោក ភួន ឈីម អភិបាលស្រុកបាទី និងសហការី ឯកឧត្តម លោកជំទាវ ប្រធានក្រុមការងារ សមាជិកសមាជិកា អាជ្ញាធរមូលដ្ឋានស្រុក ឃុំ និងភូមិ ជាច្រើនរូប ៕
