អគារជាន់លើបង្អស់ នៃសណ្ឋាគារមីងឌូ ក្នុងក្រុងប៉ោយប៉ែត មានអគ្គីភ័យឆាបឆេះ តែត្រូវបានអាជ្ញាធរ និងសមត្ថកិច្ចចំរុះ ចុះអន្តរាគមន៍ជួយពន្លត់ទាន់ពេល
ភ្នំពេញ៖ មានហេតុការណ៍គ្រោះអគ្គីភ័យមួយបានឆាបឆេះនៅជាន់លើបង្អស់នៃអគារសណ្ឋាគារមីងឌូស្ថិតនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ នៅវេលាម៉ោង ៩និង៣០នាទីយប់ថ្ងៃទី១៥ ខែកញ្ញា ឆ្នាំ២០២៣ បង្កឲ្យមានការភ្ញាក់ផ្អើលដល់អាជ្ញាធរនិងសមត្ថកិច្ចចុះជួយអន្តរាគមន៍ទាន់ពេល ។
ក្នុងហេតុការណ៍ដ៏គួរឲ្យរន្ធត់នេះ គេសង្កេតឃើញមានវត្ថមានឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានចុះទៅដល់កន្លែងកើតហេតុ ក្នុងនោះមានវត្ថមានលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ អមដំណើរដោយលោកឧត្តមសេនីយ៍ត្រី អេង លីហួរ ស្នងការរង ផែនការងារអន្តោប្រវេសន៍ ដឹកនាំបញ្ជាកងនកម្លាំងនគរបាលអធិការដ្ឋានក្រុងប៉ោយប៉ែត ,កម្លាំងនគរបាលអធិការដ្ឋានស្រុកអូរជ្រៅ ,នគរបាលវរសេនាតូចការពារព្រំដែនលេខ៨៩១និងនគរបាលវរសេនាតូចការពារព្រំដែនលេខ៩១១ ដោយមានការចូលរួមកម្លាំងចំរុះមានអាជ្ញាធរមូលដ្ឋាន និងប្រជាការពារ ព្រមទាំងខាងភាគីថៃ បានចុះមកសហការណ៍ជួយពន្លត់អគ្គីភ័យត្រូវបានរលត់ទាំងស្រុង នៅវេលាម៉ោង ១០និង៥០នាទីយប់នាថ្ងៃខែឆ្នាំ ដដែល ។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹងថា៖គ្រោះអគ្គីភ័យកើតឡើងនេះ គឺបណ្តាលមកពីឆ្លងចរន្តអគ្គិសនី ក្នុងកិច្ចប្រតិបត្តិការពន្លត់អគ្គីភ័យនេះដែរយើងបានប្រើប្រាស់រថយន្តចំនួន៨គ្រឿង បាញ់ទឹកចំនួន០៧ធុង ក្នុងនោះឡានទឹកអធិការក្រុងប៉ោយប៉ែត១ គ្រឿងប្រើប្រាស់ទឹកអស់ចំនួន២ធុង,ឡានទឹកអធិការស្រុកអូរជ្រៅ១គ្រឿង ប្រើប្រាស់អស់ទឹកចំនួន១ធុង,ឡានទឹកសាលាក្រុង ១គ្រឿងប្រើប្រាស់អស់ទឹកចំនួន១ធុង,ឡានទឹកក្រុមហ៊ុនកាស៊ីណូ ចំនួន៣ គ្រឿង មាន៖ហ្រ្គែនដាយមិន ១ គ្រឿងប្រើប្រាស់អស់ទឹកចំនួន១ធុង,ត្រូពិចកាណា ១ គ្រឿងប្រើប្រាស់អស់ទឹកចនួន១ធុង,ដាយមិនស៊ីធី ១ គ្រឿងប្រើប្រាស់អស់ទឹកចំនួន១ធុង ចំពោះឡានទឹកភាគីថៃចំនួន២ គ្រឿង ពុំបានប្រើប្រាស់ទេ ។
លោកអធិការបានបញ្ជាក់ថា៖ក្នុងហេតុការណ៍ដ៏អាក្រក់នេះពុំមានមនុស្សរងគ្រោះថ្នាក់នោះទេ ហើយចំពោះ សម្ភារៈខូចខាតដោយគ្រោះអគ្គីភ័យនេះ មាន៖-គ្រែដេកដែកចំនួន ២០គ្រែ,ពូកដេកចំនួន២០ ពួក(ដែលទុកចោល) ៕
